Eýýup 21 - Мукаддес Китап

21‑нҗи бап Эйюп Сопара җогап берйәр

¹ Эйюп шейле дийди:

² «Дыкгат билен гулак гоюң сөзүме, гой, бу сизиң маңа берҗек теселлиңиз болсун.

³ Гезек бериң, мен гепләйин, сөзүми гутаранымдан соң масгаралаң.

⁴ Ынсана арз-шикаят эдйәнми мен? Ненең җаным янмасын?

⁵ Халыма середип, акылыңыз чашсын, элиңизи агзыңыза тутуң.

⁶ Дердими яда саланымда, галагопланярын, сүңңүме галпылды аралашяр.

⁷ Нәме үчин пислер яшаярлар, гоҗалыга етип, гуҗур-гайратлары артяр?

⁸ Перзентлери янларында, зүрятлары гөзлериниң алнында.

⁹ Өйлеринде ховпсузлыкда, горкусыз яшаярлар, Худай-да олара җеза бермейәр.

¹⁰ Өкүзлери кемсиз өрңейәр, сыгырлары гузлаяр, гөле дүшмейәр.

¹¹ Чагаларыны сүри кимин ёла салярлар, огланлары танс эдишйәрлер.

¹² Депрек, лира билен айдым айдышып, шатланярлар олар түйдүк сесине.

¹³ Өмүрлерини хошвагтлыкда гечирип, өлүлер дүнйәсине асудалыкда гирйәрлер.

¹⁴ Пислер Худая шейле диййәрлер: „Бизи өз гүнүмизе гой! Чүнки биз Сениң ёлуңы өвренмек ислемейәрис.

¹⁵ Гудратыгүйчли ким болупдыр Оңа сежде эдеримиз ялы? Оңа дилег эдип, гөрйән хайрымыз нәме?“

¹⁶ Ровачлыгы өз эллеринде дәлми нәме? Пислериң несихаты менден узакда болсун!

¹⁷ Пислериң чырасы нәче гезек өчди? Башларына үзнүксиз бетбагтчылык абананыны гөрдүңми? Худай газабына олары гөргә дучар эдйәрми?

¹⁸ Хачан олар еле соврулян саман ялы, түвелей өңүндәки саман чөпи ялы болдулар?

¹⁹ Сиз: „Худай аталарының җезасыны чагаларына чекдирйәр“ диййәңиз. Гой, аталарың муны билери ялы, Худай олара алмытыны берсин.

²⁰ Аталар хеләкчилигини өз гөзлери билен гөрсүнлер, олар Гудратыгүйчлиниң газабындан ичсинлер.

²¹ Чүнки бу дүнйәден өтенсоңлар, ызларында галан хоҗалыгындан нәме гайгысы болсун?

²² Гөкдәкилере хөкүм эдйән Худая акыл берип билҗек бармыдыр?

²³ Бири сагатка өлйәр, бүс-бүтин рахат ве гайгысыз.

²⁴ Эти-ганы еринде болуп, сүңклери йиликден долудыр.

²⁵ Бейлеки бири дерт чекип, говулыга гөзи дүшмән өлйәр.

²⁶ Олар топрак астында биле ятярлар, үстлерини гуртлар басяр.

²⁷ Билйән мен сизиң пикирлериңизи, гаршыма эдйән дилдүвшүклериңизи.

²⁸ Чүнки сиз: „Асылзадаң өйи ниреде? Пислериң чадыры ниреде?“ диййәңиз.

²⁹ Ёлагчылардан сорамадыңызмы? Шаятлыкларына гулак асмадыңызмы?

³⁰ Пислер пеләкет гүни аман галярлар, Худайың газаплы гүнүнден гутарылярлар.

³¹ Пислериң херекетлерини ким йүзлерине басҗак? Этмишлерине гөрә ким олара җеза берҗек?

³² Олар габра гетириленде, мазарларының башында сакчы гоюляр.

³³ Җайланан топрагы олара якымлыдыр, хеммелер оларың ызына дүшерлер, оларың өңүнден гиденлер сан-саҗаксыздыр.

³⁴ Сиз бош сөзлериңиз билен маңа нәме теселли берҗек? Бар диййән затларыңыз галпдыр».