Eýýup 20 - Мукаддес Китап

20‑нҗи бап Сопар Эйюба җогап берйәр

¹ Онсоң нагамлы Сопар шейле дийди:

² «Гулак гой! Пикирлерим җогап бермәге меҗбур эдйәр, мундан артык сакланып билмерин.

³ Сөзлериң билен мени кемсидйәң, дүшүнҗәм саңа җогап бердирйәр.

⁴ Овалдан бәри, ынсаның дүнйә гелшинден бәри билмейәрмидиң муны?

⁵ Пислериң хешеллеси вагтлайындыр, худайсызың шатлыгы бир салымлыкдыр.

⁶ Оларың бойы хатда гөклере етип, башлары булутлара дегсе-де,

⁷ пислер өз неҗасаты кимин бакы ёк боларлар, олары танаянлар: „Олар ниреде?“ диерлер.

⁸ Дүйш кимин учуп гидерлер, гиҗеки гөрнүш кимин гайып боларлар.

⁹ Бир гөрен гөз гайдып гөрмез олары, меканы-да олары икиленч гөрмез.

¹⁰ Огуллары пукараларың өңлеринде өзлерини кичелдерлер, эллери билен оларың байлыгыны ызына гайтарарлар.

¹¹ Беденлери яшлык гуҗурындан долы хем болса, олар билен топрак астында ятарлар.

¹² Хатда яманлык агза датлы гөрнүп, оны дилиниң астында гизлеселер-де,

¹³ яманлыгы саклап, гойбермән, агызларында сакласалар-да,

¹⁴ иенлери ашгазанында туршар, ичлеринде йыланың зәхерине дөнер.

¹⁵ Байлыгы ювудып, ене гусярлар оны, Худай оны ичлеринден чыкаряр.

¹⁶ Йыланларың зәхерини сорарлар, алахөврениң диши олары өлдүрер.

¹⁷ Акар сувларың, балдыр гаймак акян дерелериң хөзирини гөрмезлер.

¹⁸ Газананларыны иймән, ызына гайтарарлар, эден сөвда-сатыгындан хайыр гөрмезлер.

¹⁹ Чүнки пукаралары эзип, олардан йүз өвүрдилер, өз гурмадык өйлерини эеледилер.

²⁰ Ачгөзлүкден калплары рахатлык тапмаз, арзылы затлары олары халас этмез.

²¹ Иенлеринден артаны болмады, мунуң үчин ровачлыклары узага чекмез.

²² Боллукда азап чекерлер, депелеринден мушакгат инер.

²³ Гарынларыны дойранларында, Худай ловлаян газабыны үстлерине дөкер, газабыны башларындан иймит кимин ягдырар.

²⁴ Демир ярагдан гачып гутулсалар, бүрүнч яй ичлеринден парран гечер.

²⁵ Ок ичлеринден бөвсүп гечер, ялпылдаян уҗы бөвүрлеринден чыкар, үстлерине ховп абанар.

²⁶ Түм гараңкылыкда хазыналары ёк болар, үфленмедик от олары ювудар, чадырларында галанларыны якып ёк эдер.

²⁷ Гөклер шаятлык эдер этмишлерине, бүтин әлем-җахан олара гаршы чыкар.

²⁸ Худайың газап гүни өйлери эмләги билен сүпүрилип әкидилер.

²⁹ Ине, шудур пислериң Худайдан алҗак пайы, Худайың олара берен мирасы».