Eýýup 19 - Мукаддес Китап

19-нҗы бап Эйюп Билдада җогап берйәр

¹ Эйюп шейле дийди:

² «Хачана деңеч мени гынап, сөзлериңиз билен пагыш-пара этҗек?

³ Он мертебе гөвнүме дегдиңиз, утанаңзокмы шейле эзъет бермәге?

⁴ Догруданам, хата иш эден болсам, хатам өз бойнума.

⁵ Өзүңизи өңүмде ёкары тутуп, айыбымы йүзүме урсаңыз,

⁶ шуны билип гоюң, Худай мени нәхак сайды, Ол дашыма Өз торуны чекди.

⁷ „Бу – зорлук“ дийип перят эдйәрин, эмма җогап берйән ёк. Медет диләп ялбарярын, эмма адалат ёк.

⁸ Ёлума гермев чекди, гечип билемок, ёдаларымы гараңкыратды.

⁹ Мени ат-абрайдан дүшүрип, башымдан тәҗими алды.

¹⁰ Мени чар тарапдан гысып-говурды, сандан галдым, умыдымы агач дейин көки билен согурды.

¹¹ Ол маңа газапланяр, мени Өзүне душман сайяр.

¹² Лешгерлери үстүме хүҗүм эдйәрлер, маңа гаршы япгыт галдырярлар, чадырымың төверегинде дүшелге гурярлар.

¹³ Гарындашларымы менден дашлашдырды, танышларым маңа ят болдулар.

¹⁴ Якынларым мени рет этдилер, достларым мени унутдылар.

¹⁵ Сачагымдан дуз иенлер хем унутдылар мени, хатда өз гырнакларым-да мени ят сайярлар, оларың гөзүне мен бир кесеки.

¹⁶ Хызматкәрими чагырян, йөне җогап ёк, ялбар-якар этмели болян өзүм.

¹⁷ Демим аялымда йигренч дөредйәр, өз машгалам мени йигренйәр.

¹⁸ Яш чагалар-да мени кемсидйәрлер, аяга галанымда, мени яңсылаярлар.

¹⁹ Ичгин достларым мени йигренйәрлер, эй гөренлерим менден йүз өвүрдилер.

²⁰ Диңе хам билен сүңке өврүлдим, өлүмиң бәри янында дурун мен.

²¹ Маңа рехим эдиң, эй, достларым, рехим эдиң, маңа! Чүнки Худай маңа эл урды.

²² Нәме үчин сизем Худай ялы мени ызарлаярсыңыз, нәме мениң тенимден доймаярсыңызмы?

²³ Вах, мениң сөзлерим язылсады! Вах, олар китаба язылсады!

²⁴ Вах, сөзлерим демир галам ве гуршун билен гаяның йүзүне эбедилик оюлып язылсады!

²⁵ Чүнки мен Пенакәримиң диридигини, ахырында Онуң бу ерде дурҗакдыгыны билйәрин.

²⁶ Хамым чүйрәнден соңам тенимде Худайы гөрерин.

²⁷ Худайы кесеки гөзи билен дәл-де, өз гөзлерим билен гөрерин, йүрегим үзүлип баряр.

²⁸ „Биз оны нәхили ызарларыс? Беланың көрүги Эйюпдыр“ дийсеңиз,

²⁹ сиз гылычдан хедер эдиң, чүнки газап гылыч җезасыны гетирйәр, шонда хөкүмиң бардыгыны билерсиңиз».