Eýýup 18 - Мукаддес Китап

18‑нҗи бап Билдат Эйюба җогап берйәр

¹ Онсоң шувалы Билдат шейле дийди:

² «Не заман гутарҗак сөзүңи? Оңатҗа пикирлен, онсоң геплешерис,

³ биз нәме үчин хайван сайылярыс, нәме үчин акмак гөрүнйәрис гөзүңе?

⁴ Гахарыңа өз җаныңа зор салярсың, сен дийип дүнйә терк эдилсинми? Гаялар сүйшсүнми?

⁵ Пислериң ышыгы сөнйәр, от ялынлары парламаяр.

⁶ Чадырындакы нур гараңкылыга өврүлйәр, депелериндәки чырасы сөнйәр.

⁷ Гадамларының бады говшаяр, өз ишлери йыкяр олары.

⁸ Өз аяклары билен тора дүшйәрлер, өзлери гарыма йыкылярлар.

⁹ Аягы гапана дүшйәр, олары дузак гапҗаяр.

¹⁰ Олар үчин ере сыртмак чекилйәр, ёлларына дузак гуруляр.

¹¹ Чар тарапдан ховп абаняр олара, ховп оларың сөбүгине дүшйәр.

¹² Гүйч-кувват галмаз ачлыкдан яңа, янларындан бетбагтчылык айрылмаз.

¹³ Дерилерини дерт иййәр, эл-аякларыны өлүм ювудяр.

¹⁴ Ынам эден чадырындан алнып гидилип, ховплар шасының янына гетирилйәр.

¹⁵ Чадырларында хич зат галмаяр, юртларына күкүрт ягдырыляр.

¹⁶ Көклери гураяр ашакда, шахалары соляр ёкарда.

¹⁷ Ер йүзүнде оларың атлары унудыляр, көчелерде атлары ятланылмаяр.

¹⁸ Ягтылыкдан гараңкылыга итилип, дүнйәден ковулярлар.

¹⁹ Халкының арасында не зүряды, не-де неберелери бар, месгенинде ызында хич ким галмаяр

²⁰ Өңки несиллер оларың такдырына хайран галярлар, ховп гуршаяр соңкы несиллери.

²¹ Шейле боляндыр эрбедиң кысматы, Худайы танамаяның месгени шудур».