Eýýup 17 - Мукаддес Китап

17‑нҗи бап Эйюп сөзүни довам эдйәр

¹ «Рухум сынды, гүнлерим тамам, маңа габыр гарашяр.

² Даш-төверегим яңсылайҗылардан долы, гөзүм оларың душманчылыгыны гөрйәр.

³ Өзүң маңа кепиллик бергин, Сенден башга маңа ким кепил болҗак?

⁴ Оларың аңыны дүшүнҗеден гизледиң, шонуң үчин олары бейгелтмерсиң.

⁵ Пара үчин достларыны сатянларың чагаларының гөзлери көр болар.

⁶ Худай мени иле геп этди, олар йүзүме түйкүрйәрлер.

⁷ Гайгыдан яңа гөзүм күтелди, он ики сынам чөпе дөнди.

⁸ Догручыл адам дердиме аңк боляр, бигүнә-де худайсыза гаршы газап атына атланяр.

⁹ Догручыллар өз ёлларыны тутарлар, эли тәмизлериң гүйҗи артар.

¹⁰ Эмма хеммәңиз гайдып гелсеңиз-де, араңыздан акыллы адам тапмарын.

¹¹ Гүнлерим тамам, ниетлерим, йүрек арзувларым-да пуҗа чыкды.

¹² Олар гиҗәни гүндиз эдйәрлер, „Ягтылык гараңкылыга якын“ диййәрлер.

¹³ Өлүлер дүнйәсини өйүм дек күйсесем, дүшегими гараңкылыкда язсам,

¹⁴ габра: „Сен атамсың“, гурда: „Сен энемсиң, уямсың“ диен болсам,

¹⁵ онда умыдым ханы? Умыдымы гөрҗек ким?

¹⁶ Умыт мениң билен өлүлер дүнйәсине инер өйдйәңми? Мениң билен биле гөре гирерми?»