Eýýup 16 - Мукаддес Китап

16-нҗы бап Эйюп Элипаза җогап берйәр

¹ Эйюп шейле дийди:

² «Мен булар ялы затлары көп эшитдим. Сизиң барыңыз дерексиз теселли бериҗилер!

³ Бош сөзлериңиз хачан гутарҗак? Сизи давалашмага меҗбур эдйән зат нәме?

⁴ Сиз мениң ериме болан болсадыңыз, менем сизиң ялы гепләп билердим. Сизе гаршы акгынлы сөзләп, башымы яйкардым.

⁵ Сизи өз сөзлерим билен рухландырардым, көшешдириҗи сөзлерим дердиңизи еңледерди.

⁶ Геплесем-де дердим еңлемейәр, дыманым билен җаным арам тапмаяр.

⁷ Я Худай, Сен мени халыс тапдан дүшүрдиң, бүтин хоҗалыгымы вейран этдиң.

⁸ Гурпсузлыгым муңа шаятлык эдйәр, меҗалсызлыгым гаршыма гүвәлик эдйәр.

⁹ Худай маңа йигренч билен середип, гахарына мени парчалаяр, Ол маңа дишлерини гыҗаяр, душманымың гөзлери ичимден гечйәр.

¹⁰ Адамлар маңа агызларыны өвелдип, мени масгаралап, яңагыма урярлар, гаршыма дил бирикдирйәрлер.

¹¹ Худай мени нәлеткерделериң, пислериң элине берди.

¹² Рахатлыкда яшаярдым, эмма Худай мени сарсдырды, бойнумдан тутуп, бөлек-бөлек этди, мени Өзүне нышана эдинди.

¹³ Онуң кеманчылары дашымы гуршаяр, рехимсизлик билен бөврүми дешйәр, өдүми ере дөкйәр.

¹⁴ Беденими дилим-дилим эдйәр, уршуҗы кимин үстүме топуляр.

¹⁵ Эгниме җул тикиндим, башымы тоза сокдум.

¹⁶ Агламакдан яңа йүзүм гызаряр, гөзүми түм гараңкылык өртйәр.

¹⁷ Йөне мен җенаят этмедим, дилегим-де пәкдир.

¹⁸ Эй, топрак, ганымың үстүни өртме, перядым асла диңмесин.

¹⁹ Ине, шу пурсат шаядым гөкде, хемаяткәрим ёкарда.

²⁰ Достларым мени масгаралаярлар, Худая гөз-яш эдйән.

²¹ Адамзат оглы билен гоңшусының арасында болшы ялы, ынсан билен Худайың арасында-да бир төвеллачы болсады!

²² Барса-гелмезе гидерин бирнәче йылдан».