Eýýup 15 - Мукаддес Китап

15‑нҗи бап Элипаз Эйюба җогап берйәр

¹ Онсоң тейманлы Элипаз шейле дийди:

² «Акыллы адам бош сөзлер билен җогап берерми? Өзүни гүндогар шемалындан долдурармы?

³ Ол бидерек геп билен, дерексиз сөзлер билен дава-җенҗел турзармы?

⁴ Худайдан хедер этмеги арадан айырярсың, Худай барада ойланмага пәсгел берйәрсиң.

⁵ Этмишиң гепиңе тәсир эдйәр, хилегәриң дилинде гүрлейәрсиң.

⁶ Сени язгарян мен дәл, өз агзың, додакларың саңа гаршы шаятлык эдйәр.

⁷ Илки доглан ынсан сенмисиң? Даглардан өң ярадылдыңмы?

⁸ Худайың меҗлисини диңледиңми? Еке-тәк дана адамдырын өйдйәңми?

⁹ Бизиң билмейән хайсы задымызы билйәрсиң? Бизиң дүшүнмейән хайсы задымыза дүшүнйәрсиң?

¹⁰ Бизде чал сачлы-да, гоҗалар-да бардыр, оларың яшлары сең какаңкыдан-да улудыр.

¹¹ Худайың саңа берйән теселлилери кемлик эдйәрми? Хошамай сөз етерлик дәлми я саңа?

¹² Йүрегиң нәмә мөвч аляр? Гөзлериңден нәме үчин от сычраяр?

¹³ Нәме үчин Худая газапланып, агзыңдан бейле сөзлери чыкарярсың?

¹⁴ Тәмиз болар ялы, ынсан ким болупдыр? Ынсандан доглан догры болуп билерми?

¹⁵ Худай хатда Өз перишделерине ынам этмейәр, гөклер-де Онуң назарында тәмиз дәл.

¹⁶ Этмиши сув кимин ичйән, йигренҗи, бозук ынсана Худай ненең ынам этсин.

¹⁷ Диңле мени, саңа дүшүндирейин, гөреними беян эдейин,

¹⁸ акылдарларың айданларыны, ата-бабаларының гизлемедик пәхимлерини.

¹⁹ (Юрт диңе араларында гелмишек болмадык ата-бабалара берленди.)

²⁰ Пислер бүтин өмрүне эҗир чекйәндирлер, залымлара берлен йыллар саналгыдыр.

²¹ Элхенч сеслер оларың гулагындан гитмез, асудалыкдака оларың үстүне талаңчы дөкүлер.

²² Гараңкылыкдан гутулҗагына ынам ёкдур оларда, оларың такдыры гылычдыр.

²³ „Ниредекә?“ дийип, бир дөвүм нан үчин сергезданлык эдйәрлер, гараңкылык гүнүниң якындыгыны билйәрлер.

²⁴ Алада ве хорлук олары горкузяр, сөвеше тайынланан ша кимин олара хүҗүм эдйәр.

²⁵ Чүнки пислер Худая гаршы эл гөтерйәр, Гудратыгүйчлә гаршы чыкяр.

²⁶ Бойнуёгынлык эдип, галың, юмры галканы алып, Худайың үстүне топулярлар олар.

²⁷ Йүзлеринден яг дамып, биллерини яг алса-да,

²⁸ вейран эдилен шәхерлерде, харабачылыга өврүлен, отурылмаян, адамсыз өйлерде яшарлар.

²⁹ Хич хачан баямазлар, байлыклары узага чекмез, мал-мүлклери ер йүзүне яйрамаз.

³⁰ Гараңкылыкдан гачып билмезлер, пудакларыны ялын ёк эден агач кимин боларлар, Худайың демине ёк боларлар.

³¹ Бошлуга бил баглап, өзлерини алдатмасынлар, чүнки бошлук оларың музды болар.

³² Вагтындан өң иши гайдар, пудаклары гөгермез.

³³ Гөк үзүмлери дөкүлен үзүм агаҗы, гүллери дөкүлен зейтун агаҗы ялыдыр олар.

³⁴ Чүнки худайсызларың җемагаты гысыр галар, парахорларың-да чадырларыны от алар.

³⁵ Олар хасратдан хамыла болуп, пислик догурярлар, ичлери хем хиледен долудыр».