Eýýup 13 - Мукаддес Китап

13‑нҗи бап Эйюп сөзүни довам эдйәр

¹ «Буларың барыны гөзлерим гөрди, гулагым эшидип, дүшүндим.

² Сизиң билйәниңизи мен-де билйәрин, мен сизден кем дәлдирин.

³ Эмма мен Гудратыгүйчли билен геплешип, давамы Худай билен этмек ислейән.

⁴ Сиз болса ярамы ялан сөзлер билен беҗерйәңиз, барыңыз дерексиз лукмандырсыңыз.

⁵ Вах, сиз бүтинлей дымсадыңыз! Ана, шонда сиз пайхаслы болардыңыз!

⁶ Диңләң мениң делиллерими, гулак гоюң мениң чекишмелериме!

⁷ Худайың адындан нәхак сөзлери сөзлеҗекми? Хилели сөзлер айтҗакмы Онуң адына?

⁸ Сизми Худайың тарапыны тутҗак? Онуң үчин дава этҗек?

⁹ Худай сизи сынаса, сынагдан гечермикәңиз? Ынсаның ынсаны алдайшы ялы, Оны-да алдап билермикәңиз?

¹⁰ Худайың тарапыны гизлин тутсаңыз, Ол сизи хөкман җезаландырар.

¹¹ Онуң шан-шөхраты сизи эймендирип, горкусы үстүңизе абанмазмы?

¹² Накылларыңыз күл дей дерексиздир, делиллериңиз хич бир эсассыздыр.

¹³ Инди сиз дымың-да, маңа геплемәге гезек бериң, мен баша геленини гөрейин.

¹⁴ Теними дишим билен тике-тике эдип, җанымы өз элимде гояйын.

¹⁵ Ол мени өлдүрер, менде умыт ёк. Ёлларымың догрудыгыны Оңа субут эдерин.

¹⁶ Ине, шу мениң гутулышым болар, чүнки худайсызлар Онуң хузурына барып билмез.

¹⁷ Сөзлериме дыкгат билен гулак гоюң, айдянларым гулагыңызда галсын.

¹⁸ Мен давамы тайярладым, акланҗагымы билйәрин.

¹⁹ Ким мениң билен җедел этҗек? Шондан соң лал-җим болуп өлердим.

²⁰ Я Худай, мениң ики ислегими ерине етирәй, шонда мен Сенден гизленмерин:

²¹ Менден элиңи чек, мени Өз ховпуңдан азат эт.

²² Онсоң мени чагыр, мен-де җогап берейин, я-да мен гепләйин, Сен маңа җогап бер.

²³ Этмишлерим, гүнәлерим көпмүдир? Маңа языгымы, гүнәми гөркез.

²⁴ Нәме үчин менден йүзүңи гизләп, мени Өзүңе душман сайярсың?

²⁵ Елиң гачыран япрагыны эймендирҗекми? Гуры саманы ковалаҗакмы?

²⁶ Маңа гаршы аҗы айыпламалар язярсың, яшлыкдакы этмишлерими мирас берйәрсиң.

²⁷ Аякларыма күнде урярсың, хер бир әдимими гаравуллап, аяк ызларыма ченли барлаярсың.

²⁸ Ынсан бир чүйрән зат, гүе деген эшик кимин даргаяр».