Eýýup 12 - Мукаддес Китап

12‑нҗи бап Эйюп Сопара җогап берйәр

¹ Эйюп шейле дийди:

² «Сиз бар зады билйәнсиңиз, сиз өлениңизде, пайхас-да сиз билен өлер!

³ Мениң-де акылым сизиңки ялы, мен-де сизден кем дәлдирин, бу затлары билмейән бармы?

⁴ Өз достларыма гүлки болдум! Худайы чагырдым, Ол-да маңа җогап берди, догручыл, пәк болсам-да, мен иле гүлки!

⁵ Дертсизлер бетбагтларың үстүнден гүлйәрлер, бүдрейәнлери итип гойберйәрлер.

⁶ Гаракчыларың чадырлары асуда, Худайы газапландырянлар ховпсуз, олар диңе өз гүйҗүне сыгыняндыр.

⁷ Хайванлардан сора, олар саңа өвредерлер, гушлардан сора, олар саңа айдып берерлер.

⁸ Ерден сора, саңа өвредер ол, деңзиң балыклары саңа айдып берерлер.

⁹ Муны Реббиң элиниң эдендигини буларың хайсысы билйән дәлдир?

¹⁰ Хер бир җандарың җаны, бүтин адамзадың деми Онуң элиндедир.

¹¹ Агзың тагамы дадышы дей, гулагам сөзлери селҗермезми?

¹² Пайхас гаррыларда, дүшүнҗе узак өмүрдедир.

¹³ Пайхасам, гудратам Худайдадыр, өвүт-де, даналык-да Онуңкыдыр.

¹⁴ Худайың йыканыны хич ким дикелдип билмез, Онуң габаныны хич ким бошадып билмез.

¹⁵ Худай сувлары тогтатса, бар зат гураяр, иберсе-де, дүнйәни сил аляр.

¹⁶ Гудратам, пайхасам Онуңкыдыр, алдан-да, алданан-да Онуңкыдыр.

¹⁷ Ол хөкүмдарлары кемсидип, казылары акмаклара өвүрйәр.

¹⁸ Ол шаларың гушагыны говшадып, биллерине йүп баглаяр.

¹⁹ Руханылары кемсидип, гүйчлүлери агдаряр.

²⁰ Ынамлы маслахатчылары дымдырып, яшулулары акылындан махрум эдйәр.

²¹ Шазадалары иле рысва эдйәр Ол, гүйчлүлери ярагсызландыряр.

²² Гараңкылык җүммүшиниң сырларыны ачяр, түм гараңкылыгы ягтылыга өвүрйәр.

²³ Миллетлери бейгелдип, ызысүре ёк эдйәр, миллетлери артдырып, олары сүргүн эдйәр.

²⁴ Баштутанлары акылындан азашдырып, ёлсуз чөлде ыкдырян-да Олдур.

²⁵ Олар гараңкыда ышыксыз сермелешип йөрйәрлер, олары серхош кимин энтиредйәр».