Eýýup 11 - Мукаддес Китап

11‑нҗи бап Сопар Эйюба җогап берйәр

¹ Нагамлы Сопар шейле дийди:

² «Көп сөзе җогап берилмесинми? Яңраны сөзлери акласынмы?

³ Яңралыгың бейлекилери дымдырар өйдйәңми? Масгараланыңда, өзүңем утандырылмазмыкаң?

⁴ Чүнки сен: „Таглыматым сапдыр, мен Худайың назарында пәкдирин“ диййәң.

⁵ Кәшгә инди Худай геплеседи, саңа гаршы дил ярсады.

⁶ Ол саңа пайхасың сырларыны дүшүндирседи! Чүнки пайхас көптараплыдыр. Сен билгин, Худай этмишлериңиң кәсини унутды.

⁷ Худайың сырларына акыл етирип билермиң? Гудратыгүйчлиниң аңры чәгине етип билермиң?

⁸ Олар гөкденем бейикдир, сен нәме эдип билйәң? Өлүлер дүнйәсинденем чуңдур, сен нәме билйәң?

⁹ Оларың өлчеги әлемден узын, деңизден гиңдир.

¹⁰ Эгер Ол гелип, сени зындана атса, хөкүм этмек үчин чагырса, ким Оны саклап билер?

¹¹ Чүнки Ол яланчылары билйәндир, Ол пислиги гөрүбем, оңа үнс бермезми?

¹² Гуландан ынсаның догулмайшы ялы, акмагың-да акылы гоялмаз.

¹³ Йүрегиңи Оңа багышлап, эллериңи Худая тарап узатсаң,

¹⁴ пис ишлериңи бес этсең, чадырыңда этмише орун бермесең,

¹⁵ шонда сен уятлы башыңы галдырарсың, берк дурарсың, горкмарсың.

¹⁶ Мушакгатыңы унударсың, акып гиден сувлар дек ятларсың оны.

¹⁷ Гүнорта чагынданам ягты болар өмрүң, сәхер дей болар гараңкылыгың.

¹⁸ Умытлыдыгың үчин аркайын боларсың, гораларсың, ховпсузлыкда дынч аларсың.

¹⁹ Ятаныңда сени горкузан болмаз, көплер саңа яранҗаңлык эдерлер.

²⁰ Эмма пислер умытдан эл үзерлер, гачара ерлери болмаз оларың, умыт учгунлары сөнер».