Eýýup 10 - Мукаддес Китап

10-нҗы бап Эйюп сөзүни довам эдйәр

¹ «Дурмушымы йигренйәрин, эркинлик билен арз эдерин, аҗы хасратдан гепләрин.

² Худая диерин: „Маңа хөкүм этме, мени нәмеде гүнәкәрлейәниңи айт“.

³ Мени эзмек, Өз элиң ишини рет этмек, пислериң дилдүвшүгини голдамак Саңа говумы?

⁴ Эйсем Сениң гөзлериң ынсан гөзлерими? Ынсаның гөрши дек гөрйәңми?

⁵ Гүнлериң ынсаның гүнлери ялы дәлдир, ынсаның йыллары ялы дәлдир йылларың,

⁶ Шонда-да этмиш агтарярсың, гүнә гөзлейәрсиң менден.

⁷ Языксыздыгымы, элиңден хич кимиң халас этмеҗекдигини билйәң.

⁸ Эллериң маңа бичим берди, мени яратды, инди болса мени хеләк этмекчи боляң.

⁹ Ядыңа сал! Сен мени топракдан яратдың, инди ене-де топрага өвүрҗекми мени?

¹⁰ Мени сүйт кимин дөкмәнмидиң? Пейнир кимин гаталтманмыдың?

¹¹ Мени сүңклер ве сиңирлер билен бирлешдирдиң, эт хем дери билен өртдүң.

¹² Маңа яшайыш бердиң, мерхемет этдиң, аладаң җанымы горап саклады.

¹³ Эмма булары йүрегиңде гизледиң, хыялыңда шейле затларың бардыгыны билйәрин.

¹⁴ Гүнә этсем, гөз астыңда саклаярсың, этмишими җезасыз гоймаярсың.

¹⁵ Гүнәли болсам, дат гүнүме! Бигүнә болсам-да, башымы ерден галдырып билемок, чүнки уяда галан мен, агырдыр дердим.

¹⁶ Шир кимин топуляң галдырсам башым, гудратларыңы маңа гаршы уланярсың.

¹⁷ Тәзеден маңа хүҗүм эдйәрсиң, маңа болан гахар-газабың мөвч аляр, гаршыма гошун үстүне гошун гетирйәң.

¹⁸ Нәме үчин мени ягты яланча индердиң? Вах, хич ким гөрмәнкә өлен болсадым.

¹⁹ Кәшгә дүнйә асла инмедик болсадым, эҗемиң гөвресинден гөни габра ташланардым.

²⁰ Гүнлерим гысгадыр, мени өз гүнүме гой!

^21-22 Гараңкы, түм гараңкы дүнйә, зулматдан, түмлүкден долы дүнйә. Ягтылыгы гараңкылык ялы болан дияра гитмезимден өң, гой, бираз ынҗалык тапайын өзүме».