Еврейлер 9 - Мукаддес Китап

9-нҗы бап Сежде этмегиң көне дүзгүнлери

¹ Биринҗи әхт дөврүнде сежде этмегиң када-канунлары ве дүнъеви Мукаддес чадыр барды.

² Ики отагдан ыбарат болан бир чадыр гурлупды, онуң дашкы отагына Мукаддес отаг дийилйәрди. Ол ерде чырадан, хантагта барды ве хантагтаның үстүнде хөдүр чөреклер гойланды.

³ Чадырың ички тутусының аңырсында Иң мукаддес отаг дийлип атландырылян ене бир отаг барды.

⁴ Бу отагда якымлы ыслы түтетги сыпасы ве Әхт сандыгы барды. Оларың икиси хем сап алтындан ясаланды. Әхт сандыгында ичи маннадан долы алтын голча, Харуның гүллән хасасы, табшырыклар язылан ики даш бөлеги барды.

⁵ Сандыгың гапагының үстүнде шан-шөхрата бесленен керуплар барды. Бу керуплар ганатлары билен гапага көлеге салярдылар. Эмма хәзир булар барада җикме-җик гүррүң этмегиң вагты дәл.

⁶ Әхли зат шунуң ялы гурналандан соң, руханылар хер гүн чадырың дашкы отагына гирип, өз борчларыны ерине етирйәрдилер.

⁷ Эмма чадырың ички отагына йылда бир гезек диңе баш руханы гирйәрди. Ол өзи үчин ве халкың билмезликден эден гүнәлери үчин хөдүрлемәге яны билен хемише гурбанлык ганыны алмалыды.

⁸ Бу дүзгүнлер аркалы Мукаддес Рух шуны гөркезйәр: ердәки Мукаддес чадырда ерине етирилйән парзлар бес эдилмесе, гөкдәки Иң мукаддес отага асла гирип болмаз.

⁹ Мукаддес чадыр ве онуң парзлары хәзирки заман үчин бир нышандыр. Бу хөдүрленйән садакалар ве гурбанлыклар сежде эдйән адамың выжданыны пәкләп билмейәндигини гөркезйәр.

¹⁰ Муңа диңе беден билен баглы болан ийип-ичмек ве дүрли пәклениш парзлары гирйәр. Буларың хеммеси тәзе дүзгүн орнашдырылянча ерине етирилйәрди.

Сежде этмегиң тәзе дүзгүнлери

¹¹ Месих инди амала ашан әхли оңат затларың Баш Руханысы болуп гелди. Ол ынсан эли билен гурулмадык, бу дүнйәниң ярадылышындан болмадык хас бейик ве кәмил чадыра гирди.

¹² Ол Иң мукаддес отага эркечлериң, гөлелериң ганы билен дәл-де, Өз ганы билен гирип, бир гезекде бизиң бакы азатлыгымызы газанды.

¹³ Өңлер эркечлериң ве өкүзлериң ганыны хем-де якылан гөләниң күлүни мурдар адамларың үстүне сепип, олары тәмизләрдилер.

¹⁴ Эгер шейле эден болсалар, онда Месихиң ганы аркалы хас-да бейик ишлер эдип болар! Шейдип, Месих эбеди Рухуң гудраты аркалы Өзүни мүйнсүз гурбанлык хөкмүнде Худая хөдүрледи. Онуң дөкен ганы бизиң выжданымызы өлүме элтйән ишлерден пәклейәр, шонда биз дири Худая гуллук эдйәрис.

¹⁵ Шу себәпли хем чагырыланлары Худайың вада эден эбеди мирасына говшурмак үчин, Иса Месих тәзе әхтиң Бинятчысы болды. Олары овалкы әхт дөврүнде эден гүнәлериниң җезасындан азат этмек үчин Ол гурбан болды.

¹⁶ Вада боюнча хайсыдыр бир весъетнама бар болса, онда весъетчиниң өлендигини субут этмек герек.

¹⁷ Себәби весъетнама диңе весъетчиниң өлүминден соңра гүйҗе гирйәндир. Весъетчи дирикә, весъетнаманың асла гүйҗи ёкдур.

¹⁸ Шоңа гөрә өңки әхт хем ган дөкүлйәнчә гүйҗе гирмеди.

¹⁹ Муса Кануның әхли буйругыны тутуш халка ыглан этди. Соңра гырмызы йүң хем бир богдак кәкилик оты билен гөлелериң ганыны ве сувы Канун язгыларының, әхли халкың үстүне сепип:

²⁰ «Бу Худайың сизиң билен эден әхт ганыдыр» дийди.

²¹ Шонуң ялы хем, Муса чадырың ве сежде этмекде уланылян әхли затларың хем үстүне ган сеперди.

²² Хакыкатданам, әхли зат Мукаддес Канун боюнча ган билен пәкленйәр. Ган дөкүлмезден хич бир гүнә багышланмаяр.

²³ Шейлеликде, гөкдәки затларың ердәки нусгаларының бу гурбанлыклар билен пәкленмеги герекди. Эмма гөкдәки затларың өзлери булардан хас оңат гурбанлыклары талап эдйәрди.

²⁴ Месих ынсан эли билен ясалан ве асыл нусганың йөне бир гөрнүши болан иң мукаддес отага гирмеди. Ол бизиң үчин Худайың хузурында хәзир болуп, гөкдәки мукаддес отага гирди.

²⁵ Баш руханы иң мукаддес отага хер йыл гирип, гурбанлык җанлысының ганыны хөдүр эдйәрди, эмма Месих гөге гирмек үчин Өзүни өвран-өвран гурбан этмеди.

²⁶ Бейле болса, Месих дүнйә ярадылалы бәри өвран-өвран эҗир чекмели боларды. Муңа дерек Ол адамларың гүнәлерини ювмак үчин Өзүни гурбан этмек билен ахыркы дөвүрде бир гезек гелди.

²⁷ Ынсаның такдырында бир гезек өлүм бардыр, ондан соң Худайың өңүнде хасап бермелидир.

²⁸ Эдил шонуң ялы, Месих хем көп адамларың гүнәлерини ювмак үчин, бир гезекде гурбан болды. Эмма Ол икинҗи гезек геленде, гүнәлери ювмак үчин дәл-де, эйсем Өзүне интизарлык билен гарашянлары халас этмек үчин гелер.