Еврейлер 8 - Мукаддес Китап

8‑нҗи бап Иса – тәзе әхтиң Бинятчысы

¹ Айдянларымызың дүйп манысы шундадыр: гөкде бейик Худайың сагында отуран Баш Руханымыз бардыр.

² Ол Мукаддес чадырда, ынсаның дәл-де, хут Реббиң гуран хакыкы чадырында хызмат эдйәр.

³ Хер бир баш руханы садакалар хем гурбанлыклар хөдүрлемек үчин белленилйәр. Шу себәпден бизиң Баш Руханымызың хем гурбанлык хөдүрлемеги герекди.

⁴ Эгер Ол гөкде дәл-де, ерде болсады, аслында руханы хем болмазды. Себәби Мукаддес Канун боюнча садакалары хөдүрлейән руханылар эййәм барды.

⁵ Олар ердәки Мукаддес чадырда хызмат эдйәрлер. Бу чадыр бары-ёгы гөкдәки хакыкы Чадырың гөрнүши ве көлегесидир. Шонуң үчин хем Худай Мукаддес чадыры нәхили ясамалыдыгы барада Муса шейле гөркезме берипди: «Әхли зады дагда өзүңе гөркезилен нусганың эсасында ясарсың».

⁶ Эмма Иса берлен руханылык хызматы бейлеки руханыларыңкыдан бейикдир. Шейле хем Ол тәзе әхтиң Бинятчысыдыр, тәзе әхт өңки әхтден үстүндир ве ыгтыбарлы вадалара эсасланандыр.

⁷ Эгер өңки әхт кемчиликсиз болан болсады, онда бу тәзе әхт герек болмазды.

⁸ Эмма Худайың Өзи ол әхтден кемчилик тапып, халкына шейле дийди: «Ысрайыл ве яхуда халкы билен Мениң тәзе әхт баглашҗак гүнлерим хөкман гелер. Муны Реб айдяндыр.

⁹ Бу әхт Мениң оларың ата-бабаларының эллеринден тутуп, Мүсүрден чыкаран гүнүм баглашан әхтим ялы дәлдир. Олар Мениң шол әхтиме садык болмадылар, шонуң үчин Мен олардан йүз өвүрдим. Муны Реб айдяндыр.

¹⁰ Ине, ол гүнлерден соң Мениң ысрайыл халкы билен баглашҗак әхтим шудур: Мен канунымы оларың аңына салып, йүреклерине язарын. Мен оларың Худайы боларын, олар-да Мениң халкым болар. Муны Реб айдяндыр.

¹¹ Мундан бейләк хич ким бири-бирине я-да доганына „Ребби танаң!“ дийип өвретмез, себәби оларың улудан-кичә хеммеси Мени танар.

¹² Мен оларың этмишлерини багышларын, инди гүнәлерини ятламарын».

¹³ Худай бу әхте «Тәзе» диймек билен, өңки әхтиң көнелендигини гөркезди. Көнелип, сандан галан зат болса, тизара ёк болуп гидйәндир.