Еврейлер 7 - Мукаддес Китап

7‑нҗи бап Мәликсадык руханы

¹ Мәликсадык Салим патышасыды ве Бейик Худайың руханысыды. Ыбрайым дөрт патышаны еңип, ызына доланып гелйәркә, Мәликсадык оны гаршы алып, оңа пата берди.

² Ыбрайым хем Мәликсадыга әхли алан олҗасының ондан бирини берди. Мәликсадыгың ады «адалат патышасы» диймеги аңладяр. Мундан башга-да, ол «парахатлык патышасыдыр», себәби «Салим» бу «парахатлык» диймеги аңладяр.

³ Онуң эне-атасының кимдиги белли дәл, несил дарагты-да ёк. Өмрүниң не башы, не-де ахыры бар. Ол Худайың Оглы ялы хемишелик руханы болуп галар.

⁴ Середиң, Мәликсадык нәхили бейик экен, хатда атамыз Ыбрайым хем олҗасының ондан бирини оңа берипдир!

⁵ Бүтин халк, хатда Ыбрайымың неслинден боланлар-да Мукаддес Кануна гөрә өз газанчларының ондан бирини диңе леви тиресинден болан руханы доганлара бермелидилер.

⁶ Эмма Мәликсадык леви неслинден болмаса-да, Худайың вадаларыны алан Ыбрайымдан ондан бир садаканы алып, оңа пата берди.

⁷ Кичиниң өзүнден бейик адамдан пата аляндыгы шүбхесиздир.

⁸ Халкдан ондан бир йыгнан руханылар арадан чыкдылар, эмма Ыбрайымдан ондан бир алан Мәликсадык хенизем яшаяр.

⁹ Хатда шейле дийип билйәрис, халкдан ондан бир йыгнан Левиниң өзи хем Мәликсадыга Ыбрайым аркалы бу садаканы берипдир.

¹⁰ Себәби Мәликсадык Ыбрайымы гаршылан махалы Леви энтек ата-бабасының билиндеди.

Тәзе руханылык дүзгүни

¹¹ Шейлеликде, эгер кәмиллиге леви руханылыгы аркалы етилйән болса, онда башга бир руханының гелмеги нәмә герекди? Мукаддес Кануна гөрә, леви тиреси руханылык этмелиди, эмма бу руханылык аркалы хич ким кәмил болуп билмейәрди. Шонуң үчин хем Харун ялы дәл-де, Мәликсадык ялы руханының гелмеги герекди.

¹² Руханылык үйтгесе, Канун хем үйтгемелидир.

¹³ Бизиң гүррүңини эдйән кишимиз леви тиресинден дәл. Онуң тиресинден хич ким гурбанлык сыпасында хызмат этмәндир.

¹⁴ Реббимиз Исаның яхуда тиресиндендиги хеммелере мәлимдир ве Муса бу тиреден руханыларың боландыгы барада хич бир сөз айтмандыр.

Исаның руханылыгы соңсуздыр

¹⁵ Инди Мәликсадык ялы башга бир руханының гелмеги бу айданларымызың әхлисини өңкүден хем хас айдың гөркезйәр.

¹⁶ Онуң руханылыгы бу паны дүнйәниң талабына, ягны несилден-несле гечйән када-кануна дәл-де, эйсем Мәликсадык руханылыгы ялы соңсуз яшайыш гудратына эсасланандыр.

¹⁷ Чүнки мезмурчы Ол хакда шейле язды: «Сен Мәликсадык дереҗесиндәки мүдимилик руханысың».

¹⁸ Хава, өңки када-канунлар говшакдыгы хем пейдасыздыгы зерарлы ятырылды.

¹⁹ Чүнки канун хич бир зады кәмиллешдирмеди. Инди мунуң дерегине бизи Худая якынлашдырян хас оңат бир умыт берилди.

²⁰ Шейле хем Месихиң Баш Руханы болҗакдыгына Худай ант ичди, эмма бейлеки руханылар барада ант ичмеди.

²¹ Худайың Оңа: «Реб ант ичди, Ол ондан дәнмез. Сен мүдимилик руханысың» диен анты аркалы руханы болды.

²² Бу ант аркалы Иса хас оңат әхтиң кепили болды.

²³ Шейле хем өлүм руханыларың ишини тогтатяндыгы үчин, оларың саны көпди.

²⁴ Эмма Исаның бакы яшаяндыгы үчин, Онуң руханылыгы соңсуздыр.

²⁵ Шейлеликде, Иса Өзи аркалы Худая гелйәнлери эбедилик халас этмеги башаряндыр. Чүнки Иса Месих олар үчин хемише Худая төвелла эдйәр.

²⁶ Бизе хут шунуң ялы – мукаддес, языксыз ве пәк Баш Руханы герекди. Ол гүнәлилерден айрылып, гөклерден хем ёкары гөтерилендир.

²⁷ Өңки руханылар хер гүн илки өз гүнәлери, соңра халкың гүнәлери үчин гурбанлык хөдүрлемелидилер. Эмма Иса оларыңкы ялы этмегиң гереги ёк, себәби Ол әхли зат үчин Өзүни бир гезекде гурбан эдип, бу иши битирди.

²⁸ Мукаддес Кануна гөрә баш руханылыга йөнекей ынсанлар белленилйәрди, эмма Канундан соңра Худай ант ичип, муңа Оглуны белледи. Ол кәмил эдилен мүдимилик Баш Руханыдыр.