Еврейлер 5 - Мукаддес Китап

5‑нҗи бап

¹ Хер бир баш руханы ынсанлар арасындан сайланяр. Ол Худайың хузурында халка векилчилик этмек үчин белленилип, гүнәлер үчин Худая садакалар ве гурбанлыклар хөдүрлейәр.

² Баш руханы наданлара, ёлдан азашанлара юмшак дарашмагы башаряр, себәби өзүнде хем ынсан кемчиликлери бар.

³ Шу себәпден ол халкың-да, өзүниң-де гүнәлери үчин гурбанлык бермәге борчлудыр.

⁴ Хич ким баш руханы болмак хорматыны өзи газанып билмез, ол Харун ялы, Худай тарапындан чагырыляр.

⁵ Шонуң үчин Месих хем Баш Руханы болмак үчин Өзүни Өзи шөхратландырмады. Терсине, Оны: «Сен Мениң Оглумсың, бу гүн Мен Саңа Ата болдум» дийип айдан Худай шөхратландырды.

⁶ Башга бир ерде болса: «Сен Мәликсадык дереҗесиндәки мүдимилик руханысың» дийип айдяр.

⁷ Месих бу дүнйәде яшан вагтында гөзяш дөкүп, Өзүни өлүмден халас этмеги башарян Худая дога-дилеглер хем ялбарышлар билен перят этди. Ол Худайдан хедер эдендиги үчин, Онуң хайышы хасыл болды.

⁸ Ол Огул хем болса, гөрги гөрүп, табын болмаклыгы өвренди.

⁹ Шейлеликде, Худай аркалы Иса Месих кәмил болуп, Ол Өзүне табын болянларың хеммесини эбедилик халас этмеги башаряр.

¹⁰ Шейле хем, Худай Оны Мәликсадык дереҗесиндәки Баш Руханы дийип ыглан этди.

Иманда беркәлиң

¹¹ Бу барада айтҗак гүррүңимиз көп, эмма эшитмәге ислегиңизиң ёкдугы себәпли, муны сизе дүшүндирмек кын.

¹² Хакыкатдан-да, сиз шу вагта ченли өзүңиз башгалара өвретмелидиңиз ахыры! Гайтам, сиз башгалара дәл-де, башгалар сизе Худайың таглыматының илкинҗи эсасларыны өвретмеклерине мәтәч. Сизе гаты иймит дәл-де, хенизем сүйт герек!

¹³ Сүйт билен иймитленйән агзындан сүйт ысы гитмедикдир. Ол ягшы-яманы хениз сайгарян дәлдир.

¹⁴ Гаты иймит болса, кемала геленлер үчиндир. Олар өз гүнделик теҗрибесинден өвренип, ягшы билен яманы сайгарып билйәндирлер.