Еврейлер 13 - Мукаддес Китап

13‑нҗи бап Соңкы өвүт-несихатлар

¹ Бири-бириңизи доганлык сөйгүси билен сөйүп яшаң!

² Мыхмансөер болуң. Чүнки мыхмансөер адамларың кәбири перишделериң кимдигини билмезден олары мыхман алдылар.

³ Туссагдакы доганларыңызы унутмаң, өзүңиз хем шолар билен туссагда болян кимин, олары ятлап дуруң. Хорлук чекйәнлери унутмаң, өзүңизи оларың орнуна гоюп гөрүң.

⁴ Гой, хеммелер ника хормат гойсун, әр-аял дүшеги гүнә билен хапаланмасын. Худай ахлаксызлары ве зынахорлары хөкүм эдер.

⁵ Пулуң ышкына дүшмәң. Элиңиздәки барына канагат эдиң. Себәби Худай: «Мен сизи хич вагт еке ташламарын, терк этмерин» дийди.

⁶ Шоңа гөрә-де, биз ынам билен шейле диййәрис: «Реб – тарапдарым, мен горкмаярын, ынсан маңа нәме эдип билсин?».

⁷ Худайың сөзүни сизе етирен ёлбашчыларыңызы яда салың. Оларың нәхили говы дурмушда яшап гечендиги барада пикир эдиң. Оларың садыклыгындан гөрелде алың.

⁸ Иса Месих дүйн хем, бу гүн хем, эбедилик Шолдур, Ол үйтгемейәндир.

⁹ Хер хили кесеки таглыматлара көңүл берип, ёлуңызы урдурмаң. Калбыңызың ийип-ичмек адатларындан дәл-де, Худайың мерхеметинден беркемеги оңатдыр. Себәби ийип-ичмек адатларына эерйәнлер мундан хич хили хайыр гөрен дәлдир.

¹⁰ Бизиң бир гурбанлык сыпамыз бардыр, йөне Мукаддес чадырда хызмат эдйән руханыларың ондан иймәге хакы ёкдур.

¹¹ Гурбанлык малларының ганыны баш руханы Иң мукаддес отага гетирип, гүнә үчин хөдүрлейәр, эмма оларың маслыгы дүшелгеден дашарда якыляр.

¹² Шоңа гөрә, Иса хем шәхер дервезесинден дашарда эҗир чекип өлди. Ол халкыны Өз ганы билен пәкледи.

¹³ Гелиң, бизем Онуң чыдан кемсидилмелерине чыдап, дүшелгеден дашары – Онуң янына гиделиң,

¹⁴ чүнки бизиң бу ерде бакы шәхеримиз ёкдур, биз гелҗекки бакы шәхере гарашярыс.

¹⁵ Шонуң үчин хем Иса аркалы Худая гурбанлык хөкмүнде хемише өвги багыш эделиң. Онуң адына алкыш айдалың!

¹⁶ Ягшылык этмеги ве элде барыңызы бейлекилере эчилмеги унутмаң, себәби шунуң ялы садакалар Худая яраяндыр.

¹⁷ Ёлбашчыларыңызың сөзүне гулак асың, олара табын болуң. Олар сизиң җаныңыз үчин Худая хасабат берерлер. Оларың сөзүне гулак асың, себәби олар сизе гөзегчилик эдйәндирлер. Гой, олар борчларыны шатлык билен ерине етирсинлер, гайгы-хасрат чекмесинлер, ёгсам, мунуң сизе пейдасы дегмез.

¹⁸ Бизиң үчин Худая дилег эдиң. Биз выжданымызың арассадыгына ынанярыс ве хемме тарапдан хемише хормата мынасып болуп яшамак ислейәрис.

¹⁹ Яныңыза басым доланып бармагым үчин дилег этмегиңизи айратын хайыш эдйәрин.

^20-21 Ислегини амала ашырмагымыз үчин, гой, парахатлык берйән Худай бизи әхли герекли затлар билен үпҗүн этсин. Ол Реббимиз Исаны эбедилик әхт баглашян ганы аркалы өлүмден дирелтди ве Оны Өз халкының бейик Чопаны эдип белледи. Гой, Худай Өзүни хошнут эдйән ишлери этмегимиз үчин, Иса Месих аркалы бизи кәмиллешдирсин. Иса Месихе бакы шан-шөхрат болсун! Омын.

²² Эй, доганлар, сизе язан бу гысга хатымдакы өвүт-үндевлерими чын йүрекден кабул этмегиңизи хайыш эдйәрин.

²³ Доганымыз Тимотеосың туссаглыкдан бошандыгындан хабарлы болмагыңызы ислейәрин. Яныма гелен бадына, сизи гөрмәге өзүм билен биле оны хем алып барарын.

²⁴ Әхли ёлбашчыларыңыза ве Худайың тутуш халкына салам айдың. Италиялы доганлар сизе салам ёллаярлар.

²⁵ Хеммәңизе Худайың мерхемети яр болсун!