Еврейлер 11 - Мукаддес Китап

11‑нҗи бап Иман нәме?

¹ Иман умыт эдйән затларымыза бил багламак ве гөрмейән затларымыза ынанмакдыр.

² Ата-бабаларымыз иман аркалы Худайы хошнут этдилер.

³ Биз әлем-җаханың Худайың буйругы билен ярадыландыгына, шейле хем, гөрүнйән затларың гөрүнмейән затлардан дөрәндигине иман аркалы дүшүнйәрис.

⁴ Хабыл иман аркалы Худая Кабылдан хас говы садака хөдүрледи. Худай Хабылың садакасындан хошал болуп, оны иманы аркалы догручыл адам сайды. Хабыл өлен хем болса, иман аркалы хәзирем геплейәр.

⁵ Иман аркалы Ханок ёкары алынды, ол өлүм гарасыны гөрмеди. Хич ким оны тапып билмеди, себәби Худай оны ёкары алды. Ханок ёкары алынмазындан өңем Худайың гөвнүнден турупды.

⁶ Иман этмейән адам хич вагт Худайы хошнут эдип билмез. Худая якынлашан адам Онуң барлыгына ве Өзүни агтарянлары сылаглаҗакдыгына ынанмалыдыр.

⁷ Нух ичерсиндәкилериң халас болмагы үчин иман аркалы бир гәми ясады. Ол хениз болмадык вакалар хакда Худайдан дуйдурыш аланда, Ондан горкуп, Оңа гулак асды. Шейлеликде, бүтин дүнйә җеза сезевар болды, Нух болса иманы аркалы акланды.

⁸ Мүлк эдип берен юрдуна ибермек үчин Худай Ыбрайымы чагыранда, ол иман аркалы Оңа табын болды, нирә баряндыгыны билмезден ёла дүшди.

⁹ Иман аркалы ол Худайың вада берен юрдунда гелмишек болуп орнашды. Ысхак билен Якуп хем Ыбрайым ялы бу ят юртда чадырда яшадылар, себәби оларам Худайың берен шу вадасының мирасдарларыды.

¹⁰ Чүнки Ыбрайым Худай тарапындан бина эдилйән ве гурулян берк бинятлы шәхере гарашярды.

¹¹ Өзүниң гаррандыгына ве аялы Сараның өнелгесиздигине гарамаздан, Ыбрайым иман аркалы перзент гөрди. Себәби ол вада берен Худайың садыкдыгына ынанды.

¹² Шейлеликде, яшы бирчене баран бу бир адамдан гөкдәки йылдызлар дей ве деңиз кенарындакы чәгелер дей сан-саҗаксыз несил дөреди.

¹³ Бу адамларың хеммеси иң соңкы демине ченли Худая иман эдип яшадылар. Олар вада эдилен юрда говушмасалар-да, ол ери узакдан гөрүп шатландылар. Өзлериниң ер йүзүнде гелмишек хем ятдыкларыны боюн алдылар.

¹⁴ Гелмишекдиклерини боюн алян адамлар өзлериниң бир ватан агтаряндыкларыны айдың гөркезйәрлер.

¹⁵ Эгер олар чыкып гайдан юртларыны күйсейән болсадылар, онда ызларына доланмагың алаҗыны тапардылар.

¹⁶ Эмма олар хас говусыны, ягны гөкдәки ватаны арзув эдйәрдилер. Шонуң үчин Худай Өзүни оларың Худайы дийип атландырмакдан утанмаяр. Худай хатда олар үчин бир шәхер тайынлады.

^17-18 Худай Ыбрайымы сынанда, Ыбрайым иман аркалы Ысхагы гурбанлык хөкмүнде хөдүрледи. Худай оңа: «Сениң адың Ысхагың несли аркалы довам эдер» дийип вада берен хем болса, Ыбрайым шол ялңыз оглуны гурбанлык этмәге тайярды.

¹⁹ Ыбрайым Худайың өлүлери дирелтмеги башаряндыгына ынанярды. Шоңа гөрә-де, ол Ысхагы дири гайдып алды.

²⁰ Иман аркалы Ысхак хем болҗак затлар хакда Якуп билен Ысава пата берди.

²¹ Якуп бу дүнйәден өтмели пурсады геленде, хасасына сөенип, Юсубың ики оглуна иман аркалы пата берди ве Худая сежде этди.

²² Юсуп хем өлүм яссыгында ятырка, ысрайыл халкының Мүсүрден чыкҗакдыгыны айдып, өз җеседи барада иман аркалы буйрук берди.

²³ Муса догланда, ата-энеси оны иман аркалы үч ай гизләп саклады. Олар огланың үйтгешикдигини гөрүп, патышаның перманындан горкмадылар.

²⁴ Улалып, кемала геленде, Муса иман аркалы фараоның гызының оглы дийлип таналмакдан боюн гачырды.

²⁵ Ол гүнә газанып, вагтлайын леззетли дурмушда яшандан, Худайың халкы билен биле хорлук чекмеги өзүне рова гөрди.

²⁶ Муса Месихиң угрунда кемсидилмелерини Мүсүриң хазыналарындан хас улы байлык сайды, себәби ол өзүниң алҗак бейик сылагына умыт баглаярды.

²⁷ Ол патышаның газабындан горкман, иман аркалы Мүсүри терк этди. Гөзе Гөрүнмейәни гөрени үчин сайлан ёлунда берк дурды.

²⁸ Муса иман аркалы Песах гурбанлык җанлысыны өлдүрмеги ве оларың ганыны гапының сөелерине чалмагы буюрды. Ол муны ысрайыл халкының новбахар огулларына Өлүм перишдесиниң эл дегирмезлиги үчин этди.

²⁹ Иман аркалы ысрайыллар Гызыл деңизден гуры ерден гечйән дек гечдилер. Мүсүрлилер хем гечмәге сынанышып, гарк болдулар.

³⁰ Ысрайыл халкы еди гүнләп Ерихоның дашындан айланандан соң, иман аркалы диварлар йыкылды.

³¹ Иманы аркалы лолы Рахап хеләк болмады. Ол ысрайыл ичалыларыны достлуклы гаршыландыгы үчин, Худая табын болмадыклар билен биле өлдүрилмеди.

³² Башга ене нәме айдайын? Гидегон, Барак, Шимшон, Ефтах хакда, Давут, Шамувел ве бейлеки пыгамберлер хакда гүррүң бермәге вагтым ёк.

³³ Иман аркалы олар энчеме патышалыгы еңдилер, юрды адалатлы доландырдылар, вадалара етдилер, арсланларың агзыны багладылар,

³⁴ ловлаян оды өчүрдилер, гылыҗың тыгындан гачып гутулдылар, эҗиз болсалар хем гүйчден долдулар, сөвешде кувватланып, кесеки гошунлары дерби-дагын этдилер.

³⁵ Аяллар өлен якынларыны дирелен халда ызына алдылар. Кәбирлери болса дирелишден соң хас оңат яшайша говушмак үчин, азат болмакдан йүз өврүп, җебир-сүтеме дөз гелдилер.

³⁶ Башга бирилери кемсидилмелере сезевар эдилип гамчыландылар, зынҗырлар билен багланып, зындана ташландылар.

³⁷ Оларың кәбирини дашладылар, беденлерини кесип, икә бөлдүлер, гылычдан гечирип өлдүрдилер. Кәбирилер гоюн ве гечи дерисини гейип, сергезданчылык этдилер, мәтәчликде яшадылар, зулум астында ызарланып, хорлук чекдилер.

³⁸ Дүнйә олара лайык дәлди. Олар чөллерде, дагларда энтедилер, говакларда, көвеклерде гизлендилер.

³⁹ Оларың хеммеси иман аркалы Худайың өвгүсини газанан хем болсалар, оларың хич бири Худайың вадасына говушмады.

⁴⁰ Себәби Худай бизиң үчин хас оңат бир зады тайынлапды. Ол Өзүне садык болан бу адамларың бизиң билен бирликде кәмил болмагыны иследи.