Еврейлер 10 - Мукаддес Китап

10-нҗы бап Иң соңкы гурбанлык

¹ Мусаның кануны гелҗекки оңат затларың өзи дәл-де, шол затларың көлегесидир. Шу себәпли Канун хер йыл үзнүксиз хөдүрленен шол бир гурбанлыклар билен Худая сыгынянлары хич хачан кәмил эдип билмейәр.

² Эгер кәмил эдип билйән болсады, онда гурбанлык хөдүрлемек бес эдилмезмиди? Чүнки сежде эдйәнлер гүнәден бир гезекде пәклененлеринден соң, оларың выжданы гүнәлериниң пәкленмегине гайдып мәтәч болмазды.

³ Эмма ол гурбанлыклар хер йыл ынсанлара гүнәлерини ятладярды.

⁴ Себәби өкүзлериң, эркечлериң ганы билен гүнәлери ювмак мүмкин дәлдир.

⁵ Шонуң үчин Месих дүнйә геленде, Худая шейле дийди: «Гурбанлык билен садаканы Сен ислемедиң; эмма Маңа бир беден тайынладың.

⁶ Якма гурбанлыгы, гүнә гурбанлыгы Сениң гөвнүңден турмады.

⁷ Шонда дийдим: „Ине, Мен! Китапда Мен барада язылгы. Эй, Худайым, ислегиңи берҗай этмәге, ине, Мен гелдим“».

⁸ Месих илки билен Кануның талап эдйән гурбанлыклары барада сөз ачып, Худая: «Сен гурбанлык билен садаканы ислемедиң, якма хем гүнә гурбанлыгы-да гөвнүңден турмады» дийди.

⁹ Соңра-да: «Ине, Мен, Сениң ислегиңи берҗай этмәге гелдим» дийди. Шейдип, Месих икинҗи кануны беркарар этмек үчин, биринҗини арадан айыряр.

¹⁰ Биз бу ислег боюнча, Иса Месихиң бедениниң әхли зат үчин бир гезекде гурбан эдилмеги аркалы мукаддес эдилдик.

¹¹ Хер бир руханы хер гүн аяк үстүнде дуруп, дини борчлары ерине етирйәрди ве шол бир гурбанлыклары өвран-өвран хөдүрлейәрди. Эмма бу гурбанлыклар хич вагт гүнәлери ювмагы башармаяр.

¹² Эмма Месих гүнәлери хемишелик ювян еке-тәк гурбанлыгы хөдүрләнден соң, Худайың сагында отурды.

¹³ Шондан бәри хем Ол душманларының аяк астына салынмагына гарашяр.

¹⁴ Себәби Ол мукаддес эдйәнлерини еке-тәк гурбанлык билен хемишелик кәмил этди.

¹⁵ Мукаддес Рух хем бизе бу хакда шаятлык эдйәр. Илки билен Реб шейле диййәр:

¹⁶ «Ол гүнлерден соң, Мениң олар билен баглашҗак әхтим шудур: Мен канунларымы оларың аңына салып, йүреклерине язарын».

¹⁷ Соңра Ол: «Мундан бейләк оларың гүнәлерини, языкларыны ятламарын» диййәр.

¹⁸ Диймек, Худай гүнәлери багышлан болса, мундан буяна гүнә гурбанлык хөдүрлемегиң гереги ёк.

Берк ынам билен Худая якынлашалың

¹⁹ Шонуң үчин хем, эй, доганлар, Исаның ганы аркалы инди биз Иң мукаддес отага батыргайлык билен гирип билйәрис.

²⁰ Иса Өз өлүми аркалы бизе чадырдакы ички тутудан гечйән ве Худая барян тәзе яшайыш ёлуны ачып берди.

²¹ Инди бизиң Худайың халкына җогапкәр бейик Руханымыз бардыр.

²² Шоңа гөрә, чын йүрекден ве берк ынам билен Худая якынлашалың. Месих калбымызы Өз ганы билен пәкләп, бизи выждан языгындан азат этди ве беденимизи арасса сув билен ювды.

²³ Инди ыкрар эден умыдымызы икирҗиңленмән берк саклалың, чүнки вада берен Худай ынамдардыр.

²⁴ Бири-биримизи сөймәге ве оңат ишлер этмәге хөвеслендирмек барада пикирленелиң.

²⁵ Кәбир адамларың эндик эдиши ялы, йыгнанышмагымызы гоймалың. Гайтам, Исаның гелҗек гүнүниң голайландыгыны билип, бири-биримизи хас-да рухландыралың.

²⁶ Эгер биз хакыкат билимини кабул эденимизден соңам билгешлейин гүнә этсек, гүнәлери багышламак үчин инди гурбанлык ёкдур.

²⁷ Диңе гарашылян ховплы хөкүм гүни ве Худайың душманларыны якып-яндырыҗы от бардыр.

²⁸ Мусаның кануныны рет эден адам ики я-да үч шаядың гүвәси билен рехимсиз өлдүрилйәрди.

²⁹ Шейле болса, Худайың Оглуны аяк астына салана ондан-да агыр җезаның гарашяндыгыны гөз өңүне гетирип гөрүң! Месихиң әхт ганы билен пәкленип, соңам муны мурдар хасаплаяның ве мерхемет Рухуны рысва эдйәниң халы ничик болар?

³⁰ Шейле хем биз бу сөзлери айдан Худайы танаярыс: «Өч Мениңкидир, җезаландырҗак Мендирин», шейле хем: «Реб Өз халкының үстүнден хөкүм чыкарар».

³¹ Хава, дири Худайың элине дүшмек элхенчдир!

³² Өңки гүнлериңизи ядыңыза салың. Шонда сиз Худайдан нурланып, җебир-җепалара дөз гелипдиңиз.

³³ Сиз бир тарапдан, хеммелериң өңүнде кемсидилмелере ве мушакгатлара сезевар эдилдиңиз, бейлеки бир тарапдан, шейле ягдая учранларың дердини дең чекишдиңиз.

³⁴ Туссагдакыларың-да дертлерини дең чекишдиңиз, өзүңизде хас оңат хем бакы байлыгың бардыгыны билип, эмләгиңизиң алынмагыны шатлык билен кабул этдиңиз.

³⁵ Шонуң үчин хем, ынамыңызы йитирмәң, мунуң сылагы улудыр.

³⁶ Сабыр-такатлы болуп, Худайың ырадасыны берҗай эдиң, шонда Худайың вадасына говшарсыңыз.

³⁷ Мукаддес Язгыларда шейле язылгыдыр: «Ене аз салымдан шол Гелҗек хөкман гелер, эгленмез.

³⁸ Мениң догручыл халкым иман билен яшар, эгер имандан дәнсе, ондан разы болмарын».

³⁹ Биз имандан дәнип, хеләк болян дәл-де, иманымыза садык болуп, халас болян адамлардандырыс.