Ester 6 - Мукаддес Китап

6-нҗы бап Патыша Мордекая хеззет-хормат эдйәр

¹ Шол гиҗе патышаның гөзүне укы гелмән, ол көшгүң йыл язгыларыны гетирмеги буюрды. Оны патышаның өңүнде окадылар.

² Ондан патышаның гапы саклаян агталары Бигтана билен Терешиң Ксеркс патышаның җанына каст этмек ниетлериниң бардыгы барада Мордекайың айдан затлары хакындакы язгы тапылды.

³ Патыша: «Мунуң үчин Мордекая нәме хеззет-хормат эдилди?» дийди. Патышаның эмелдарлары: «Оңа хич зат эдилмеди» дийдилер.

⁴ Патыша: «Ховлуда ким бар?» дийип сорады. Эдил шол вагт Мордекай үчин тайярланан дар агаҗындан оны асдырмак барада патыша билен геплешмек үчин, Хаман көшгүң дашкы ховлусына гирипди.

⁵ Патышаның эмелдарлары оңа: «Ховлуда Хаман бар» дийдилер. Патыша: «Гой, ол ичери гирсин» дийди.

⁶ Шейдип, Хаман ичери гирди. Патыша ондан: «Патышаның айратын хорматламак ислейән адамына нәме эдилсе, говы болар?» дийип сорады. Хаман өз ичинден: «Патыша менден башга кими шейле хорматласын?» дийип пикирленди.

^7-9 Хаман патыша: «Патышаның айратын хорматламак ислейән адамына, патышаның геен ша лыбаслары, патышаның мүнен, дабаралы шай-сеплер билен безелен аты гетирилип, ша лыбаслары ве аты патышаның иң атлы-абрайлы беглеринден бириниң элине берилсин; гой, ол патышаның айратын хорматламак ислейән адамыны гейиндирсин, гой, ол оны ата мүндүрип, шәхериң ачык мейданчасында җар чекип: „Патышаның айратын хорматламак ислейән адамына шейле эдилйәр“ дийип айласын» дийди.

¹⁰ Соңра патыша Хамана: «Дессине ша лыбасларыны ве аты ал-да, патыша көшгүниң дервезесинде отурян Мордекай яхудыны эдил айдышың ялы эт. Яңкы айданларыңың екеҗеси-де кем болмасын» дийди.

¹¹ Шейлеликде, Хаман ша лыбасларыны ве аты алып, Мордекайы гейиндирип, оны ата мүндүрип, шәхериң мейданчасында җар чекип: «Патышаның айратын хорматламак ислейән адамына шейле эдилйәр» дийип айлады.

¹² Соңра Мордекай ене-де доланып патышаның дервезесине гелди. Йөне Хаман яс тутуп, йүзүни бүрәп, тиз өйүне гайтды.

¹³ Хаман башдан гечирен вакаларының барыны аялы Зереше ве әхли достларына гүррүң берди. Соңра онуң достлары ве аялы Зереш оңа: «Өңүнде абрайдан дүшен Мордекайың яхудылардан болса, онда сен ондан үстүн болуп билмерсиң, сен хөкман еңлерсиң» дийдилер.

¹⁴ Олар Хаман билен геплешип отыркалар, патышаның агталары гелип, Хаманы гыссаглы Эстериң гуран мейлисине алып гитдилер.