Ester 5 - Мукаддес Китап

5‑нҗи бап Эстер патышаны ве Хаманы мейлисе чагыряр

¹ Үчүленҗи гүни Эстер өзүниң ша лыбасыны гейип, патыша көшгүниң ички отагында, патышаның тагты ерлешен отагының гаршысында дурды. Патыша көшгүң агзындакы отагда өз шалык тагтында отырды.

² Патыша ша аялы Эстериң ички отагда дураныны гөренде, Эстер патышаның назарында мерхемет газанды. Патыша элиндәки алтын хасасыны Эстере тарап узатды. Соңра Эстер оңа голай барып, хасаның уҗуна элини дегирди.

³ Патыша оңа: «Ша аялы Эстер, саңа нәме герек? Нәме ислегиң бар? Патышалыгымың ярысы хем болса, ол саңа берлер» дийди.

⁴ Эстер оңа: «Эгер патыша оңласа, ша ве Хаман шу гүн мениң патыша үчин гуран мейлисиме гелсинлер» дийип җогап берди.

⁵ Соңра патыша: «Эстериң ислегини битирмек үчин, Хаманы тиз гетириң» дийди. Шейлеликде, патыша ве Хаман Эстериң гуран мейлисине гелдилер.

⁶ Шерап ичип отыркалар, патыша Эстере: «Нәме дилегиң бар? Ол саңа берлер. Нәме ислегиң бар? Патышалыгымың ярысы хем болса берлер» дийди.

⁷ Эстер: «Мениң дилегим, ислегим шудур:

⁸ „Эгер мен патышаның гөвнүнден туран болсам, патыша дилегими битирип, ислегими ерине етирмеги оңласа, патыша билен Хаман эртир мениң олар үчин гурҗак мейлисиме гелсинлер. Мен эртир патышаның сорагына җогап берерин“» дийди.

Хаман Мордекайы өлдүрмегиң күйүне дүшйәр

⁹ Шол гүн Хаман шадыян, гөвнүхош болуп чыкып гайтды. Эмма патыша көшгүниң дервезесинде, Мордекайың өзүнден хедер эдип, еринден турмандыгыны гөренде, Хаман Мордекая гаршы гахар-газапдан долды.

¹⁰ Муңа гарамаздан, Хаман өзүни саклап, өйүне гайтды. Ол өйүне достларыны чагырып, аялы Зерешиң хем олара гошулмагыны сорады.

¹¹ Хаман олара өз уммасыз байлыкларыны, нәче оглуның бардыгыны, патышаның өзүниң везипесини бейгелдип, бейлеки беглерден ве көшк эмелдарларындан ёкарда гоюп, эден хеззет-хорматларыны санап берди.

¹² Хаман гүррүңиниң үстүни етирип шейле дийди: «Хатда ша аялы Эстер хем өз гуран мейлисине патыша билен бирликде менден башга хич кими чагырмады. Мен эртир хем патыша билен бирликде онуң мейлисине чагырылдым.

¹³ Йөне патышаның көшгүниң дервезесинде отурян Мордекай яхудыны гөренимде, бу затларың хеммеси пуҗа чыкяр».

¹⁴ Соңра аялы Зереш ве әхли достлары оңа: «Бейиклиги элли тирсек болан бир дар агаҗыны тайярласынлар. Эртир патыша айт, гой, ол шол дар агаҗындан Мордекайы асдырсын. Соңра шатланып, патыша билен биле мейлисе гит» дийдилер. Бу пикир Хамана ярады. Ол дар агаҗыны тайярлатды.