Ester 4 - Мукаддес Китап

4‑нҗи бап Мордекай Эстерден көмек сораяр

¹ Мордекай болуп гечен әхли затлар хакында эшиденде, якасыны йыртып, җул гейнип, башындан күл совурды ве шәхериң ортасына чыкып, дады-перят этди.

² Ол патыша көшгүниң дервезесине ченли гелди, чүнки җул гейнен адам дервезеден ичери гирмели дәлди.

³ Патышаның табшырыгыны ве перманыны эшиден әхли велаятлардакы яхудылар агыз бекләп, аглашып, дады-перят билен улы яс тутдулар. Оларың көпүси җул гейнип, күл үстүнде отурдылар.

⁴ Эстериң кенизлери ве агталары гелип, муны оңа хабар беренлеринде, ша аялы улы гайга батды. Ол Мордекая җулуң дерегине геер ялы эгинбаш иберди, эмма ол олары кабул этмеди.

⁵ Соңра Эстер өз хызматында дурян патышаның агталарындан бири болан Хатагы чагырып, оңа Мордекайың янына барып, нәмелериң боляндыгыны ве себәбиниң нәмедигини билмеклиги табшырды.

⁶ Хатак патышаның дервезесиниң өңүндәки шәхер мейданчасына, Мордекайың янына гитди.

⁷ Мордекай оңа өзи билен болуп гечен затларың барысы барада хем-де яхудылары ёк этмек үчин Хаманың патышаның хазынасына гоймагы вада берен күмшүниң мукдарына ченли айдып берди.

⁸ Шейле хем, Мордекай өзлерини дерби-дагын этмек барадакы Сузада чыкарылан перманың язув нусгасыны Эстере гөркезип, дүшүндирмеги үчин Хатага берди. Ол Эстере патышаның хузурына барып, ондан өз халкына рехим этмегини сорап, өз адамлары үчин оңа ялбармагыны табшырмаклыгы Хатакдан хайыш этди.

⁹ Хатак Эстериң янына гидип, Мордекайың әхли табшырыкларыны оңа айтды.

¹⁰ Соңра Эстер Хатак билен геплешип, ондан Мордекая шейле хабар иберди:

¹¹ «Эркекдигине я-да аялдыгына гарамаздан, патышаның янына чакылыксыз гелен адам бабатда бир канун бар – өлүм, диңе патышаның алтын хасасыны узадан адамы дири галяр. Патышаның әхли көшк эмелдарлары ве онуң әхли велаятларындакы адамлары муны билйәрлер. Мен отуз гүн бәри патышаның янына чагырыламок».

¹² Олар Эстериң сөзлерини Мордекая айтдылар.

¹³ Мордекай хем Эстере олардан шейле җогап иберди: «Патышаның көшгүнде боланың үчин бар яхудыларың ичинден еке өзүң аман галарын өйтме.

¹⁴ Чүнки сен шунуң ялы пурсатда үмсүм отурсаң, онда яхудылар башга ерден ярдам тапып, халас боларлар, йөне сен ве сениң какаң машгаласы хеләк болар. Белки, сен шунуң ялы пурсатлар үчин ша аялы болансың!»

¹⁵ Соңра Эстер Мордекая шейле җогап бериң дийди:

¹⁶ «Бар, Сузадакы әхли яхудылары йыгна, мениң үчин агыз бекләң, үч гиҗе-гүндизләп иймәң, ичмәң. Мен ве мениң кенизлерим-де сиз ялы агыз бекләрис. Шондан соң канундан чыкян хем болсам, патышаның янына гидерин. Гой, өлсем өлейин».

¹⁷ Соңра Мордекай гидип, хемме зады Эстериң табшырышы ялы этди.