Ester 2 - Мукаддес Китап

2‑нҗи бап Эстер ша аялы боляр

¹ Шу вакалардан соң Ксеркс патышаның гахары ятышып, ол ша аялы Вашты, онуң эден иши хем-де оңа гаршы чыкарылан перман барада пикирленди.

² Онсоң патышаның эмелдарлары оңа шейле теклип этдилер: «Гой, патыша үчин гөрмегей, яш, бой гызлары тапсынлар.

³ Олары Суза галасында ерлешен харемхана гетиртмек үчин, патыша өз патышалыгындакы бүтин велаятларда сынчылары беллесин. Олар патышаның аяллара сакчылык эдйән агтасы Хегайың гөзегчилиги астында гоюлсынлар; олара оваданлык серенҗамлары берилсин.

⁴ Патышаның гөвнүне яран гызларың бири ша аялы Ваштының дерегине ша аялы болсун». Бу теклип патыша ярап, ол оларың айдышы ялы хем этди.

⁵ Суза галасында Мордекай атлы бир яхуды барды. Ол бенямин тиресинден болан Кишиң човлугы, Шимгиниң агтыгы, Яйырың оглуды.

⁶ Яхуда патышасы Еконя билен бирликде Киш хем Иерусалимден Бабыла есир эдилипди. Олары Бабыл патысасы Небукаднесар есир эдип әкидипди.

⁷ Мордекай какасының доганының гызы Хадассаны, ягны Эстери өзи тербиеләп кемала гетирипди, чүнки ол гызың эҗеси-де, какасы-да ёкды. Ол сыратлы, гөрмегей бой гызды. Онуң эҗеси, какасы өленден соң, Мордекай оны өзүне гызлыга алыпды.

⁸ Шейдип, патышаның табшырыгы ве перманы ыглан эдилип, биртопар бой гызлар Суза галасына гетирилип, Хегайың гөзегчилиги астында гоюлды. Эстер хем патышаның көшгүне гетирилип, аяллара сакчылык эдйән Хегайың гөзегчилигине берилди.

⁹ Бу гыз Хегайың гөвнүнден туруп, онуң мерхеметини газанды. Ол дессине Эстери оваданлык серенҗамлары хем-де иймитден етдик пай билен үпҗүн эдип, патышаның көшгүнден еди кенизи сайлап, оны кенизлер билен биле харемхананың иң оңат ерине гечирди.

¹⁰ Эстер өз миллети ве машгаласы барада хич зат айтмады, чүнки Мордекай бу барада дил ярмазлыгы оңа табшырыпды.

¹¹ Эстериң хал-ягдайыны ве оңа нәме боляныны билмек үчин, Мордекай хер гүн харемхананың ховлусының өңүнде гезмеләрди.

¹² Патышаның хузурына бармаздан өң, аяллар дүзгүни боюнча гыз он ики айлык тимар бериш дөврүни гечмелиди. Бу дөвүрде гызлара алты ай мүр ягы билен, алты ай хем атырлар хем-де оваданлык серенҗамлары билен тимар берилйәрди.

¹³ Бой гыз патышаның хузурына гиденде, оңа харемханадан өзи билен әкитмәге соран задыны берердилер.

¹⁴ Ол гыз агшам патышаның янына гидип, эртеси патышаның гырнак аялларына середйән агтасы Шагашгазың гөзегчилиги астындакы икинҗи харемхана гайдып гелерди. Патышаның гөвнүне ярап, патыша адыны тутуп чагырянча, ол икиленч патышаның хузурына бармазды.

¹⁵ Эстер Мордекайың гызлыгы, онуң какасының доганы Абыхайылың гызыды. Патышаның хузурына бармак нобаты етенде, ол патышаның аяллара гөзегчилик эдйән агтасы Хегайың айданларындан башга хич зат сорамады. Эстер өзүни гөренлериң барының гөвнүнден турды.

¹⁶ Эстер Ксерксиң патышалыгының единҗи йылының онунҗы айы болан Тебет айында патышаның хузурына әкидилди.

¹⁷ Әхли аялларың ичинден патыша Эстери сайлады. Ол патышаның назарында бейлеки гызларың әхлисинден көп мерхемет ве мәхир газанды. Шейдип, ол Эстериң башына шалык тәҗини гейдирип, оны ша аялы Ваштының ерине өз ша аялы этди.

¹⁸ Соңра патыша Эстериң хатырасына өзүниң әхли беглери хем-де көшк эмелдарлары үчин мейлис гурады. Ол әхли велаятлара дынчлык берди, хеммелере сахылык билен совгат-серпайлар этди.

Мордекай патышаның җаныны халас эдйәр

¹⁹ Бой гызлар икинҗи гезек бир ере топланыланда, Мордекай көшк эмелдарыды.

²⁰ Эстер Мордекайың табшырышы ялы өзүниң машгаласы ве миллети хакында олара хич зат айтманды, чүнки ол Мордекайың табшырыкларыны өзүниң тербиеленен вагтындакысы ялы ерине етирйәрди.

²¹ Мордекайың көшк эмелдары болуп ишлейән дөврүнде патышаның гапы саклаян агталары Бигтан ве Тереш гахарланып, Ксеркс патышаны өлдүрмеги йүреклерине дүвдүлер.

²² Мордекай муны билип, ша аялы Эстере хабар берди. Эстер хем муны Мордекайың адындан патыша хабар берди.

²³ Бу иш барланылып, мунуң, хакыкатдан-да, шейледигине гөз етириленден соң, оларың икиси-де дардан асылды. Бу вака патышаның хузурындакы йыл язгыларына язылды.