Ester 1 - Мукаддес Китап

1‑нҗи бап Ксеркс патыша мейлис гураяр

¹ Бу вака Ксеркс патышаның дөврүнде болуп гечипди. Ксеркс Хиндистан билен Эфиопияның аралыгындакы бир йүз йигрими еди велаятың үстүнден шалык сүрйәрди.

² Шол дөвүрде Ксеркс патыша Суза галасындакы тагтында отурып, юртда шалык сүрйәрди.

³ Патышалыгының үчүнҗи йылында ол өзүниң әхли беглери хем көшк эмелдарлары үчин мейлис гурады. Мейлисе Парсың ве Мадайың харбы ёлбашчылары, хан-беглери ве велаятларың хәкимлери гатнашдылар.

⁴ Ол йүз сегсен гүнләп патышалыгының эгсилмез байлыкларыны, өз белент мертебесини ве шөхратыны гөркезди.

⁵ Шол гүнлер геченден соң, Суза галасында бай-гарып диймән бүтин халк үчин көшгүң ховлусындакы багда патыша еди гүнләп мейлис гурады.

⁶ Ховлы ак ве мавы реңкли перделер билен безеленди, олар ал гырмызы ве непис зыгыр йүплүк билен мермер сүтүнлердәки күмүш халкаҗыклара беркидиленди. Алтын-күмүшден ясалан күрсүлер садап, мермер ве бейлеки гымматбаха дашлар билен нагышланан янёдада гойланды.

⁷ Шол ере гелен адамлара бири-биринден үйтгешик болан алтын пыялаларда патышаның байлыгына лайык ша шерабындан болелинликде берилди.

⁸ Шерап дийсең болды. Патыша мыхманлара иследиклериче шерабы сахылык билен бермеклиги өз хызматкәрлерине буюрды.

⁹ Ша аялы Вашты хем Ксеркс патышаның көшгүнде аяллар үчин мейлис гурады.

Ша аялы Вашты Ксеркс патышаның буйругына боюн эгмейәр

^10-11 Мейлисиң единҗи гүни шерапдан серхош болан Ксеркс патыша ша аялы Ваштының башына шалык тәҗини гейдирип, оны өз хузурына гетирмеклерини көшкде хызмат эдйән еди агтасына: Мехумана, Бизта, Харбона, Бигта, Абагта, Зетара ве Каркаса буюрды. Ол бүтин халка ве беглере онуң гөзеллигини гөркезмек иследи, чүнки ол гөрмегей аялды.

¹² Патышаның агталары онуң буйругыны ша аялы Вашта етиренлеринде, ол патышаның хузурына бармакдан боюн гачырды. Муңа патышаның гаты гахары гелип, онуң калбында газап оды ловлады.

¹³ Кануны ве хөкүм чыкарылышы оңат билйән адамлардан маслахат сорамак адат болансоң, патыша шол дөври оңат билйән акылдарлардан маслахат сорады.

¹⁴ Олар патышаның иң якын адамлары, онуң йөрите маслахатчылары, Парсың ве Мадайың еди беги: Каршена, Шетар, Адмата, Таршыш, Мерес, Марсена хем-де Мемукан дагыларды. Олар патышаның хузурында иң бейик везипелери эеледилер.

¹⁵ Патыша олардан: «Ксеркс патышаның агталары аркалы берен табшырыгыны ерине етирмәндиги үчин, ша аялы Вашта кануна гөрә нәхили чәре гөрмели?» дийип сорады.

¹⁶ Соңра Мемукан патышаның ве беглериң өңүнде шейле дийди: «Ша аялы Вашты диңе патыша гаршы дәл-де, эйсем патыша Ксерксиң әхли велаятларындакы хемме хан-беглере ве халка гаршы габахат иш этди.

¹⁷ Чүнки ша аялың бу херекетини әхли аяллар эшидерлер, шунлукда, олар хем өз әрлерини кемсидип, олара йигренч билен середип башларлар. Олар: „Ксеркс патыша ша аялы Ваштының өз хузурына гетирилмегини буюрды, эмма ол патышаның хузурына бармакдан боюн гачырды“ диерлер.

¹⁸ Хут шол гүнүң өзүнде ша аялың бу херекетини эшиден Парс ве Мадай беглериниң аяллары патышаның беглерине гулак асмазлар. Бу оларда йигренч, гахар-газап дөредер.

¹⁹ Эгер патыша оңласа, гой, ол бир перман чыкарсын. Ша аялы Вашты мундан бейләк Ксеркс патышаның хузурына бармалы дәлдир дийлип, парсларың ве мадайларың канунларына гиризилсин ве үйтгедилмесин. Шейле хем, гой, патыша Ваштының ша аяллык дереҗесини ондан говурак башга бирине берсин.

²⁰ Шейдип, патышаның чыкаран перманы онуң бүтин патышалыгында ыглан эдилсе, баю-гарып әхли аяллар өз әрлерине хормат гоярлар».

²¹ Бу маслахат патышаның хем-де онуң беглериниң гөвнүнден турды ве патыша эдил Мемуканың айдышы ялы хем этди.

²² Ол хер бир эркек өз өйүне хоҗайын болсун дийип, хер халка өз дилинде ыглан эдип, өзүниң бүтин патышалыгындакы велаятлара херсиниң өз язувында, өз дилинде хатлар ёллады.