Ёханна 9 - Мукаддес Китап

9-нҗы бап Иса бир догабитди көри сагалдяр

¹ Иса гечип барярка, бир догабитди көр адамы гөрди.

² Шәгиртлери Ондан: «Мугаллым, бу адамың көр болуп догулмагына ким гүнәкәр? Онуң өзи гүнәкәрми я-да эне-атасы?» дийип сорадылар.

³ Иса олара: «Муңа ол адамың өзи хем, эне-атасы хем гүнәкәр дәл. Бу онда Худайың ишлериниң гөркезилмеги үчин болды.

⁴ Өзүми Иберениң ишлерини Мен гүндиз этмели. Гиҗе етип гелйәр, шонда хич ким ишләп билмез.

⁵ Мен дүнйәдекәм, дүнйәниң нуры Мендирин» дийип җогап берди.

⁶ Онсоң Иса ере түйкүрди-де, түйкүлигинден палчык ясап, оны көрүң гөзүне сүртди.

⁷ Соңра оңа: «Гит-де, Силоям ховзунда ювун» дийди. (Силоям «Иберилен» диймекдир.) Ол гидип ювунды ве ызына гөзлери ачылып гелди.

⁸ Гоңшулары ве онуң овал дилегчилик эдип йөренини гөренлер: «Бу отурып, дилегчилик эдйән адам дәлми?» дийип сорадылар.

⁹ Кәбирлери: «Шол» дийдилер; кәбирлери: «Ёк, бу шоңа меңзеш» дийдилер. Йөне онуң өзи: «Хава, мен шол адам» дийди.

¹⁰ Ондан: «Шейле болса, онда гөзлериң нәхили ачылды?» дийип сорадылар.

¹¹ Ол: «Иса диен Адам палчык ясап, гөзүме сүртди-де: „Силоям ховзуна гит-де, ювун“ дийди. Мен хем гидип ювундым велин, гөзлерим ачылайды» дийип җогап берди.

¹² Ондан: «Шол Адам ниреде?» дийип сорадылар. Ол: «Билемок» дийип җогап берди.

¹³ Озал көр болан бу адамы фарисейлериң янына гетирдилер.

¹⁴ Исаның палчык ясап, онуң гөзлерини ачан гүни Сабат гүнүди.

¹⁵ Фарисейлер-де онуң гөзүниң нәхили ачыландыгы барада сорадылар. Ол адам: «Ол мениң гөзүме палчык сүртди, онсоң ювундым. Инди мен гөрйәрин» дийип җогап берди.

¹⁶ Фарисейлериң кәбирлери: «Ол Адам Худайдан дәл, себәби Сабат гүнүни сакламаяр» дийдилер. Башгалары болса: «Эйсем гүнәкәр адам бейле гудратлы аламатлары гөркезип билерми?» дийдилер. Шейдип, оларың арасында агзалалык дөреди.

¹⁷ Олар ене-де көрден: «Гөзүңи ачан шол Адам барада нәме диййәрсиң?» дийип сорадылар. Ол хем: «Ол бир пыгамбер» дийди.

¹⁸ Яхудыларың баштутанлары гөзлери ачылан адамың эҗеси билен какасыны чагырып сораянчалар, онуң озал көр болуп, инди гөзлериниң ачыландыгына ынанмадылар.

¹⁹ Олардан: «Көр догулды диййән оглуңыз шумы? Инди бу нәдип гөрйәр?» дийип сорадылар.

²⁰ Онуң эҗеси билен какасы олара: «Мунуң өз оглумыздыгыны, онуң көр догландыгыны билйәрис.

²¹ Йөне онуң инди нәдип гөрйәндигини я-да онуң гөзүни кимиң ачандыгыны биз билмейәрис. Ол инди бир етишен йигит, өзүнден сораң, гой, өзи айдып берсин» дийип җогап бердилер.

²² Онуң эҗеси билен какасы яхудыларың баштутанларындан горкуларына шейле дийдилер. Себәби яхудылар Исаның Месихдигини ыкрар эден адамы синагогадан ковмак барада дил бирикдирипдилер.

²³ Шонуң үчин онуң эҗеси билен какасы: «Ол бир етишен йигит, өзүнден сораң» дийдилер.

²⁴ Шейлелик билен, фарисейлер озалкы көри икинҗи гезек чагырып, оңа: «Худайың хакы үчин хакыкаты айт. Биз ол Адамың гүнәкәрдигини билйәрис» дийдилер.

²⁵ Ол адам: «Онуң гүнәкәрдигини я-да дәлдигини билемок. Йөне мен бир зады билйәрин: озал көрдүм, инди гөрйәрин» дийип җогап берди.

²⁶ «Ол саңа нәме этди? Гөзүңи нәдип ачды?» дийип, ондан ене сорадылар.

²⁷ Ол булара: «Мен яңы айтдым ахыры, йөне диңлемедиңиз. Нәме үчин ене эшитмек ислейәрсиңиз? Я сизем Онуң шәгиртлери болмакчымы?» дийип җогап берди.

²⁸ Оңа сөгүп: «Онуң шәгирди – сенсиң, биз Мусаның шәгирдидирис.

²⁹ Биз Худайың Муса билен геплешендигини билйәрис, бу Адамың болса ниредендигини-де билмейәрис» дийдилер.

³⁰ Яңкы адам олара шейле җогап берди: «Хайран галаймалы! Сиз Онуң ниредендигини-де билмейәрсиңиз, Ол болса мениң гөзлерими ачды.

³¹ Худайың гүнәкәрлери диңлемейәндигини билйәрис, эмма ким Оңа сежде эдип, Онуң ырадасыны берҗай этсе, Худай оны диңлейәр.

³² Догабитди көрүң гөзүниң ачылмагы хенизе ченли гөрлүп-эшидилен зат дәл.

³³ Эгер Ол Худайдан болмадык болса, хич зат эдип билмезди».

³⁴ Оңа: «Сен бүтинлей гүнә ичинде доглуп, инди бизе акыл сатярмың?» дийдилер. Шейлеликде, оны синагогадан ковуп чыкардылар.

Рухы көрлүк

³⁵ Оны ковуп гойберенлерини эшиден Иса яңкы адамы тапып: «Сен Ынсан Оглуна иман эдйәрмиң?» дийди.

³⁶ Ол хем Оңа: «Ага, айтсана, Ол кимкә? Мен Оңа иман эдейин» дийип җогап берди.

³⁷ Иса оңа: «Сен Оны гөрдүң. Ине, сениң билен геплешип дуран Шолдур» дийди.

³⁸ Ол хем: «Я Реб, иман эдйәрин» дийип, Оңа сежде этди.

³⁹ Иса оңа: «Мен бу дүнйә гөрмейәнлер гөрсүн, гөрйәнлер көр болсун дийип, хөкүм чыкармага гелдим» дийди.

⁴⁰ Муны диңләп дуран фарисейлериң кәбири Ондан: «Эйсем бизем көрми?» дийип сорадылар.

⁴¹ Иса олара: «Көр болан болсадыңыз, гүнәңиз болмазды, эмма гөрйәрис диениңиз үчин гүнәңиз өз бойнуңызда галар» дийди.