Ёханна 7 - Мукаддес Китап

7‑нҗи бап Иса Иерусалиме гидйәр

¹ Шондан соң Иса Җелиледе айланмага башлады. Яхудыларың баштутанлары Онуң кастына чыкансоңлар, Ол Яхудыяда гезмек ислемейәрди.

² Яхудыларың Чатма байрамы голайлапды.

³ Шонуң үчин Исаның инилери Оңа: «Бу ерден чыкып, Яхудыя гит, эдйән ишлериңи шәгиртлериң гөрсүн.

⁴ Өзүни ачык танатмак ислейән адам гизлин иш эдйән дәлдир. Сен бу затлары эдйән болсаң, Өзүңи дүнйә гөркез» дийдилер,

⁵ себәби Оңа хатда инилери-де ынанмаярдылар.

⁶ Иса олара: «Мениң вагтым энтек доланок, йөне сизиң үчин ислендик вагт пурсатдыр.

⁷ Дүнйә сизи йигренип билмез, эмма Мени йигренйәр, себәби Мен онуң ишлериниң эрбетдигине шаятлык эдйәрин.

⁸ Сиз байрама гидиң, Мен бу байрама гитҗек дәл. Себәби Мениң вагтым энтек доланок» дийип җогап берди.

⁹ Олара шейле дийип, Ол Җелиледе галды.

¹⁰ Эмма инилери байрама гиденлеринден соң, Иса-да гитди, йөне ач-ачан дәл-де, гизлин гитди.

¹¹ Яхудыларың баштутанлары байрамчылыкда Оны идәп: «Ол ниреде?» дийип сораярдылар.

¹² Мәхелләниң арасында Ол хакда көп гүррүң эдилди. Кәбирлери «Ол говы адам» дийсе, башгалары «Ол халкы аздыряр» диййәрдилер.

¹³ Йөне яхуды ёлбашчыларындан горкуп, хич ким Ол хакда ачык гүррүң эдип билмейәрди.

¹⁴ Байрамчылыгың ярысы геченде, Иса ыбадатхана барып, өвретмәге башлады.

¹⁵ Яхудылар хайран галып: «Бу адам хич ерде окамадык болса-да, Мукаддес Язгылары ниреден билйәркә?» дийишйәрдилер.

¹⁶ Иса олара шейле җогап берди: «Мениң өвредйәнлерим Өзүмиңки дәл, Мени Иберениңкидир.

¹⁷ Худайың ырадасыны берҗай этмек ислейән адам Мениң өвредйәнлеримиң Худайдандыгына я-да Өзүмдендигине гөз етирер.

¹⁸ Ким өзүнден сөзлейән болса, өзүне шөхрат гөзлейәндир. Ким өзүни иберене шөхрат гөзлейән болса, хакыкаты сөзлейәндир, онуң сөзлеринде ялан ёкдур.

¹⁹ Муса сизе Мукаддес Кануны бермедими нәме? Йөне сизиң хич бириңиз бу Кануны берҗай этмейәрсиңиз. Нәме үчин Мени өлдүрҗек болярсыңыз?»

²⁰ Мәхелле Оңа: «Сен җынлы, ким Сени өлдүрҗек боляр?» дийди.

²¹ Иса олара: «Мен бир гудрат гөркездим, оңа хеммәңиз хайран галярсыңыз.

²² Өзүңиз болса, Мусаның кануныны берҗай эдйәрис дийип хем, Сабат гүни чагалары сүннет эдйәрсиңиз. Аслында сүннет Мусадан дәл-де, ата-бабалардан галандыр.

²³ Шейлеликде, Мусаның кануны бозулмасын дийип хем, өзүңиз Сабат гүни сүннет эдйәңиз. Онда нәме үчин Сабат гүни бир адамы бүтинлей сагалдандыгым үчин Мени язгарярсыңыз?

²⁴ Дашкы гөрнүше гөрә хөкүм чыкармаң, хөкүмиңиз адалатлы болсун» дийди.

Иса Месих мидир?

²⁵ Бу ерде иерусалимлилериң кәбирлери: «Оларың өлдүрҗек болян Адамы шу дәлми?

²⁶ Ине, Ол аркайын гүррүң берип дур, Оңа гаршы хич ким хич зат диймейәр. Бизиң ёлбашчыларымыз Онуң Месихдигини, хакыкатданам, билйән болаймасынлар?!

²⁷ Йөне биз бу Адамың ниредендигини билйәрис. Месих геленде болса Онуң ниредендигини хич ким билмез» дийишдилер.

²⁸ Онсоң Иса ыбадатханада өвредип дурка, гаты сес билен шейле дийди: «Хава, сиз Мени хем танаярсыңыз, ниредендигими хем билйәрсиңиз. Эмма Мен Өз-Өзүмден гелемок, Мени Иберен хакдыр, сиз Оны танамаярсыңыз.

²⁹ Мен Оны танаярын, себәби Мен Ондан гелендирин. Мени иберен Олдур».

³⁰ Шондан соң Оны тутҗак болдулар, йөне хич ким Оңа эл галдырмады, себәби энтек Онуң вагты долманды.

³¹ Барыбир мәхелләниң көпүси Оңа иман эдип: «Месих геленде, шунуңкыдан көп гудратлы аламат гөркезерми?» дийшип пышырдашды.

³² Фарисейлер халкың Иса хакындакы бу пышырдыларыны эшитдилер. Онсоң ёлбашчы руханылар билен фарисейлер Оны тутмак үчин гаравуллары ибердилер.

³³ Иса: «Мен ене аз салым сизиң яныңызда болуп, соңра Өзүми Иберениң янына гидерин.

³⁴ Сиз Мени гөзләрсиңиз, йөне тапмарсыңыз. Мениң барҗак ериме сиз барып билмерсиңиз» дийди.

³⁵ Онсоң яхудыларың баштутанлары бири-бирине: «Бу Адам биз тапып билмез ялы, нирә гитҗеккә? Греклериң арасына даргап гиден яхудыларың янына гидип, греклере-де өвретҗекмикә?

³⁶ Мунуң „Мени гөзләрсиңиз, йөне тапмарсыңыз, Мениң барҗак ериме сиз барып билмерсиңиз“ диййәни нәмекә?» дийишдилер.

³⁷ Байрамың соңкы ве иң эсасы гүни Иса өр туруп, мәхеллә: «Сувсаянлар Мениң яныма гелип, тешнелигини гандырсынлар.

³⁸ Ким Маңа иман этсе, Мукаддес Язгыларда айдылышы ялы, онуң ичинден яшайыш сувуның булаклары акар» дийип гыгырды.

³⁹ Ол муны Өзүне иман эденлериң алҗак Мукаддес Рухы барада айдярды. Олара энтек Мукаддес Рух инмәнди, себәби Иса энтек шөхратландырылманды.

⁴⁰ Мәхелләниң ичинден кәбирлери бу сөзи эшидип: «Бу хакыкатдан хем шол гелҗек пыгамбердир» дийдилер.

⁴¹ Башгалары: «Бу Месихдир» дийдилер, эмма кәбирлери: «Болуп билмез! Месих, хей-де, Җелиледен гелерми?

⁴² Мукаддес Язгыларда: „Месих Давудың неслинден, Давудың яшан Бейтуллахам шәхеринден гелер“ дийип язылманмы нәме?» дийдилер.

⁴³ Шейлеликде, мәхелләниң арасында Иса барада агзалалык дөреди.

⁴⁴ Олардан кәбири Оны тутмак иследи, йөне хич ким Оңа эл дегирмеди.

Яхудыларың баштутанлары Иса ынанмаярлар

⁴⁵ Ахырсоңы ыбадатхана гаравуллары гайдып гелдилер ве ёлбашчы руханылар билен фарисейлер олардан: «Нәме үчин Оны гетирмедиңиз?» дийип сорадылар.

⁴⁶ Ыбадатхана гаравуллары: «Хич ким хич вагт бу Адамың геплейши ялы геплемәнди» дийип җогап бердилер.

⁴⁷ Фарисейлер олара: «Сиз хем алдандыңызмы?

⁴⁸ Ёлбашчылардан я-да фарисейлерден, хей, Оңа иман эден бармы?

⁴⁹ Ёкдур! Эмма Төврады билмейән бу надан халк нәлет астындадыр!» дийдилер.

⁵⁰ Шонда фарисейлериң арасындан бири, озал Исаның янына баран Никодим олара:

⁵¹ «Канунымыза гөрә бир адамы өңүрти диңлемән, нәме эденини билмән, оңа хөкүм чыкармак догрумыдыр?» дийди.

⁵² Олар: «Сен хем җелилелими? Мукаддес Язгылара сер сал, Җелиледен хич вагт пыгамбер чыкмаҗагыны гөрерсиң» дийдилер.

⁵³ Соңра хеммеси өйли-өйүне гайтды.