Ёханна 6 - Мукаддес Китап

6-нҗы бап Иса бәш мүң адамы доюряр

¹ Шундан соң Иса Җелиле көлүниң бейлеки тарапына гечди. Бу көле Тиберия көли хем дийилйәрди.

² Исаның гудратлар аркалы хассалары сагалдандыгыны гөрен улы мәхелле Онуң ызына дүшди.

³ Иса шәгиртлери билен бейик депә чыкып отурды.

⁴ Яхудыларың Песах байрамы голайлапды.

⁵ Иса төверегине гөзүни айлады. Өз янына улы мәхелләниң гелйәнини гөрүп, Филипе: «Булара иер ялы чөреги ниреден сатын аларыс?» дийди.

⁶ Ол муны Филипи сынамак үчин сорапды, аслында велин Өзүниң нәме этҗегини эййәм билйәрди.

⁷ Филип Оңа: «Буларың хер бирине бир дөвүм чөрек сатын алмак үчин ики йүз күмүш теңңе сарп этсек-де етмез!» дийип җогап берди.

⁸ Шәгиртлерден бири, Симун Петрусың доганы Андрыс Оңа:

⁹ «Бу ерде бир огланда бәш арпа чөреги билен ики балык бар. Эмма шейле улы мәхеллә булар нәмеҗик болар?» дийди.

¹⁰ Иса: «Халкы отурдың» дийди. Халк шол ердәки гөк яйлада отурды. Ол ерде бәш мүңе голай эркек адам барды.

¹¹ Иса чөреклери алып, шүкүр этди, соңра олары отуранлара пайлады. Балыклары хем шейтди, нәче ислеселер, олара пайлады. Адамлар дойянчалар ийдилер.

¹² Олар доянларындан соң, Иса шәгиртлерине: «Галан-гачанлары йыгнашдырың, хич зат заяланмасын» дийди.

¹³ Шейлеликде, шәгиртлер ийлен бәш арпа чөрекден артан бөлеклери йыгнап, он ики себеди долдурдылар.

¹⁴ Исаның бу гудратлы аламатыны гөрен адамлар: «Хакыкатдан-да, дүнйә гелмели пыгамбер Шудур» дийдилер.

¹⁵ Иса оларың Өзүни патыша этмек үчин зор билен тутҗак боляндыкларыны биленсоң, ене-де еке Өзи дага гитди.

Иса сувуң йүзүнден йөрейәр

¹⁶ Агшамара Онуң шәгиртлери көлүң боюна гелдилер.

¹⁷ Гараңкы дүшсе-де, Иса хениз оларың янына гелмәнди. Онсоң шәгиртлер гайыга мүнүп, көлүң аңырсындакы Капернаума уградылар.

¹⁸ Гүйчли ел туруп, көл толкун атып башлады.

¹⁹ Олар гайыклы бәш-алты чакрым йүзенлеринден соң, Исаның сувуң йүзүнден йөрәп, гайыга якынлашып гелйәнини гөрүп горкдулар.

²⁰ Эмма Иса олара: «Горкмаң, бу – Мен!» дийди.

²¹ Олар бегенип, Оны гайыга мүндүрдилер. Гайык шол пурсадың өзүнде етмели кенарына барып етди.

²² Эртеси гүн көлүң бейлеки кенарында галан мәхелле ол ерде дүйн диңе бир гайыгың бардыгыны ве Исаның Өз шәгиртлери билен шол гайыга мүнмән, оларың диңе өзлериниң гидендиклерини аныкладылар.

²³ Шол вагт Тибериядан башга гайыклар гелди. Гайыкларың сакланан ери Реб Исаның Худая шүкүр айдан ве халкың чөрек иен ерине голайды.

²⁴ Исаның-да, Онуң шәгиртлериниң-де ол ерде ёкдугыны гөрен мәхелле гайыклара мүнүп, Исаны гөзлемәге Капернаума тарап гитди.

²⁵ Оны көлүң аңры тарапындан тапып: «Мугаллым, бу ере хачан гелдиң?» дийип сорадылар.

Иса – Яшайыш чөреги

²⁶ Иса олара: «Мен сизе догрусыны айдярын, сиз Мени гудрат гөрениңиз үчин дәл-де, чөрек ийип дояныңыз үчин агтарярсыңыз.

²⁷ Заяланян иймит үчин дәл-де, бакы яшайыш берйән иймит үчин ыхлас эдиң, оны сизе Ынсан Оглы берер. Чүнки Атамыз Худайың Өзи бу иши Оңа табшырандыр» дийип җогап берди.

²⁸ Ондан: «Биз Худайың ишлерини берҗай этмек үчин нәме этмели?» дийип сорадылар.

²⁹ Иса олара: «Худайың ишини берҗай этмек ислейән болсаңыз, Онуң Иберенине иман эдиң» дийип җогап берди.

³⁰ Олар ене-де: «Гөрүп, Саңа иман эдеримиз ялы, Сен нәхили гудратлы аламат гөркезерсиң? Ханы, нәме эдерсиң?

³¹ Бизиң ата-бабаларымыз чөлде манна ийдилер. Мукаддес Язгыларда бу барада: „Олара иймек үчин гөкден чөрек берди“ дийип язылан» дийдилер.

³² Иса олара: «Мен сизе догрусыны айдярын, сизе гөкден чөрек берен Муса дәл. Гөкден сизе хакыкы чөреги Мениң Атам берйәр.

³³ Чүнки Худайың чөреги гөкден инип, дүнйә яшайыш берйәндир» дийди.

³⁴ Олар Оңа: «Агам, шол чөреги бизе хемише бер» дийдилер.

³⁵ Иса олара шейле дийди: «Яшайыш чөреги Мендирин, Маңа гелен асла аҗыкмаз, Маңа иман эден асла сувсамаз.

³⁶ Айдышым ялы, сиз Мени гөрдүңиз, эмма Маңа иман этмейәрсиңиз.

³⁷ Атамың Маңа берен адамларының бары Маңа гелер, Мен яныма геленлери асла ковмарын.

³⁸ Чүнки Мен Өз ырадамы дәл-де, Мени Иберениң ырадасыны берҗай этмек үчин гөкден индим.

³⁹ Мени Иберениң ырадасы болса, Онуң Өзүме беренлериниң хич бирини йитирмән, олары ахыркы гүн гайтадан дирелтмегимдир.

⁴⁰ Оглы гөрен ве Оңа иман эден хер бир адамың бакы яшайша говушмагы Атамың ырадасыдыр. Мен-де бу адамлары ахыркы гүн гайтадан дирелдерин».

⁴¹ «Гөкден инен чөрек Мендирин» диени үчин яхудыларың баштутанлары Оңа гаршы чыкып хүңүрдешдилер.

⁴² Олар: «Бу Юсубың оглы Иса дәлми? Биз Онуң ата-энесини танаярыс. Ол нәхили „Мен гөкден индим“ диййәр?» дийишдилер.

⁴³ Иса олара шейле дийди: «Өзара хүңүрдешмәңизи бес эдиң.

⁴⁴ Эгер Мени иберен Атаның Өзи гетирмесе, хич ким Маңа гелип билмез. Яныма гелен адамы болса, Мен ахыркы гүн дирелдерин.

⁴⁵ Пыгамберлериң язгыларында: „Оларың хеммеси Худайдан таглым аларлар“ дийип язылан. Атадан эшидип, Ондан таглым алан хер кес Маңа гелер.

⁴⁶ Аслында хич ким хич вагт Атаны гөрен дәлдир. Атаны диңе Худайдан Гелен гөрендир.

⁴⁷ Мен сизе догрусыны айдярын, Маңа иман эден бакы яшайша говшандыр.

⁴⁸ Яшайыш чөреги Мендирин.

⁴⁹ Ата-бабаларыңыз чөлде манна иендиклерине гарамаздан, өлдүлер.

⁵⁰ Эмма гөкден инен бир чөрек бар, ондан иййән адам хич өлмез.

⁵¹ Гөкден инен дири чөрек Мендирин. Мундан иен адам бакы яшар. Дүнйәниң яшайшы үчин берҗек чөрегим Мениң Өз беденимдир».

⁵² Онсоң яхудылар: «Бу Адам Өз беденини бизе иймәге нәхили берип билер?» дийшип, өзара җеделлешмәге башладылар.

⁵³ Иса олара: «Мен сизе догрусыны айдярын, Ынсан Оглуның беденини ийип, ганыны ичмесеңиз, сизде яшайыш болмаз.

⁵⁴ Мениң беденими ийип, ганымы ичен бакы яшайша говшар. Ахыркы гүн Мен оны дирелдерин.

⁵⁵ Мениң беденим хакыкы иймит, ганым хакыкы ичгидир.

⁵⁶ Мениң беденими ийип, ганымы ичйән Менде яшар, Мен хем онда.

⁵⁷ Мени Дири Ата иберди ве Мен Ол аркалы яшаярын. Эдил шунуң ялы, Менден иймитленйән-де Мен аркалы яшар.

⁵⁸ Хава, гөкден инен чөрек будур. Серет, бу ата-бабаларыңызың иен маннасы ялы дәлдир. Олар манна ийселер-де, өлүп гитдилер, эмма бу чөреги иен адам бакы яшар» дийди.

⁵⁹ Ол бу сөзлери Капернаумдакы синагогада өвредйәркә айтды.

Көп адамлар Исаны терк эдйәрлер

⁶⁰ Шәгиртлериң көпүси муны эшидип: «Бу сөзлер агыр. Муны ким кабул эдип билер?» дийишди.

⁶¹ Иса шәгиртлериң муңа хүңүрдешйәнини билип, олара: «Бу сизиң җаныңыза батярмы?

⁶² Онда сиз Ынсан Оглуның овал болан ерине гайтадан чыканыны гөрсеңиз нәме диеркәңиз?

⁶³ Яшайыш берйән Рухдур, ынсан гүйҗүниң пейдасы ёкдур. Мениң сизе айдян сөзлерим Мукаддес Рухдандыр ве яшайыш берйәндир.

⁶⁴ Йөне сизиң араңызда кәбир иман этмейәнлер бар» дийди. Чүнки Иса кимиң иман этмейәндигини ве Өзүне кимиң хайынлык этҗекдигини илкибашдан билйәрди.

⁶⁵ Ол: «Атаның Өзи гетирмесе, хич ким Маңа гелип билмез дийип, Мен сизе шонуң үчин айтдым» дийди.

⁶⁶ Шондан соң шәгиртлериниң көпүси Ондан йүз өвүрдилер ве Онуң ызына эермеги бес этдилер.

⁶⁷ Шонда Иса Онкилерден: «Сиз хем Мени терк этмекчимисиңиз?» дийип сорады.

⁶⁸ Симун Петрус Оңа: «Агам, биз Сени терк эдип, башга киме баралы? Бакы яшайыш сөзлери диңе Сенде ахырын.

⁶⁹ Биз Сениң Худайың Мукаддесидигиңе ынанярыс ве муны анык билйәрис» дийип җогап берди.

⁷⁰ Иса олара: «Сиз Онкилери Өзүм сайлап алмадыммы? Муңа гарамаздан, араңыздан бири иблисдир» дийип җогап берди.

⁷¹ Ол муны Симун Искариодың оглы Юданы гөз өңүнде тутуп айтды. Себәби Юдас Онкилериң бири болса-да, соңра Иса хайынлык этди.