Ёханна 3 - Мукаддес Китап

3‑нҗи бап Иса билен Никодим

¹ Фарисейлериң арасында Никодим атлы бир адам барды, ол яхудыларың меҗлисиниң бир агзасыды.

² Ол бир гүн гиҗе Исаның янына гелип: «Я Рабби, биз сениң Худайдан гелен бир мугаллымдыгыңы билйәрис. Чүнки Худайың Өзи сениң билен болмадык болса, бейле гудратлы аламатлары гөркезип билмездиң» дийди.

³ Иса оңа: «Хакыкатдан хем, гайтадан догулмадык адам Худайың Шалыгыны гөрүп билмез» дийип җогап берди.

⁴ Никодим Оңа: «Гарран адам нәдип гайтадан доглуп билер? Ол ене-де энесиниң гөвресине гирип, тәзеден доглуп билмез ахыры!» дийди.

⁵ Иса шейле җогап берди: «Хакыкатдан хем, сувдан ве Мукаддес Рухдан догулмадык адам Худайың Шалыгына гирип билмез.

⁶ Беденден доглан бедендир, Мукаддес Рухдан доглан рухдур.

⁷ Саңа гайтадан догулмалысың диййәниме гең галма.

⁸ Ел ислән тарапына өвүсйәр, сен онуң шуввулдысыны эшидйәрсиң-де, ниреден гелип, нирә баряныны билмейәрсиң. Мукаддес Рухдан догланлар хем шейледир».

⁹ Никодим Ондан: «Бу нәхили бейле болуп билйәр?» дийип сорады.

¹⁰ Иса оңа шейле җогап берди: «Сен Ысрайылың мугаллымы болубам, булары билеңокмы?!

¹¹ Хакыкатдан хем, биз биленимизи айдярыс, гөренимизе шаятлык эдйәрис, эмма сиз бизиң шаятлыгымызы кабул этмейәрсиңиз.

¹² Мениң ердәки затлар барада айдянларыма ынанмасаңыз, онда гөкдәки затлар барада айтсам, нәхили ынанаркаңыз?

¹³ Хич ким гөге чыкан дәлдир; оңа диңе гөкден инен Ынсан Оглы чыкандыр.

¹⁴ Мусаның чөлде йыланы ёкары гөтериши ялы, Ынсан Оглы-да ёкары гөтерилмелидир.

¹⁵ Шоңа гөрә Оңа иман эден хер бир адам бакы яшайша говшар».

¹⁶ Худай дүнйәни өрән сөендиги себәпли Өзүниң еке-тәк Оглуны берди. Ол муны Оглуна иман эденлериң хич бири хеләк болман, бакы яшайша говушмагы үчин этди.

¹⁷ Худай Оглуны дүнйәни хөкүм этмек үчин дәл-де, эйсем дүнйә Ол аркалы халас болсун дийип иберди.

¹⁸ Оңа иман эден хөкүм эдилмез. Эмма иман этмедик эййәм хөкүм эдилендир, себәби ол Худайың еке-тәк Оглуна иман этмеди.

¹⁹ Хөкүм, ине, шейле субутнама эсасланяр: дүнйә Нур гелди, эмма адамлар гараңкылыгы Нурдан хас говы гөрдүлер, себәби оларың ишлери яманлыкды.

²⁰ Яманлык эдйән адам Нуры йигренйәндир, өз эдйән писликлериниң әшгәр болмагындан горкуп, Нура якынлашян дәлдир.

²¹ Эмма хак иш эдйән адам Нура якынлашяр. Шейдип, онуң ишлериниң Худайың хакы үчин эдилйәндиги әшгәр боляр.

Яхяның Иса барадакы шаятлыгы

²² Шундан соң Иса шәгиртлери билен Яхудыя этрабына гитди. Иса олар билен бирнәче вагтлап шол ерде галды ве ол ерде адамлары сува чүмдүрди.

²³ Шол вагт Салимиң голайындакы Энонда болса халк Яхя тарапындан чүмдүрилйәрди. Ол ерде сув көпди ве чүмдүрилмек үчин ол ере гелйән адамларың ызы үзүленокды.

²⁴ Бу вакалар Яхя зындана салынмаздан өң болуп гечди.

²⁵ Шол махал Яхяның шәгиртлери билен бир яхудының арасында ювнуп-пәкизленме дессуры барада җедел турды.

²⁶ Олар Яхяның янына гелип: «Эй, мугаллым, Иорданың бейлеки тарапында сен бир Адам барада шаятлык эдипдиң, ине, шол Адам халкы сува чүмдүрйәр. Хеммелер Онуң янына барярлар» дийдилер.

²⁷ Яхя олара шейле җогап берди: «Гөкден берилмесе, ынсан хич зат эдип билмез.

²⁸ „Мен Месих дәл, мен диңе Онуң өңүнден иберилдим“ диениме сизиң өзүңиз шаятсыңыз.

²⁹ Гелин гиеве дегишлидир. Гиевиң досты болса, гиевиң гелерине гарашып, онуң сесини эшиденинде җуда шатланяндыр. Хут шонуң ялы мениң шатлыгым-да инди хасыл болды.

³⁰ Ол бейгелмелидир, мен песелмелидирин.

³¹ Ёкардан гелен хеммеден ёкарыдыр. Ерден болан ериңкидир, ердәки затлар барада геплейәндир. Гөкден гелен хеммеден үстүндир.

³² Ол гөренине, эшиденине шаятлык эдйәр, йөне Онуң шаятлыгыны хич ким кабул этмейәр.

³³ Эмма Онуң шаятлыгыны кабул эден киши Худайың хакдыгыны тассыклаяндыр.

³⁴ Худайың Иберени Худайың сөзлерини сөзлейәндир, себәби Худай Оңа Мукаддес Рухы өлчегсиз берйәр.

³⁵ Ата Оглы сөййәр ве Ол хемме зады Онуң элине табшырандыр.

³⁶ Огла иман эдйән адам бакы яшайша эе боляр, эмма Оглы рет эден адам бакы яшайша говушмаз, ол Худайың газабына дучар боляр».