Ёханна 21 - Мукаддес Китап

21‑нҗи бап Иса көлүң кенарында

¹ Бу вакалардан соң, Иса Тиберия көлүниң кенарында ене шәгиртлерине гөрүнди. Бу шейле болды:

² Симун Петрус, Экиз лакамлы Томас, Җелиләниң Кана шәхеринден болан Натанаел, Зебедейиң огуллары ве Исаның шәгиртлеринден ене икиси бир ере үйшүпдилер.

³ Симун Петрус олара: «Мен балык тутмага гидйәрин» дийди. Олар-да: «Биз хем сениң билен гитҗек» дийдилер-де, гайыга мүнүп гитдилер, йөне шол гиҗе хич зат тутуп билмедилер.

⁴ Гүн доганда, Иса кенарда дурды, йөне шәгиртлери Онуң Исадыгыны билмедилер.

⁵ Иса олардан: «Эй, достлар, иймәге задыңыз бармы?» дийип сорады. Олар: «Ёк» дийип җогап бердилер.

⁶ Иса олара: «Торуңызы гайыгың саг тарапына ташлаң, тутарсыңыз» дийди. Олар торы саг тарапа ташладылар велин, шейле бир көп балык тутдулар, хатда балыгың көплүгинден яңа торы чекип чыкарыбам билмедилер.

⁷ Шонда Исаның сөйгүли шәгирди Петруса йүзленип: «Бу Реб Исадыр!» дийди. Симун Петрус Онуң Ребдигини эшиден бадына эгниндәки көйнегиниң этегини гушагына гысдырып, өзүни көле оклады.

⁸ Бейлеки шәгиртлер болса балыкдан долы торы чекип, гайык билен йүзүп гелдилер. Олар кенардан узак дәлдилер, онуң ики йүз әдим чемеси голайындадылар.

⁹ Олар гуры ере чыканларында, чөрек ве көзүң үстүнде бишип дуран балык гөрдүлер.

¹⁰ Иса олара: «Инди тутан балыкларыңыздан гетириң» дийди.

¹¹ Симун Петрус гайыга мүнүп, ичинде йүз элли үч саны уллакан балыкдан долы торы кенара чыкарды. Балык шейле көп болса-да, тор йыртылманды.

¹² Иса олара: «Ханы, гелиң, эртирлик эдиниң» дийди. Ондан: «Сен ким?» дийип сорамага шәгиртлериң хич бири милт эдип билмеди. Олар Онуң Ребдигини билйәрдилер.

¹³ Иса оларың янына гелди-де, чөреги алып, олара берди, балыгы хем шейле этди.

¹⁴ Бу Исаның диреленден соң, шәгиртлерине үчүнҗи гезек гөрнүшиди.

Исаның Петрус билен сөхбеди

¹⁵ Олар нахар эдинип боланларындан соң, Иса Симун Петрусдан: «Эй, Ёханнаның оглы Симун, сен Мени булардан артык сөййәрсиңми?» дийип сорады. Симун Оңа: «Хава, я Реб, Сени сөййәндигими Өзүң билйәнсиң» дийди. Иса оңа: «Гузуларымы отлат» дийди.

¹⁶ Иса икинҗи гезек ондан ене: «Эй, Ёханнаның оглы Симун, сен, хакыкатдан хем, Мени сөййәрсиңми?» дийип сорады. Ол хем Иса: «Хава, я Реб, Сени сөййәндигими Өзүң билйәнсиң» дийип җогап берди. Иса оңа: «Гоюнларымы бак» дийди.

¹⁷ Иса ене-де ондан: «Эй, Ёханнаның оглы Симун, Мени сөййәрсиңми?» дийип, үчүнҗи гезек сорады. Исаның «Мени сөййәрсиңми?» дийип үчүнҗи гезек сораны үчин, Петрус гусса батды. Ол Иса: «Я Реб, Сен әхли зады билйәнсиң, Сени сөййәними-де билйәнсиң» дийди. Иса оңа: «Гоюнларымы отлат.

¹⁸ Мен саңа догрусыны айдярын, яшкаң өзүң билиңи гушап, ислән ериңе гидйәрдиң. Гарраныңда велин, эллериңи узадып дурарсың, сени башга бири гушандырып, ислемейән ериңе алып гидер» дийди.

¹⁹ Иса булары Петрусың нәхили өлүм билен өлүп, Худайы шөхратландырҗакдыгыны билдирмек үчин айтды. Муны айдандан соңра оңа: «Мениң ызыма дүш» дийди.

²⁰ Петрус ызына середенде, Исаның сөйгүли шәгирдиниң хем өз ызларына дүшүп гелйәнини гөрди. Бу шәгирт агшамлык нахары вагтында Иса япланып, Ондан: «Агам, Саңа хайынлык этҗек адам ким?» дийип соран шәгиртди.

²¹ Петрус оны гөрүп, Исадан: «Я Реб, онуң ыкбалы нәхили болар?» дийип сорады.

²² Иса оңа: «Өзүм доланып гелйәнчәм, онуң дири галмагыны ислейән болсам, саңа нәме? Сен Мениң ызыма дүш» дийип җогап берди.

²³ Шу себәпден иманлы доганларың арасында бу шәгирт өлмез диен гүррүң яйрады. Эмма Иса онуң өлмеҗекдиги барада айтманды, Ол Петруса диңе: «Өзүм доланып гелйәнчәм, онуң дири галмагыны ислейән болсам, саңа нәме?» дийипди.

²⁴ Бу затлара шаят болуп, шулары язан шол шәгиртдир. Биз онуң шаятлыгының хакыкатдыгыны билйәрис.

²⁵ Иса башга-да көп ишлер этди. Булар бирин-бирин язылан болса, онда ол китаплар, мениң пикиримче, тутуш әлеме-де сыгмазды.