Ёханна 2 - Мукаддес Китап

2‑нҗи бап Иса сувы шераба өвүрйәр

¹ Шондан ики гүн геченсоң, Җелиләниң Кана шәхеринде той болды. Исаның эҗеси-де шол ердеди.

² Иса билен шәгиртлери хем тоя чагырылыпды.

³ Шерап гутарыберенде, эҗеси Иса йүзленип: «Оларың шерабы гутарыпдыр» дийди.

⁴ Иса оңа: «Эй, хатын, мунуң Маңа нәме дахылы бар? Мениң вагтым энтек геленок» дийип җогап берди.

⁵ Эҗеси хызматкәрлере: «Ол сизе нәме дийсе, шоны хем эдиң» дийди.

⁶ Шол ерде яхудыларың ювнуп-пәкизленме дессуры үчин улы гөврүмли алты саны хум барды.

⁷ Иса хызматкәрлере: «Хумлары сувдан долдурың» дийди. Олар хумлары эрңегине ченли долдурдылар.

⁸ Онсоң хызматкәрлере: «Инди шулардан гуюп, тоюң беемчисине әкидиң» дийди. Олар әкитдилер.

⁹ Тоюң беемчиси шераба өврүлен сувуң ниреден геленини билмейәрди, муны диңе сувы гуян хызматкәрлер билйәрди. Ол бу шерапдан дадып гөрди ве өйленйән йигиди чагырып, оңа:

¹⁰ «Хеммелер сачага илки билен оңат шерабы гойярлар. Мыхманлар ичип доянларындан соң, арзан шерабы берйәрлер. Сен болса оңат шерабы шу вагта ченли саклап гоюпсың!» дийди.

¹¹ Бу Исаның илкинҗи гөркезен гудратлы аламатыды. Ол муны Җелиләниң Кана шәхеринде гөркезип, Өз шөхратыны аян этди. Муны гөрен шәгиртлери Оңа иман этдилер.

¹² Бу вакадан соң Иса эҗеси, инилери, шәгиртлери билен биле Капернаума гидип, ол ерде бирнәче гүн галды.

Иса сатыҗылары ыбадатханадан ковяр

¹³ Яхудыларың Песах байрамының голайлашяндыгы үчин Иса Иерусалиме гитди.

¹⁴ Ол ыбадатхананың ховлусында сыгыр, гоюн, кепдери сатянлары, шейле хем пул чалшып отуранлары гөрди.

¹⁵ Иса йүпден дүрре ясап, мал-гаралары билен бирликде хеммәни гамчылап, ыбадатханадан ковуп чыкарды, пул чалышянларың текҗелерини агдарып, пулларыны ере сечип гойберди.

¹⁶ Ол кепдери сатянлара: «Булары бу ерден ёк эдиң! Атамың өйүни базара өвүрмәң!» дийди.

¹⁷ Шонда Онуң шәгиртлери Мукаддес Язгылардакы «Сениң өйүңе болан ыхлас мени көйдүрер» дийлен сөзлери ятладылар.

¹⁸ Онсоң яхудыларың баштутанлары Ондан: «Сениң бейтмәге нәме хакың бар? Эгер хакың бар болса, гудрат гөркезип, муны бизе субут эт» дийип талап этдилер.

¹⁹ Иса олара: «Бу ыбадатхананы йыкың, Мен оны үч гүнде дикелдерин» дийип җогап берди.

²⁰ Ёлбашчылар: «Бу ыбадатхана кырк алты йылда гурулды, Сен болса оны инди үч гүнде дикелтҗекми?» дийдилер.

²¹ Эмма Иса ыбадатхана дийип, Өз беденине айдярды.

²² Иса өлүмден диреленден соң, шәгиртлери Онуң бу айданыны ятлап, Мукаддес Язгылара ве Исаның сөзлерине ынандылар.

²³ Иса Иерусалимде Песах байрамында боланда, көп адамлар Онуң гөркезен гудратларыны гөрүп, Оңа иман этдилер.

²⁴ Эмма Иса әхли адамларың йүрегини биленсоң, Өзүни олара ынанмаярды.

²⁵ Ынсан бабатда Оңа хич кимиң шаятлыгы герек дәлди, себәби Ол ынсаның нәме ниетиниң бардыгыны билйәрди.