Ёханна 19 - Мукаддес Китап

19-нҗы бап Иса өлүме хөкүм эдилйәр

¹ Соңра Пилат Исаны тутуп гамчылатды.

² Эсгерлер тикенден тәч өрүп, Онуң башына гейдирдилер, эгнине гырмызы дон япдылар.

³ Янына барып: «Яшасын яхудыларың Патышасы!» дийшип, Онуң дулугына шарпык чалдылар.

⁴ Пилат ене дашары чыкып, яхудылара: «Ине, Оны сизиң өңүңизе гетирйәрин. Ондан хич бир айып тапмандыгымы билип гоюң» дийди.

⁵ Шол вагт башы тикенден тәчли, эгни гырмызы донлы Иса дашары чыкды. Пилат олара: «Ине, ол Адам!» дийди.

⁶ Ёлбашчы руханылар билен баштутанлар Исаны гөрүп: «Оны хача чүйле, хача чүйле!» дийип гыгырышдылар. Пилат олара: «Оны әкидип, өзүңиз хача чүйләң. Мен-ә Ондан хич бир язык тапмадым» дийди.

⁷ Яхудыларың баштутанлары: «Бизиң бир канунымыз бар, шол канун боюнча Ол өлмели, себәби Ол Өзүни Худайың Оглы дийип атландыряр» дийдилер.

⁸ Бу сөзлери эшидип, Пилат өрән горкды.

⁹ Ол тәзеден өзүниң хәкимлик җайына гирип, Исадан: «Сен нирели?» дийип сорады. Эмма Иса оңа җогап бермеди.

¹⁰ Пилат Оңа: «Сен мениң билен геплешмекден йүз өвүрйәңми? Сени бошатмага-да, хача чүйлемәге-де мениң ыгтыярымың бардыгыны билеңокмы?» дийди.

¹¹ Иса оңа: «Эгер саңа ёкардан берилмедик болсады, Мениң үстүмден хич хили ыгтыярың болмазды. Шонуң үчин хем, Мени тутуп, сениң элиңе берениң гүнәси хас-да агырдыр» дийип җогап берди.

¹² Шундан соң Пилат Исаны бошатмага сынанышды. Эмма яхудыларың баштутанлары гыгырышып: «Оны бошатсаң, сен императорың досты дәлсиң. Ким-де ким өзүни патыша сайса, ол императора гаршыдыр» дийдилер.

¹³ Пилат бу сөзлери эшидип, Исаны дашары алып чыкды ве Даш секи дийилйән ерде хөкүм күрсүсинде отурды. Бу ериң арамейче ады Габбатады.

¹⁴ Песах байрамына тайярлык гүнүди. Гүнортана голай Пилат яхудылара йүзленип: «Ине, сизиң Патышаңыз!» дийди.

¹⁵ Олар: «Гүм эт Оны! Ёк эт! Оны хача чүйле!» дийип гыгырышдылар. Пилат олардан: «Патышаңызы хача чүйләйинми?» дийип сорады. Ёлбашчы руханылар: «Бизиң императордан башга патышамыз ёкдур» дийип җогап бердилер.

¹⁶ Ахыры Пилат Исаны хача чүйлемек үчин, Оны эсгерлериң элине табшырды.

Иса хача чүйленйәр

¹⁷ Эсгерлер Исаны алып гитдилер. Иса хачыны Өзи гөтерип, Келлечанак дийилйән ере гелди. Бу ериң арамейче ады Голготады.

¹⁸ Ол ерде Исаны ве Онуң билен биле ене ики адамы хача чүйледилер: оларың бири – Онуң саг тарапында, бейлекиси чеп тарапындады, Иса болса ортадады.

¹⁹ Пилат бир тагтаның йүзүне язгы яздырып, оны хачың ёкарсындан асдырды. Тагтада: «ЯХУДЫЛАРЫҢ ПАТЫШАСЫ НАСЫРАЛЫ ИСА» дийлип языланды.

²⁰ Исаның хача чүйленен ериниң шәхере голайдыгы үчин, язгыны көп яхудылар окадылар. Ол еврейче, грекче ве латынча язылыпды.

²¹ Яхудыларың ёлбашчы руханылары Пилата: «Муны „Яхудыларың Патышасы“ дийип язма-да, „Өзүни Мен яхудыларың Патышасы дийип атландырды“ дийип яз» дийдилер.

²² Пилат олара: «Эййәм язҗагымы яздым» дийип җогап берди.

²³ Исаны хача чүйлән эсгерлер Онуң эгин-эшигини алдылар. Онуң гейимлерини дөрт бөлеге бөлүп, хер эсгере бир пай бердилер. Ички көйнегини хем алдылар. Ички көйнек тикилги дәл-де, бойдан-баша тутуш докалгыды.

²⁴ Эсгерлер бири-бирине: «Гелиң, муны йыртмалың, муңа биҗе аталың, кимиң биҗеси чыкса, шол алар» дийдилер. Бу Мукаддес Язгылардакы: «Өзара пайлашярлар гейимлерими, эгинбашым үчин биҗе атярлар» диен сөзлериң берҗай болмагы үчин шейле болды. Эсгерлер шейле хем этдилер.

²⁵ Исаның хачының янында Онуң эҗеси, дайзасы, Клопасың аялы Меръем ве магдалалы Меръем дагы дурды.

²⁶ Иса эҗесини ве онуң янында дуран сөйгүли шәгирдини гөрүп, эҗесине: «Эй, зенан, бу сениң оглуңдыр» дийди.

²⁷ Онсоң шәгирде гарап: «Бу-да сениң эҗеңдир» дийди. Шондан соң яңкы шәгирт оны өз өйүне алды.

Исаның өлүми

²⁸ Онсоң Иса әхли задың тамам болуп баряныны билип, Мукаддес Язгыларың берҗай болмагы үчин, «Сувсадым» дийди.

²⁹ Эсгерлер сиркеден долы күйзә бир эсгини батырып, кәкилик отуның балдагына даңдылар-да, ичирҗек болуп, оны Исаның агзына етирдилер.

³⁰ Иса сиркеден дадып: «Хеммеси берҗай болды!» дийди ве башыны эгип җан берди.

³¹ Шол гүн Тайярлык гүнүди, эртеси болса эсасы гүн – Сабат гүнүди. Шол себәпден Сабат гүни җесетлер хачда галмаз ялы, яхудыларың баштутанлары Пилатдан хача чүйлененлериң инҗиклерини дөвүп, җесетлери ашак дүшүртмеги хайыш этдилер.

³² Шонуң үчин хем, эсгерлер барып, илки билен Исаның гапдалында хача чүйленен биринҗи адамың, соңра икинҗи адамың инҗиклерини дөвдүлер.

³³ Эмма Исаның янына геленлеринде, Онуң эййәм өлендигини гөрүп, инҗиклерини дөвмедилер.

³⁴ Муңа гарамаздан, эсгерлериң бири найза билен Онуң бөврүни дилди, шобада ондан ган билен сув чогдурылды.

³⁵ Муны гөрен адам шаят болды, онуң шаятлыгы хакдыр. Ол сизиң иман этмегиңиз үчин, өзүниң догры сөзлейәндигини билйәндир.

³⁶ Бу иш «Онуң екеҗе сүңки хем дөвүлмез» диен Мукаддес Язгыларың берҗай болмагы үчин болды.

³⁷ Мукаддес Язгыларың башга бир еринде болса: «Олар өзлериниң дешим-дешим эденине середерлер» дийилйәр.

Иса җайланяр

³⁸ Онсоң Исаның шәгирди болан, йөне яхудылардан горкуп, муны яшырып йөрен ариматиялы Юсуп Онуң җеседини хачдан дүшүрип алмага Пилатдан ругсат сорады. Пилат оңа ругсат берди. Ол барып, Исаның җеседини хачдан дүшүрип алды.

³⁹ Озал гиҗәниң ичинде Исаның янына баран Никодим хем Юсуп билен биледи. Никодим җеми аграмы ики пут болан гарышык мүр билен алоэ алып гелди.

⁴⁰ Ол икиси Исаның җеседини гетирип, яхудыларың җайлама адаты боюнча Оны якымлы ыслы яг сепилен кепене доладылар.

⁴¹ Исаның хача чүйленен еринде бир баг барды. Ол багда хениз хич ким җайланмадык бир тәзе мазар барды.

⁴² Шол гүн яхудыларың Сабат гүнүне тайярлык гүнүди. Шонуң үчин мазар голай болансоң, Исаның җеседини шол мазарда гойдулар.