Ёханна 18 - Мукаддес Китап

18‑нҗи бап Иса тутуляр

¹ Бу затлары айдып болансоң, Иса шәгиртлери билен Кидрон дересинден гечип, ол ердәки зейтун багына гирди.

² Шәгиртлери билен Иса шол ерде йыгы-йыгыдан душушып дурярды. Шоңа гөрә, Оңа хайынлык эден Юдас хем ол ери билйәрди.

³ Ол Рим эсгерлериниң бир бөлүми билен бирликде ёлбашчы руханыларың ве фарисейлериң иберен гаравулларыны алып гелди. Оларың эллери чыралы, пануслы ве ок-яраглыды.

⁴ Иса Өз башына дүшҗек әхли зады билйәрди. Шонуң үчинем өңе чыкып, олардан: «Кими гөзлейәрсиңиз?» дийип сорады.

⁵ Олар Оңа: «Насыралы Исаны» дийип җогап бердилер. Иса олара: «Шол Мендирин» дийди. Оңа хайынлык эден Юдас-да олар билен дурды.

⁶ Иса олара: «Шол Мендирин» диенде, олар ыза чекилип, ере йыкылдылар.

⁷ Иса олардан ене: «Кими гөзлейәрсиңиз?» дийип сорады. Олар: «Насыралы Исаны» дийдилер.

⁸ Иса олара: «Мен сизе „Шол Мендирин“ дийдим ахырын. Мени гөзлейән болсаңыз, булары гойбериң, гитсинлер» дийди.

⁹ Иса муны «Маңа беренлериңден хич бирини йитирмедим» диен сөзлериниң берҗай болмагы үчин айтды.

¹⁰ Шол вагт Симун Петрус гылыҗыны гынындан чыкарды-да, баш руханының хызматкәрини уруп, саг гулагыны кесди. Ол хызматкәриң ады Малхусды.

¹¹ Иса Петруса: «Гылыҗыңы гынына сал. Атамың Маңа берен хасрат кәсесинден ичмәйинми?» дийди.

¹² Онсоң эсгерлер, оларың харбы серкердеси ве яхуды гаравуллары Исаны тутуп, элини-аягыны даңдылар.

¹³ Оны илки Хананың янына алып бардылар. Ханан шол йыл баш руханы сайланан Каяфаның гайынатасыды.

¹⁴ Халк үчин бир адамың өлмеги бәхбитлидир дийип, яхудылара маслахат берен хем Каяфады.

Петрус Исаны инкәр эдйәр

¹⁵ Симун Петрус билен ене бир шәгирт Исаның ызына дүшүп гитдилер. Яңкы шәгирт баш руханы билен өңден таныш болансоң, ол Иса билен биле баш руханының ховлусына гирди.

¹⁶ Йөне Петрус дашарда, гапының агзында дурды. Онсоң баш руханы билен таныш шәгирт дашары чыкды-да, гапыны саклаян аяла бир затлар айдып, Петрусы ичери салды.

¹⁷ Гапыны саклаян аял Петруса: «Сенем бу Адамың шәгиртлеринден-ә дәлсиң?» дийип сорады. Ол: «Ёк» дийип җогап берди.

¹⁸ Хованың совук боланы үчин хызматкәрлер ве гаравуллар от якып, чоюнып дурдулар. Петрус хем оларың янында йылнып дурды.

Баш руханы Исаны сораг эдйәр

¹⁹ Баш руханы Исадан Онуң шәгиртлери ве таглыматы барада сораярды.

²⁰ Иса оңа җогап берип: «Мен дүнйә әхли зады ач-ачан айтдым. Әхли яхудыларың йыгнанян синагогаларында ве ыбадатханада хемише өвретдим, гизлинликде хич зат айтмадым.

²¹ Нәме үчин Менден сораярсың? Нәме айданымы эшиденлерден сора. Олар Мениң нәме диеними билйәндирлер» дийди.

²² Бу затлары айдып болансоң, шол ерде дуран гаравулларың бири Исаның дулугына бир шапбат чалып: «Баш рухана шейле җогап берйәрсиңми?» дийди.

²³ Иса оңа: «Мен нәдогры айдан болсам, мунуң нәдогрудыгыны субут эт. Эгер догры айдан болсам, онда нәме үчин Мени урярсың?» дийди.

²⁴ Онсоң Ханан Исаның элини даңдырып, Оны баш руханы Каяфаның янына иберди.

Петрус Исаны ене инкәр эдйәр

²⁵ Симун Петрус ол ерде ода чоюнып дурды. Ондан: «Сенем Онуң шәгиртлеринден-ә дәлсиң?» дийип сорадылар. Эмма ол: «Ёк» дийип инкәр этди.

²⁶ Ол ерде баш руханының хызматкәрлеринден бири Петрусың гулагыны кесен адамың гарындашыды. Ол хызматкәр: «Мен сени багда Онуң билен биле гөрмедимми нәме?» дийди.

²⁷ Петрус ене инкәр этди, эдил шол вагт хораз гыгырды.

Иса Пилатың өңүнде

²⁸ Онсоң яхудылар Исаны Каяфаның янындан Рим хәкиминиң җайына алып бардылар. Шол вагт даң атыпды. Песах нахарындан ийип билер ялы ве дини дәп-дессурлары бозмазлык үчин яхудылар хәкимиң җайына гирмедилер.

²⁹ Шейлеликде, Пилатың өзи оларың янына гелип: «Бу Адамы нәмеде айыплаярсыңыз?» дийип сорады.

³⁰ Олар: «Бу Адам җенаятчы болмадык болса, Оны тутуп, сениң яныңа гетирмездик» дийип җогап бердилер.

³¹ Пилат олара: «Бейле болса, Оны әкидиң-де, өз кануныңыз боюнча хөкүм чыкарыбериң» дийди. Яхудылар Пилата: «Бизиң кимдир бирини өлүме хөкүм этмәге хакымыз ёк» дийдилер.

³² Бу Исаның Өзүниң нәхили өлүм билен өлҗекдиги барада өңден айдан сөзлериниң берҗай болмагы үчинди.

³³ Онсоң Пилат ене өз җайына гирди-де, Исаны чагырып, Ондан: «Сен яхудыларың Патышасымы?» дийип сорады.

³⁴ Иса ондан: «Муны өзүңден айдярсыңмы я-да Мен хакда саңа башгалар айтдымы?» дийип сорады.

³⁵ Пилат Иса: «Эйсем мен яхудымы нәме? Сени маңа Өз халкың билен ёлбашчы руханылар тутуп гетирдилер. Сен нәме иш этдиң?» дийди.

³⁶ Иса оңа: «Мениң Патышалыгым бу дүнйәден дәл. Эгер Мениң Патышалыгым бу дүнйәден болсады, онда хызматкәрлерим Мени яхудыларың элине бердирмеҗек болуп гөрешердилер. Эмма Мениң Патышалыгым башга ердендир» дийди.

³⁷ Пилат Оңа: «Диймек, Сен Патыша-да?» дийди. Иса оңа: «Патышадыгымы өзүң айдып дурсуң. Мен хакыката шаятлык этмек үчин догулдым, шонуң үчин хем дүнйә гелдим. Хакыкатың тарапдары болан хер бир адам Маңа гулак асар» дийип җогап берди.

³⁸ Пилат Ондан: «Хакыкат нәме?» дийип сорады. Муны диенден соң, ол ене яхудыларың янына чыкып, олара: «Мен Ондан хич бир язык тапмадым.

³⁹ Эмма сизиң бир адатыңыз бар, шол адат боюнча хер йыл Песах байрамында мен бир адамы туссаглыкдан бошадярдым. Инди сизиң үчин яхудыларың Патышасыны бошатмагымы ислейәрсиңизми?» дийди.

⁴⁰ Шонда олар: «Оны дәл, бизе Бараббасы бошат!» дийип гыгырышдылар. Бараббас болса бир гозгалаңчыды.