Ёханна 16 - Мукаддес Китап

16-нҗы бап

¹ Мен сизе бу затлары имандан дәнмезлигиңиз үчин айтдым.

² Сизи синагогалардан коварлар. Шейле бир дөвүр гелер, сизи өлдүрмек билен хер бир киши Худая хызмат эдйәндирин өйдер.

³ Олар бу ишлери Атам билен Мени танамаяндыклары үчин эдерлер.

⁴ Булары Мен сизе хәзирден айдып гойярын. Вагты геленде, булары сизе айдандыгымы ядыңыза саларсыңыз. Сизе булары илкибашда гүррүң бермедим, себәби Өзүм сизиң билен биледим.

Мукаддес Рухуң хызматы

⁵ Инди болса Мен Өзүми Иберениң янына гидйәрин. Сизиң хич бириңиз Менден: «Нирә гидйәрсиң?» дийип сорамаярсыңыз.

⁶ Муңа дерек бу затлары айданым үчин сизиң йүрегиңиз гайгы-гама батды.

⁷ Эмма Мен сизе хакыкаты сөзлейәрин: Мениң гитмегим сизиң үчин бәхбитдир. Мен гитмесем, Хемаятчы сизе гелмез, гитсем велин, Оны сизе иберерин.

⁸ Хемаятчы гелен вагты дүнйәниң гүнә, адалат ве хөкүм бабатда нәхакдыгыны субут эдер.

⁹ Гүнә барадакы хакыкат шундан ыбарат: адамлар Маңа ынанмаярлар.

¹⁰ Адалат бабатда болса, Мен Атамың янына гидйәрин ве мундан бейләк сиз Мени гөрмерсиңиз.

¹¹ Хөкүм бабатда айтсам, бу дүнйәниң хөкүмдары шейтан хөкүм эдилендир.

¹² Сизе айтҗак ене көп затларым бар, эмма мундан артыгы аңыңыза сыгмаз.

¹³ Эмма Хакыкат Рухы гелен вагты сизи тутуш хакыката алып гидер. Ол Өз-Өзүнден геплемез, нәме эшитсе, шоны гепләр ве гелҗек затлары сизе аян эдер.

¹⁴ Ол Мени шөхратландырар, себәби Менден эшиден затларыны сизе аян эдер.

¹⁵ Атамың әхли затлары Мениңкидир. Шонуң үчин Менден эшиден затларыны сизе аян эдер дийдим.

¹⁶ «Аз вагтдан соң сиз Мени гөрмерсиңиз, эмма көп вагт гечмәнкә, ене Мени гөрерсиңиз».

Гайгыңыз шатлыга өврүлер

¹⁷ Шонда Исаның кәбир шәгиртлери бири-бирине: «Онуң: „Аз вагтдан соң Мени гөрмерсиңиз, эмма көп вагт гечмәнкә, ене Мени гөрерсиңиз“, шейле хем: „Мен Атамың янына гидйәрин“ диен сөзлери нәме аңладярка?» дийишдилер.

¹⁸ Олар сөзүни довам эдип: «Аз вагтдан соң Мени гөрмерсиңиз дийдиги нәмекә? Онуң нәме диймекчи болянына биз-ә дүшүнмейәрис» дийдилер.

¹⁹ Иса Өзүне сораг бермек ислейәндиклерини билип, шейле дийди: «Аз вагтдан соң Мени гөрмерсиңиз, эмма көп вагт гечмәнкә, ене Мени гөрерсиңиз диййәним үчин бири-бириңизе сораг берйәрсиңизми?

²⁰ Сизе догрусыны айдярын, сиз аглап яс тутарсыңыз, дүнйә болса шатланар. Сиз гайга батарсыңыз, йөне гайгыңыз шатлыга өврүлер.

²¹ Аял догурҗак вагты агыры чекйәндир, себәби айы-гүни доландыр. Эмма чага догландан соң, ол чаганың дүнйә иненлигиниң шатлыгы билен гайгы-гуссаны унудар.

²² Сиз хем шейлесиңиз, хәзир гам-гусса чекйәрсиңиз, эмма Мен сизи ене гөрерин, шонда гөвнүңиз галкынар, хич ким сизден шатлыгыңызы алып билмез.

²³ Шол гүн Менден хич зат сорамарсыңыз. Сизе догрусыны айдярын, Мениң адым билен Атадан нәме дилесеңиз, Ол сизе берер.

²⁴ Шу вагта ченли сиз Мениң адымдан хич зат дилемедиңиз. Диләң, аларсыңыз, шатлыгыңыз долуп-дашар.

²⁵ Мен бу затлары сизе тымсаллар аркалы айтдым, йөне вагт гелер, Мен тымсаллар билен геплемән, Атам барада ач-ачан гүррүң берерин.

²⁶ Шол гүн Атамдан Мениң адым билен өзүңиз диләрсиңиз. Мениң сизиң үчин Атамдан дилемегимиң хаҗаты болмаз.

²⁷ Чүнки Атамың Өзи сизи сөййәр, себәби сиз Мени сөйүп, Мениң Худайдан гелендигиме ынандыңыз.

²⁸ Мен Атамың янындан гайдып, дүнйә гелдим. Инди болса дүнйәни ташлап, Атамың янына барярын».

²⁹ Исаның шәгиртлери Оңа: «Ине, инди Сен хич бир тымсалсыз, ачык сөзлейәрсиң.

³⁰ Сениң әхли затлары билйәндигиңе биз инди дүшүндик. Саңа сораг бермегиң гереги ёк. Инди биз Сениң Худайдан гелендигиңе ынанярыс» дийдилер.

³¹ Иса олара: «Инди чындан ынанярсыңызмы?

³² Ине, вагт гелер, эййәм гелди хем, әхлиңиз өйли-өйүңизе даргашып гидерсиңиз. Мени еке ташлап гидерсиңиз. Эмма Мен еке дәлдирин, себәби Атам Мениң билендир.

³³ Бу затлары сизе Менде рахатлыгыңыз болсун дийип айтдым. Бу дүнйәде гайгы-гуссаңыз болар, йөне мерт болуң. Мен дүнйәни еңдим!» дийди.