Ёханна 15 - Мукаддес Китап

15‑нҗи бап Үзүм агаҗы ве шахалар

¹ Мен хакыкы үзүм агаҗыдырын ве Атам багбандыр.

² Ол Мениң миве бермейән хер бир шахамы кесип ташлаяр, миве берйәнини болса тәмиз болар ялы ве көп миве берер ялы тимарлаяр.

³ Мениң сизе айдан сөзүм аркалы сиз биреййәм тәмизсиңиз.

⁴ Менде яшаң, Мен хем сизде яшайын. Үзүм агаҗындан айрылан шаха өз-өзүнден миве берип билмейши ялы, Менден айрылсаңыз, сиз хем миве берип билмерсиңиз.

⁵ Мен үзүм агаҗыдырын, сиз шахаларсыңыз. Ким Менде, Менем онда яшасам, ол бол миве берер. Сиз Менден үзңе хич зат эдип билмерсиңиз.

⁶ Ким Менде яшамаса, кесилен шаха кимин ташланып, гурар. Гуран шахалары болса йыгнап, ода якарлар.

⁷ Менде месген тутуп, сөзлерими йүрегиңизде сакласаңыз, нәме дилесеңиз, сизе берлер.

⁸ Сиз көп миве берип, Мениң шәгиртлеримдигиңизи гөркезерсиңиз. Бу аркалы Атам шөхратланар.

⁹ Атамың Мени сөйши ялы, Мен-де сизи сөйдүм. Мениң сөйгимде галың.

¹⁰ Мен Атамың буйрукларыны берҗай эдип, Онуң сөйгүсине вепалы болшум ялы, сиз хем буйрукларымы берҗай этсеңиз, Мениң сөйгиме вепалы боларсыңыз.

¹¹ Мен бу затлары сизе шатлыгыма шәрик болуп, шатлыгыңызың долуп-дашмагы үчин айтдым.

¹² Мениң буйругым шудур: Мен сизи нәхили сөен болсам, сиз хем бири-бириңизи шонуң ялы сөйүң.

¹³ Ким җаныны достлары үчин пида этсе, мундан бейик сөйги ёкдур.

¹⁴ Эгер буйрукларымы берҗай этсеңиз, Мениң достларым боларсыңыз.

¹⁵ Мундан бейләк Мен сизе гул диймерин, себәби гул хоҗайынының нәме эдйәнини билйән дәлдир. Мен сизе дост диййәрин, себәби Атамдан эшиден әхли затларымы сизе айтдым.

¹⁶ Сиз Мени дәл-де, Мен сизи сайладым. Мен сизиң гидип, хич солмаян миве бермегиңиз үчин сайлап-сечдим. Шоңа гөрә Мениң адым билен Атадан нәме дилесеңиз, Ол сизе берер.

¹⁷ Мениң сизе буйругым шудур: бири-бириңизи сөйүң.

Дүнйә шәгиртлери йигренйәр

¹⁸ Дүнйә сизи йигренйән болса, онуң сизден өң Мени йигренендигини билиң.

¹⁹ Дүнйәден болан болсадыңыз, дүнйә сизи өзүниңкилер кимин сөерди. Эмма сиз бу дүнйә дегишли дәлсиңиз. Мен сизи бу дүнйәден сайлап алдым. Ине, шонуң үчин хем, дүнйә сизи йигренйәр.

²⁰ Мениң сизе: «Хызматкәр хоҗайындан бейик дәлдир» диен сөзүми ядыңыза салың. Олар Мени ызарласалар, онда сизи-де ызарларлар. Мениң сөзүми берҗай этселер, сизиңкини-де берҗай эдерлер.

²¹ Олар сизе бу затларың әхлисини Мениң адым үчин эдерлер, себәби олар Мени Иберени танамаярлар.

²² Мен гелип, олара айтмадык болсадым, олар гүнәкәр болмаздылар. Инди болса билмәндиклерини баханалап билмезлер.

²³ Мени йигренйән Мениң Атамы-да йигренйәндир.

²⁴ Эгер Мен оларың арасында башга хич кимиң башармадык гудратларыны гөркезмедик болсам, гүнәде айыплы болмаздылар. Инди болса эден гудратларымы гөрселер-де, Мени хем, Атамы хем йигрендилер.

²⁵ Бу болса Мукаддес Язгыларда: «Мени нәхак ере йигрендилер» дийип язылан сөзлериң берҗай болмагы үчиндир.

²⁶ Мениң сизе Атамдан иберҗек Хемаятчым, ягны Атамдан чыкан Хакыкат Рухы геленде, Мен хакда шаятлык эдер.

²⁷ Сиз хем шаятлык эдерсиңиз, себәби башдан-аяк Мениң билен биле болдуңыз.