Ёханна 13 - Мукаддес Китап

13‑нҗи бап Иса шәгиртлериниң аягыны ювяр

¹ Песах байрамының өң яныды. Иса бу дүнйәден айрылып, Атасының янына гитмели сагадының гелендигини билйәрди. Иса бу дүнйәде Өзүниңкилери хемише сөйди, олары ахыркы гүне ченли сөйди.

² Агшамлык нахар вагтыды. Иблис эййәм Симуның оглы Юдас Искариодың калбына Иса хайынлык этмек ниетини салыпды.

³ Иса Атасының әхли зады Өз ыгтыярына берендигини, Өзүниң Худайдан гелип, Худая гитҗекдигини билйәрди.

⁴ Шонуң үчин Ол нахар башындан туруп, донуны чыкарды-да, бир яглык билен билини гушады.

⁵ Онсоң бир легене сув гуйды-да, шәгиртлериниң аякларыны ювуп, гушанан яглыгы билен сүпүрмәге дурды.

⁶ Иса Симун Петрусың янына геленде, Петрус Оңа: «Эй, Агам, Сен мениң аягымы ювҗак болярмың?» дийди.

⁷ Иса оңа: «Мениң эдйән ишиме энтек акылың чатмаяр, муңа соң дүшүнерсиң» дийди.

⁸ Петрус Оңа: «Ёк, мен Саңа аягымы асла ювдурмарын!» дийди. Эмма Иса оңа: «Эгер ювмасам, онда Мениң билен шәриклигиң болмаз» дийип җогап берди.

⁹ Симун Петрус Оңа: «Агам, онда диңе аягымы дәл, элими-де, башымы-да юв» дийди.

¹⁰ Иса оңа: «Ювнан адамың диңе аягыны ювмакдан башга хаҗаты ёкдур, тутуш бедени тәмиздир. Сиз хем тәмизсиңиз, йөне хеммәңиз дәл» дийди.

¹¹ Иса Өзүне кимиң хайынлык этҗекдигини билйәрди. Шонуң үчин-де «Хеммәңиз тәмиз дәл» дийипди.

¹² Иса оларың аякларыны ювуп боланындан соң, донуны гейди-де, ене сачак башына гечип отурды ве олара шейле дийди: «Сизе нәме эдениме дүшүнйәрсиңизми?

¹³ Сиз Маңа „Мугаллым“, „Ага“ дийип, догры айдярсыңыз, себәби Мен Шолдурын.

¹⁴ Эгер Мен сизиң Агаңыз ве Мугаллымыңыз болубам, аягыңызы юван болсам, онда сиз-де бири-бириңизиң аягыңызы ювмалысыңыз.

¹⁵ Мениң сизе эденими, сиз хем бири-бириңизе эдерсиңиз дийип, Мен сизе гөрелде гөркездим.

¹⁶ Мен сизе догрусыны айдярын, гул хоҗайындан бейик дәлдир, хабарчы-да өзүни иберенден бейик дәлдир.

¹⁷ Эгер бу затлара дүшүнип, олары берҗай этсеңиз, багтлы боларсыңыз.

Юдасың Иса хайынлык этҗекдиги барадакы гүррүң

¹⁸ Мен сизиң хеммәңиз хакда айтмаярын. Мен Өз сайланларымы билйәрин. Эмма, гой, бу Мукаддес Язгылардакы: „Хатда дузумы иен маңа хайынлык этди“ диен сөзлер берҗай болсун.

¹⁹ Мен сизе нәме болҗагыны өңүнден айдярын. Булар амала ашан вагты сиз Мениң кимдигиме гөз етирерсиңиз, Маңа ынанарсыңыз.

²⁰ Сизе догрусыны айдярын, Мениң иберен адамымы кабул эден Мени кабул эдйәндир, Мени кабул эден болса, Мени Иберени кабул эдйәндир».

²¹ Бу затлары айдандан соң, Исаның йүрегини гусса гаплады. Ол: «Хакыкатдан хем, сизиң бириңиз Маңа хайынлык эдерсиңиз» дийип, ачык айтды.

²² Шәгиртлери Онуң муны киме какдырып айдяныны билмән, алҗыраңңылык билен бири-бирлерине середишдилер.

²³ Сачак башында шәгиртлерден бири Иса япланып отырды. Ол Исаның сөйгүли шәгирдиди.

²⁴ Симун Петрус Онуң киме какдырып айдяныны сорамагы яңкы шәгирде үмледи.

²⁵ Ол хем Иса япланып отуршына Ондан: «Агам, ол ким?» дийип сорады.

²⁶ Иса: «Шу чөреги окара батырып, киме берсем, ол шолдур» дийип җогап берди. Онсоң Ол чөреги окара батырды-да, оны Симуның оглы Юдас Искариода берди.

²⁷ Чөреги алан бадына, Юданың ичине шейтан гирди. Иса оңа: «Нәме этҗек болсаң, тизрәк эт» дийди.

²⁸ Муны Исаның оңа нәме үчин айданына отуранларың хич бири дүшүнмеди.

²⁹ Пул торба Юдасда болансоң, кәбирлери Иса оңа: «Байрам үчин бизе герек затлары сатын ал» я-да «Гарыплара бираз пул пайла» диййәндир өйтдүлер.

³⁰ Юдас болса чөреги алан бадына дашары чыкып гитди. Гараңкы дүшүпди.

Иса Петрусың инкәр этҗекдигини айдяр

³¹ Юдас чыкып гиденсоң, Иса шейле дийди: «Инди Ынсан Оглы шөхратландырылды, Худай-да Ол аркалы шөхратландырылды.

³² Эгер Худай Ынсан Оглы аркалы шөхратланан болса, Оны хем Өз шөхратына шәрик эдер. Хава, Оны шол пурсадың өзүнде шөхратландырар.

³³ Балаларым! Мен инди сизиң билен узак болмарын. Сиз Мени агтарарсыңыз, йөне яхудылара айданымы сизе-де айдярын: „Мениң гитҗек ериме сиз барып билмерсиңиз“.

³⁴ Сизе бир тәзе табшырык берйәрин: бири-бириңизи сөйүң. Мениң сизи сөйшүм ялы, сиз-де бири-бириңизи сөйүң.

³⁵ Эгер бири-бириңизи сөйсеңиз, хеммелер сизиң Мениң шәгирдимдигиңизи билерлер».

³⁶ Симун Петрус Исадан: «Агам, Сен нирә барярсың?» дийип сорады. Иса оңа: «Сен Мениң билен хәзир гидип билмерсиң, йөне соңра барып билерсиң» дийип җогап берди.

³⁷ Петрус Оңа: «Агам, нәме үчин мен Сениң билен хәзир гидип билмерин? Мен Сениң үчин җанымы бермәге-де тайяр» дийди.

³⁸ Иса оңа: «Сен Мениң үчин җаныңы бермәге тайярмың?! Мен саңа догрусыны айдярын, хораз гыгырмаздан өң, сен Мени үч гезек инкәр эдерсиң» дийип җогап берди.