Ёханна 11 - Мукаддес Китап

11‑нҗи бап Лазарың өлүми

¹ Бейтания обасында Лазар атлы бир адам кеселләп ятырды. Онуң уялары Меръем билен Марта хем шол обада яшаярдылар.

² Реб Иса хошбой ыслы яг гуюп, Онуң аягыны сачы билен сүпүрен аял шол Меръемди. Хава, кесел ятан Лазар Меръемиң доганыды.

³ Шейлеликде, уялар: «Агам, Сениң эзиз достуң кесел ятыр» дийип, Иса хабар ёлладылар.

⁴ Иса муны эшидип: «Бу кесел онуң өлмеги үчин дәл-де, Худайың шөхратланып, бу аркалы Худайың Оглуның шөхрат газанмагы үчиндир».

⁵ Иса Мартаны, онуң уясыны ве Лазары говы гөрйәрди.

⁶ Эмма Лазарың кесел ятандыгыны билсе-де, Иса өңки болян еринде ене ики гүн галды.

⁷ Мундан соң Иса шәгиртлерине: «Яхудыя доланалың» дийди.

⁸ Шәгиртлери Оңа: «Эй, мугаллым, яхудыларың баштутанларының Сени дашлаҗак боланлары яңы дәлмиди?! Сен ене-де шол ере гитҗек болярсыңмы?» дийдилер.

⁹ Иса олара: «Гүндиз он ики сагатдан ыбарат дәлми? Ким гүндиз йөресе бүдремез, себәби ол бу дүнйәниң нуруны гөрйәндир.

¹⁰ Эмма гиҗе йөрейән адам бүдрәр, себәби онда нур ёкдур» дийип җогап берди.

¹¹ Соңра Иса олара ене-де: «Достумыз Лазар уклап ятыр. Мен шоны оярмак үчин гидйәрин» дийди.

¹² Шәгиртлери Оңа: «Агам, уклап ятан болса сагалар» дийдилер.

¹³ Иса онуң өлендиги хакда айдярды, йөне олар адаты укы хакда айдяндыр өйтдүлер.

¹⁴ Шейлеликде, Иса олара аныгыны айтды: «Лазар арадан чыкды.

¹⁵ Иман этмегиңиз үчин, Мен сизиң хатыраңыза ол ерде болмандыгыма бегенйәрин. Инди болса, йөрүң, онуң янына гиделиң».

¹⁶ Шонда Экиз лакамлы Томас диен шәгирт бейлеки шәгиртлере: «Йөрүң, бизем гиделиң-де, Иса билен биле өлелиң» дийди.

¹⁷ Иса Бейтания геленде, Лазарың җайлананына эййәм дөрт гүн болан экен.

¹⁸ Бейтания Иерусалимден бары-ёгы үч чакрым дашлыкда ерлешйәрди.

¹⁹ Марта билен Меръеме гөвүнлик бермәге көп яхудылар Лазарың патасына гелипдилер.

²⁰ Марта Исаның гелйәнини эшидип, Оны гаршыламага чыкды. Меръем болса өйде галды.

²¹ Марта Иса: «Эй, Агам, Сен шу ерде болан болсадың, доганым өлмезди.

²² Хәзир хем Худайдан нәме дилесең, Сениң дилегиңи битирҗегини билйәрин» дийди.

²³ Иса оңа: «Доганың дирелер» дийди.

²⁴ Марта болса: «Мен ахыркы гүн, ягны өлүлериң дирелиш гүнүнде онуң дирелҗегини билйәрин» дийди.

²⁵ Иса оңа: «Дирелишем, яшайышам Мендирин, Маңа иман эден өлсе-де яшар.

²⁶ Ким Маңа иман эдип яшаян болса, ол асла өлмез. Сен шуңа ынанярсыңмы?» дийди.

²⁷ Ол Иса: «Хава, Агам. Мен Сениң шу дүнйә гелмели Худайың Оглы Месихдигиңе ынанярын» дийди.

²⁸ Марта шейле диенсоң, уясы Меръеми чагырмага гитди. Оны бир чете чекип: «Мугаллым шу ерде. Ол сени чагыряр» дийди.

²⁹ Меръем муны эшиден бадына еринден туруп, Исаның янына гитди.

³⁰ Иса энтек оба гирмәнди, Ол хениз хем Мартаның гаршылан ериндеди.

³¹ Өйде Меръемиң янында болуп, оңа гөвүнлик берйән яхудылар онуң ховлукмач чыкып гиденини гөрдүлер. Ол агламак үчин мазара тарап баряндыр өйдүп, олар онуң ызындан гитдилер.

³² Меръем Исаның дуран ерине гелди. Оны гөрүп, аякларына йыкылды-да: «Агам, Сен шу ерде болан болсадың, доганым өлмезди» дийди.

³³ Меръемиң ве онуң билен биле гелен яхудыларың аглаяныны гөренде, Исаның калбыны чуңңур гынанч гаплап, йүреги гыйылды.

³⁴ Ол: «Оны ниреде җайладыңыз?» дийип сорады. Оңа: «Эй, Агам, гел, гөр» дийдилер.

³⁵ Исаның гөзлеринден боюр-боюр яш акды.

³⁶ Шонда яхудылар: «Середиң, Ол оны нәхили говы гөрйән экен!» дийишдилер.

³⁷ Кәбирлери болса: «Көрүң гөзүни ачан Адам Лазары-да өлүмден алып галып билмезмиди?» дийишдилер.

Иса Лазары дирелдйәр

³⁸ Шол вагт Исаның йүреги гыйым-гыйым болуп, мазарың янына барды. Мазар бир говакды, онуң агзына болса даш гоюпдылар.

³⁹ Иса: «Дашы айрың» дийди. Мерхумың уясы Марта Оңа: «Агам, ол эййәм порсандыр, оны җайланымыза дөрт гүн болды ахыры» дийди.

⁴⁰ Иса оңа: «Эгер иман этсең, Худайың шөхратыны гөрерсиң диймәнмидим?» дийди.

⁴¹ Шейлеликде, дашы айырдылар. Иса гөзүни гөге дикип: «Эй, Ата, Мени эшидениң үчин Саңа шүкүр эдйәрин.

⁴² Сениң Мени хемише-де эшидйәндигиңи билйәрин. Эмма бу сөзлери шу ерде дуран халк үчин, Мени Сениң иберендигиңе иман этсинлер дийип айтдым» дийди.

⁴³ Шу сөзлерден соң Ол гаты сес билен: «Лазар, дашары чык!» дийип гыгырды.

⁴⁴ Эллери, аяклары кепене доланан, йүзи яглык билен саралан мерхум мазардан чыкды. Иса олара: «Онуң кепенини айрың, гой, гитсин» дийди.

Исаны өлдүрмек барадакы дилдүвшүк

⁴⁵ Шейлеликде, Меръемиң янына гелен яхудыларың көпүси Исаның эден ишини гөрүп, Оңа иман этдилер.

⁴⁶ Бирнәчеси болса барып, Исаның эден ишлерини фарисейлере гүррүң бердилер.

⁴⁷ Онсоң ёлбашчы руханылар билен фарисейлер ёкары меҗлиси чагырып: «Нәме этмели? Бу Адам көп гудратлар гөркезйәр.

⁴⁸ Муңа ёл берсек, онда хеммелер Оңа иман эдер. Римлилер хем гелип, ыбадатханамызы ве халкымызы ёк эдерлер» дийдилер.

⁴⁹ Оларың арасында шол йыл баш руханы болан Каяфа-да барды. Каяфа олара: «Сиз хич зады билмейәрсиңиз.

⁵⁰ Әхли халкың хеләк боланындан, бир адамың халк үчин өлмеги сизе өрән бәхбитлидир. Сиз нәме муңа дүшүнеңзокмы?» дийди.

⁵¹ Ол муны өз-өзүнден айтмады. Шол йылың баш руханысы болмак билен ол Исаның яхуды миллети үчин өлҗегини пыгамберлик эдип айтды.

⁵² Ол диңе бир шол миллет үчин дәл-де, эйсем Худайың дагынык перзентлерини бир ере топлап бирлешдирмек үчин хем өлмелиди.

⁵³ Шейлеликде, шол гүнден башлап, Исаны өлдүрмек үчин дил бирикдирдилер.

⁵⁴ Шондан соң Иса яхудыларың арасында ач-ачан гезмеди. Ол чөлүң голайындакы Эфрайым шәхерине гидип, шәгиртлери билен шол ерде галды.

⁵⁵ Яхудыларың Песах байрамы якынлапды. Юрдуң әхли күнҗеклеринден гелен көп адамлар Песахдан өң тәмизлениш дессурларыны берҗай этмек үчин Иерусалиме гелипдилер.

⁵⁶ Олар Исаны гөзлейәрдилер, ыбадатханада дуркалар, бири-бирлерине: «Нәхили пикир эдйәрсиңиз? Ол байрама гелерми я-да гелмез?» дийишйәрдилер.

⁵⁷ Ёлбашчы руханылар билен фарисейлер болса Исаны эле салмак үчин, Онуң ниредедигини ким билйән болса, хабар бермеклерини буйрупдылар.