Ёханна 10 - Мукаддес Китап

10-нҗы бап Говы чопан

¹ Иса ене-де сөзе башлады: «Мен сизе догрусыны айдярын, гоюн агылына гапысындан гирмән, башга еринден ашып гирйән адам огрудыр хем гаракчыдыр.

² Гапыдан гирйән адам болса гоюнларың чопаныдыр.

³ Сакчы оңа гапыны ачып берйәндир. Гоюнлар чопаның сесини эшидйәндирлер. Чопан хем гоюнларыны атма-ат чагырып, олары өрә алып чыкяндыр.

⁴ Чопан гоюнларыны агылдан алып чыкандан соң, оларың өңүнден йөрейәндир, онуң сесини танаян гоюнлар болса, онуң ызына дүшйәндирлер.

⁵ Олар кесекиниң ызына дүшйән дәлдирлер, ондан гачяндырлар, себәби кесекиниң сесини танаян дәлдирлер».

⁶ Шейдип, Иса олара бу тымсалы гүррүң берди, эмма олар мунуң манысына дүшүнмедилер.

⁷ Иса ене-де олара шейле дийди: «Сизе догрусыны айдярын, гоюнлар үчин гапы Мендирин.

⁸ Менден өң геленлериң әхлиси огрудылар хем гаракчыдылар, гоюнлар олара гулак асмадылар.

⁹ Гапы Мендирин. Ким шу гапыдан гирсе, халас болар. Ол гирип-чыкып, өзүне отлаг тапар.

¹⁰ Огры диңе огурламак, өлдүрмек, ёк этмек үчин гелйәндир. Эмма Мен олара яшайыш, болелин яшайыш бермек үчин гелдим.

¹¹ Мен говы чопандырын. Говы чопан гоюнлары үчин җаныны пида эдйәндир.

¹² Хакына тутулан адам гоюнларың хакыкы чопаны я-да эеси дәлдир. Шонуң үчин ол мөҗегиң гелйәнини гөрсе, гоюнлары ташлап гачяндыр. Мөҗек сүриниң үстүне чозуп, олары даргадяндыр.

¹³ Ол адам гачып гидер, себәби ол хакына тутуландыр. Ол гоюнлар хакда хич хили алада этмез.

^14-15 Мен говы чопандырын. Эдил Атамың Мени, Мениңем Атамы танайшым ялы, Мен гоюнларымы танаяндырын. Олар-да Мени танаяндырлар; Мен гоюнларым үчин җанымы пида эдйәрин.

¹⁶ Мениң бу агылдакылардан башга-да гоюнларым бар. Мен олары хем йыгнамалыдырын. Олар хем Мениң сесими эшидерлер, шонда бир сүри, бир чопан болар.

¹⁷ Мен җанымы гайтадан алмак үчин пида эдйәрин. Шол себәпден Атам Мени сөййәр.

¹⁸ Җанымы Менден хич ким алмаяр, Өзүм пида эдйәрин. Мениң җанымы пида этмәге-де, оны гайтадан алмага-да ыгтыярым бар. Мен бу буйругы Атамдан алдым».

¹⁹ Бу сөзлер себәпли, яхудыларың арасына ене-де агзалалык дөреди.

²⁰ Оларың көпүси: «Оны җын урупдыр, Ол дәлирәпдир. Нәме үчин сиз Оны диңлейәрсиңиз?» дийди.

²¹ Башгалар болса: «Булар җын уран адамың айтҗак сөзлери дәл. Җын көрлериң гөзүни ачып билерми?» дийдилер.

Яхудыларың баштутанлары иман этмейәрлер

²² Шол вагт гыш паслыды, Иерусалимде Нур байрамы белленилйәрди.

²³ Иса ыбадатханада Сүлейманың эйваны диен ерде гезмеләп йөрди.

²⁴ Месих Яхудыларың баштутанлары Онуң дашына үйшүп: «Сен хачана ченли бизи аласармык эдип гойҗак? Эгер Месих болсаң, аныгыны айт» дийдилер.

²⁵ Иса олара: «Мен сизе айтдым, йөне сиз иман этмейәрсиңиз. Атамың ады билен эден ишлерим Мениң кимдигиме шаятлык эдйәр.

²⁶ Йөне сиз иман этмейәрсиңиз, себәби сизе айдышым ялы, сиз Мениң гоюнларымдан дәл.

²⁷ Мениң гоюнларым сесиме гулак асярлар, Мен хем олары танаярын, олар Мениң ызыма дүшйәрлер.

²⁸ Мен олара бакы яшайыш берйәрин. Олар асла хеләк болмаз, хич ким олары Мениң элимден какып алмаз.

²⁹ Олары Маңа берен Атам хеммеден бейикдир. Атамың элинден олары хич ким алып билмез.

³⁰ Атам Икимиз бирдирис» дийип җогап берди.

³¹ Яхудыларың баштутанлары Оны дашлаҗак болуп, ене ерден даш алдылар.

³² Иса олара: «Мен Атам тарапындан сизе көп ягшылыклар этдим. Буларың хайсысы үчин Мени дашлаҗак болярсыңыз?» дийди.

³³ Яхудыларың баштутанлары Оңа: «Биз Сени ягшы иш эдйәнлигиң үчин дәл-де, Худая дил етирйәнлигиң үчин, ягны ынсан халыңа Өзүңи Худай сайянлыгың үчин дашлаҗак болярыс» дийдилер.

³⁴ Иса олара шейле дийди: «Мукаддес Кануныңызда: „Мен диййәрин: Сиз худайларсыңыз“ дийип язылан дәлми?

³⁵ Мукаддес Язгылары үйтгедип болмаяндыгыны билеңзокмы нәме?! Худайың Сөзи гелен адамлар „худайлар“ дийлип атландырылан болса,

³⁶ онда нәме Мени Худайың Оглы диеним үчин күпүр геплән хасаплаярсыңыз? Мени болса Атам Өзи үчин сайлап-сечип, дүнйә иберди.

³⁷ Мен Атамың ишлерини этмейән болсам, онда Маңа иман этмәң.

³⁸ Эгер-де Онуң ишлерини эдйән болсам, онда Маңа ынанмасаңыз-да, эдйән ишлериме ынаның. Шонда Атаның Мендедигини, Мениңем Атададыгыма анык гөз етирерсиңиз».

³⁹ Шонда Оны ене тутмага сынанышдылар, эмма Иса оларың эллеринден сыпып гачды.

⁴⁰ Иса ене-де Иордан дерясының аңры тарапына, өңлер Яхяның адамлары сува чүмдүрен ерине гитди ве шол ерде галды.

⁴¹ Көп адамлар Онуң янына гелип: «Яхя хич хили гудратлы аламат гөркезмесе-де, онуң бу Адам хакдакы айданларының бары догры экен» дийишдилер.

⁴² Шейлеликде, ол ерде көп адамлар Иса иман этдилер.