Efesliler 6 - Мукаддес Китап

6-нҗы бап Чагалар ве эне-аталар

¹ Эй, чагалар, Реббиң хатырасы үчин эне-атаңызың сөзүне гулак асың, себәби бу догрудыр.

^2-3 «Эне-атаңа хормат гой, шонда ягшылык гөрүп, ер йүзүнде өмрүң узак болар» – бу Худайың вада билен берен илкинҗи буйругыдыр.

⁴ Эй, аталар, сиз хем чагаларыңызың гахарыны гетирмәң. Гайтам, олары Реббиң тербиеси хем өвүди билен улалдың.

Гул-хоҗайын гатнашыгы

⁵ Эй, гуллар, ердәки хоҗайыныңызың сөзүне эдил Месихиң сөзүне гулак асян ялы, горкы ве титреме билен чын йүрекден гулак асың.

⁶ Муны диңе оларың өңүнде мерхемет газанмак үчин дәл-де, эйсем Месихиң гулы хөкмүнде Худайың ырадасыны ак йүрекден ерине етирмек үчин эдиң.

⁷ Адамлара дәл-де, Реббе хызмат эдйән кимин түйс йүрекден хызмат эдиң.

⁸ Чүнки исле гул болсун, исле азат, хер кимиң өз эден ягшылыгының өвезини Ребден алҗакдыгыны сиз билйәнсиңиз.

⁹ Эй, хоҗайынлар, сиз хем гулларыңыза эдил шу тәрде середиң, олары горка салмаң, себәби оларың хем, сизиң хем гөкде Хоҗайыныңызың бирдигини билйәнсиңиз. Ол хич киме тарапгөйлик этмейәр.

Худайың берен рухы яраглары

¹⁰ Шунлукда, Реббиң бейик гүйҗи билен кувватланың.

¹¹ Иблисиң хилелерине гаршы дуруп билериңиз ялы, Худайың берен әхли рухы ярагларыны дакының.

¹² Себәби бизиң сөвешимиз ынсанлара гаршы дәлдир! Терсине, биз түмлүгиң рухы хөкүмдарларына ве эрк-ыгтыярлыларына, шейле-де гөкдәки ёвуз рухы гүйчлере гаршы сөвешйәрис.

¹³ Шонуң үчин яман дөвүрде гайтавул берип билмегиңиз үчин, Худайың әхли ярагларыны дакының. Шонда орнуңызда берк дурмагы башарарсыңыз.

¹⁴ Шейлеликде, хакыкаты билиңизе гушак эдип дакының, догрулыгы эгниңизе совут эдип гейиң.

¹⁵ Аягыңыза болса парахатлык гетирйән Хош Хабары вагыз этмек тайынлыгыны гейиң.

¹⁶ Буларың әхлисиниң үстесине-де, иманы галкан эдинип дакының! Онуң билен шейтаның бүтин отлы окларыны өчүрмеги башарарсыңыз.

¹⁷ Шейле хем гутулыш тувулгасыны гейип, Худайың сөзүни, ягны Мукаддес Рухуң гылыҗыны эле алың.

¹⁸ Хер бир ягдайда ялбармак билен, Мукаддес Рухуң ылхамы аркалы Худая дога-дилег эдиң. Хүшгәр болуң, Худайың әхли халкы үчин хемише дилегде болуң.

¹⁹ Хер гезек гепләнимде, герекли сөзлер берилсин дийип, мениң үчинем Худайдан диләң. Шонда мен Хош Хабар барадакы сыры батыргайлык билен ач-ачан вагыз эдерин.

²⁰ Себәби мен Хош Хабарың зынҗырлар билен багланан илчисидирин. Муны горкман, болмалысы ялы ыглан эдип билмегим үчин дилег эдиң.

Саламлар

²¹ Мениң ягдайымы, нәме эдйәними сизиң-де билмегиңиз үчин, сөйгүли доганымыз, Реббиң садык хызматкәри Тихик сизе хемме зады гүррүң берер.

²² Ине, хут шу максат билен, бизиң ягдайымызы хабар бермек, шейле-де сизи рухландырмак үчин, мен оны сизиң яныңыза иберйәрин.

²³ Атамыз Худайдан, Реббимиз Иса Месихден доганларымыза парахатлык, иман ве сөйги дилейәрин.

²⁴ Реббимиз Иса Месихи өлмез-йитмез сөйги билен сөййәнлериң барына Худайың мерхемети яр болсун!