Efesliler 5 - Мукаддес Китап

5‑нҗи бап

¹ Шейле хем сиз сөйгүли чагалар кимин Худайдан гөрелде алың.

² Месих ялы сөйүп яшаң. Ол бизи сөйүп, Худая якымлы ыслы садака хем гурбанлык хөкмүнде бизиң үчин җаныны гурбан этди.

³ Араңызда азгынлык, харамлык, ачгөзлүк эдйән болмасын. Бейле затлар Худайың халкына гелишмейәр.

⁴ Шейле хем араңызда биэдеплик, яңралык, бидерек дегишме-де болмасын. Булар сизе ярашмаяр. Муңа дерек Худая шүкүр эдиң.

⁵ Шуны билип гоюң: хич бир азгының, мурдарың я-да ачгөзүң Месихиң ве Худайың Шалыгында мирасы ёкдур. Чүнки шейле адамлар бутпаразлар билен дес-деңдир

⁶ Хич ким сизи бош сөзлер билен алдамасын. Шу затлар себәпли Худайың газабы Өзүне боюн эгмейәнлериң үстүнден инйәндир.

⁷ Шонуң үчин олар ялылар билен гатнашмаң.

⁸ Ядыңыздамы, бирвагтлар сиз гараңкылыкдыңыз, йөне инди Реб аркалы нурсуңыз. Шонуң үчин нуруң чагалары болуп яшаң.

⁹ Догруданам, әхли ягшылык, догрулык ве хакыкат нуруң мивесидир.

¹⁰ Ребби хошнут этҗек зады билмәге чалшың.

¹¹ Гараңкылыгың яман ишлерине гатышмаң, терсине, олары паш эдиң.

¹² Оларың эдйән гизлин ишлери хакда хатда сөз ачмак-да айыпдыр.

¹³ Эмма нур парланда, әхли зат паш эдилип, айдың гөрнер.

¹⁴ Чүнки нур әхли зады әшгәр эдйәндир. Шонуң үчин шейле дийилйәр: «Оян, эй, ука гиден! Өлүмден дирел! Месих саңа нур сачар».

¹⁵ Шейлеликде, нәхили яшаяндыгыңыза үнс бериң. Наданлар ялы дәл-де, даналар ялы яшаң.

¹⁶ Хер бир пурсатдан дегерли нетиҗе чыкарың, себәби бу ярамаз дөвүрдир.

¹⁷ Шонуң үчин-де самсык болман, гайтам, Реббиң ырадасының нәмедигине дүшүниң.

¹⁸ Шерапдан серхош болмаң, бу сизи веҗералыга элтер. Терсине, Мукаддес Рухдан долуп-дашың.

¹⁹ Билеликде мезмурлар, өвгүли ве рухы айдымлар айдың; Реббе түйс йүрекден сазлар чалып, нагмалар айдың.

²⁰ Әхли зат үчин Реббимиз Иса Месихиң адындан Ата Худая хемише шүкүр эдиң.

Әр-аял гатнашыгы

²¹ Иса Месихе хормат гоймак билен бири-бириңизе табын болуң.

²² Эй, аяллар, Реббе табын болшуңыз ялы, әриңизе хем табын болуң.

²³ Месих иманлылар йыгнагының башы болшы ялы, әр хем аялың башыдыр. Месих Өз бедени болан йыгнагың Халасгәридир.

²⁴ Шонуң үчин иманлылар йыгнагының Месихе табын болшы ялы, аяллар-да әхли затда өз әрине табын болсунлар.

^25-26 Эй, әрлер, Иса Месихиң иманлылар йыгнагыны сөйши ялы, сиз хем өз аялыңызы сөйүң. Ол Өз йыгнагыны сув билен ювуп, Худайың сөзи билен тәмизледи, оны Өзүне мукаддес халк эдинмек үчин, җаныны гурбан этди.

²⁷ Ол муны Өз хузурына тегмилтсиз, йыгыртсыз, биркемсиз, ягны шөхратда мукаддес хем мүйнсүз бир аҗайып йыгнагы гетирмек үчин этди.

²⁸ Эдил шу тәрде әрлер-де аялыны өз беденлерини сөйүшлери ялы сөймелидирлер. Аялыны сөййән өзүни сөййәндир.

²⁹ Элбетде, хич ким хич хачан өз беденини йигренйән дәлдир. Гайтам, эдил Месихиң иманлылар йыгнагына середиши ялы, оны иймитлендирип, аладасыны эдйәндир.

³⁰ Себәби биз Месихиң бедениниң агзаларыдырыс.

³¹ Төвратда шейле язылан: «Шол себәпден хем эркек ата-энесини ташлап, аялы билен биригйәр ве оларың икиси бир тен боляр».

³² Бу бейик сырдыр, йөне мен мунда Месих ве иманлылар йыгнагы барада гүррүң эдйәрин.

³³ Шунлукда, хер бириңиз аялыңызы өзүңизи сөйшүңиз ялы сөйүң, аял хем әрине хормат гойсун.