Efesliler 4 - Мукаддес Китап

4‑нҗи бап Месих иң беденинде бирикмек

¹ Реббиң угрунда туссаглыкда болан мен сизден Худайдан алан чагырылышыңыза мынасып яшамагыңызы хайыш эдйәрин.

² Иңңән пес гөвүнли хем юмшак болуң. Сабыр-такатлы болуп, мәхир-мухаббет билен бири-бириңизе чыдаң.

³ Өзара парахатлыкда яшап, Мукаддес Рухуң бирлигини горамага дырҗашың.

⁴ Сиз бир Бедене, бир Руха шәрик болярсыңыз; Худай хеммәңизи бир умыда чагырандыр.

⁵ Реббиңиз-де, иманыңыз-да бирдир, сизиң хеммәңиз бир максат билен чүмдүриленсиңиз.

⁶ Әхли затдан үстүн, әхли зат аркалы ве әхли затда болан Атамыз Худай-да бирдир.

⁷ Месих бизиң хер биримизе сахылык билен пешгешлер эчилди.

⁸ Мунуң үчин Мукаддес Язгыларда шейле дийилйәр: «Ол ёкары белентлиге чыканда, есирлери Өзи билен әкитди; ынсанлара пешгешлер берди».

⁹ Эйсем «чыканда» диен сөз нәмәни аңладяр? Бу Месихиң илки ашак – ер йүзүне инендигини аңлатмаярмы нәме?

¹⁰ Ашак инен-де, тутуш әлем-җаханы долдурмак үчин, гөклериң гөгүне чыкан-да Олдур.

¹¹ Ине, Месихиң Өзи кәбирлерини ресул, кәбирлерини пыгамбер, башга бирилерини Хош Хабарчы, өвредиҗи, бейлеки бирлерини йыгнагың чопанлары эдип белледи.

¹² Оларың везипеси Худайың халкыны Оңа хызмат этмәге тайярламакдан ве Месихиң бедени болан иманлылар йыгнагыны беркитмекден ыбаратдыр.

¹³ Мунуң нетиҗесинде хеммәмиз иманда бир болуп, Худайың Оглы Месихи танап-билип, Ол ялы долы кәмиллиге етерис.

¹⁴ Шейдип, мундан бейләк ынсанларың яланчылыгының ве өкделик билен дүзйән хер хили таглыматының шемалына ковлуп, эйләк-бейләк итекленйән чагалар ялы болмарыс.

¹⁵ Терсине, хакыкаты сөйги билен айдып, бедениң Башы болан Месих ялы хемметараплайын кәмиллешерис.

¹⁶ Онуң ёлбашчылыгы астында тутуш беден хер богнуң көмеги билен багланып, Оңа бирикдирилйәр. Хер агзаның кадалы ишлемеги нетиҗесинде беден кемала гелип, сөйги аркалы сазлашыклы херекет эдйәр.

Нуруң чагалары болуп яшаң

¹⁷ Шонуң үчин Реббиң адындан сизе шуны буюрярын: мундан бейләк кесеки миллетлер ялы бош дүшүнҗелер билен яшамаң.

¹⁸ Оларың аң-дүшүнҗесини гараңкылык гаплады. Надан ве доңйүрек боландыклары үчин, олар Худайың берен дурмушындан махрум болдулар.

¹⁹ Олар ар-намыс дуйгусыны бүтинлей йитирип, доймаз-долмаз болдулар, хер хили харамлык эдип, азгынчылыга йүз урдулар.

²⁰ Эмма сиз Месих барада өвренениңизде, бейле затлары өвренен дәлсиңиз.

²¹ Сиз Исаның сөзлерини эшиденсиңиз ве Онуң хакыкатына эсасланып, тәлим алансыңыз.

²² Өң өвредилиши ялы, өңки дурмушыңызы, яланчы хөвеслер билен ёлдан чыкаран көне ярадылышыңызы чыкарып ташлаң.

²³ Муңа дерек ой-пикириңизде ве гарайшыңызда тәзелениң.

²⁴ Хакыкы догрулык ве мукаддеслик билен Худайың кешбинде ярадылан тәзе ярадылыша беслениң.

²⁵ Инди ялан сөзлемәң-де, хер бириңиз өз якыныңыза хакыкаты айдың. Чүнки бизиң хеммәмиз бир бедениң агзаларыдырыс.

²⁶ Гахарланып гүнә этмәң. Гахарыңызың үстүне Гүн яшмасын.

²⁷ Иблисе орун бермәң.

²⁸ Огурлык эден инди огурлык этмесин! Гайтам, өз эллери билен зәхмет чекип, мәтәҗе пайламага зады болар ялы, пейдалы иш этсин.

²⁹ Агзыңыздан хич хачан ярамаз сөз чыкмасын. Гайтам, диңлейәнлериң мәтәчликлерине гөрә, герекли сөзлери сөзләп, олары рухландырың, шонда сөзлериңиз олара пейда гетирер.

³⁰ Худайың Мукаддес Рухуны гамгын этмәң. Чүнки Мукаддес Рух сизиң Худая дегишлидигиңизиң хем-де гутулыш гүни азат эдилмегиңизиң кепилнамасыдыр.

³¹ Хер хили өйке-кине, гахар-газап, пайыш сөзлер айтмак ве төхмет атмак ялы йигренҗи хәсиетлер сизден даш болсун.

³² Бири-бириңизе мәхирли ве рехим-шепагатлы болуң. Худайың сизи Месих аркалы багышлайшы ялы, сиз хем бири-бириңизи багышлаң.