Efesliler 3 - Мукаддес Китап

3‑нҗи бап Павлуса аян болан сыр

¹ Шу себәпли Иса Месихиң угрунда туссаглыкда отуран мен-Павлус сиз яхуды дәллер үчин Худая дилег эдйәрин.

² Өз мерхеметини сиз яхуды дәллере етирмек үчин, Худайың маңа айратын табшырык берендигини, элбетде, эшиденсиңиз.

³ Сизе өң гысгача язышым ялы, Худай маңа Өз сырыны аян этди.

⁴ Хатымы оканыңызда, Месихиң бу сырына мениң нәдереҗеде дүшүнйәндигими аңарсыңыз.

⁵ Худай бу сыры өңки несиллере аян этмән, эйсем хәзир Мукаддес Рух аркалы Өз мукаддес ресулларына, пыгамберлерине әшгәр этди.

⁶ Ине, Худайың сыры шудур: Хош Хабары кабул эдйән яхуды дәллер хем яхудылара берлен ялканыш вадасына, бир бедене, бир мираса дең дереҗеде шәрикдирлер. Себәби оларың хеммеси Иса Месихе дегишлидир.

⁷ Мен Худайың бейик гудраты ве пешгеш берен мерхемети аркалы Хош Хабарың хызматчысы болдум.

⁸ Мен Худайың халкының арасында иң әхмиетсизидим, эмма муңа гарамаздан Месихиң акыл етмез байлыгыны яхуды дәллере вагыз этмек җогапкәрчилигини Худай маңа берди.

⁹ Әхли зады ярадан Худай гечмишден бәри бу сыры Өз хузурында гизлин саклады, бу сырың манысының нәмедигини инди хер бир ынсана әшгәр этмеклик маңа берилди.

¹⁰ Өзүниң чуңңур бай акылдарлыгы иманлылар йыгнагы аркалы гөкдәки рухы хөкүмдарлара ве эрк-ыгтыярлылара билдирилсин дийип, Худай шейле этди.

¹¹ Бу Худайың овал-башдан бәри мейилнамасы болуп, оны Реббимиз Иса Месих аркалы амала ашырды.

¹² Иса Месих ве Оңа болан иманымыз аркалы биз Худайың хузурына улы ынам ве батыргайлык билен якынлашып билйәрис.

¹³ Шонуң үчин хем, угруңызда чекйән гайгы-хасратларым себәпли сизиң рухдан дүшмезлигиңизи хайыш эдйәрин. Гайтам, булар сизе шөхрат гетирйәндир.

Павлусың эфеслилер үчин Худая дилеги

^14-15 Шейлеликде, ерде ве гөкде хер бир миллете ат берен Атамызың хузурында мен дыза чөкйәрин.

¹⁶ Гой, Ол чәксиз шан-шөхраты билен Өз Рухы аркалы сизиң ички барлыгыңызы гудрат билен гүйчлендирсин.

^17-18 Иса Месих иманыңыз аркалы йүреклериңизде яшасын. Шейле-де, мен сөйгиниң сизде көк уруп орнашмагыны, Месихиң сөйгүсиниң нәхили гиң, узын, белент ве чуңңурдыгына Худайың әхли халкы билен бирликде дүшүнмегиңизи Худайдан дилейәрин.

¹⁹ Хава, Худайың кәмиллигинден долуп билериңиз ялы, Месихиң аң-билим етерден үстүн болан бу сөйгүсине акыл етирип билмегиңизи Худайдан дилейәрин.

²⁰ Бизде ишлейән гудратына гөрә, Худай хер бир хайышымыздан, ойланышымыздан хем хас ёкары затлары этмеги башаряндыр.

²¹ Иманлылар йыгнагы ве Иса Месих аркалы, гой, Худая несиллербойы эбедилик шан-шөхрат болсун! Омын.