Даныел 8 - Мукаддес Китап

8‑нҗи бап Даныелиң гоч ве эркеч хакындакы гөрнүши

¹ Патыша Белшасарың патышалыгының үчүнҗи йылында мен Даныел өңки гөренимден башга ене бир гөрнүш гөрдүм.

² Гөрнүшде мен өзүми Эйлам велаятындакы Суза галасында гөрдүм. Мен өзүмиң Улай каналының боюнда дурандыгымы гөрдүм.

³ Мен середип дуркам, каналың кенарында бир гоч гөрдүм. Онуң ики шахы барды. Шахларының икиси хем узынды, йөне бири бейлекисинден хас узынды ве шол узыны соң чыкыпды.

⁴ Гочуң гүнбатар, демиргазык ве гүнорта тараплара сүсйәндигини гөрдүм. Хич бир хайван онуң өңүнде дуруп, хич ким онуң элинден гутулып билмейәрди. Ол ислән задыны эдйәрди ве гитдигиче гүйчленйәрди.

⁵ Мен сын эдип дуркам, ине, гүнбатардан бир эркеч пейда болды. Ол аягыны ере басмаздан, бүтин ер йүзүни айланып чыкды. Онуң ики гөзүниң ортасында гөзе илип дуран бир шахы барды.

⁶ Ол каналың кенарында дуран, мениң гөрен ики шахлы гочумың янына гелип, бар газаплы гүйҗи билен оңа окдурылды.

⁷ Мен онуң гоча голай бараныны гөрдүм. Ол гоча газап билен хүҗүм этди, оны сүсүп, ики шахыны-да дөвди. Онуң өңүнде дурмага гочуң гүйҗи ёкды. Эркеч оны ере чалып депеледи. Гочы онуң элинден халас этҗек хич ким ёкды.

⁸ Онсоң эркеч хас гүйчленди, эмма онуң гүйҗи хас бейгеленде, онуң шол еке улы шахы дөвүлди ве онуң ерине гөгүң дөрт шемалына гарап дуран дөрт саны гөзе илгинч шах пейда болды.

⁹ Оларың биринден башга бир кичиҗик шах пейда болды. Ол гүнорта, гүндогара ве овадан юрда тарап хас улалды.

¹⁰ Кичиҗик шах улалып, асман җисимине ченли барып етди. Ол гошундан, ягны йылдызлардан бирнәчесини ере ташлап депгиледи.

¹¹ Кичиҗик шах өзүни хатда гошун сердарына ченли бейгелтди. Ол гошун сердарының элинден гүнделик якма гурбанлыгыны алып, мукаддес өйи ёк этди.

¹² Питне турзаны себәпли гүнделик якма гурбанлыгы гошун билен бирликде онуң ыгтыярына берилди. Ол хакыкаты ере чалып, хер бир эден ишинде үстүнлик газанды.

¹³ Онсоң мен бир перишдәниң гепләнини эшитдим. Башга бир перишде бу геплән перишдә шейле сораг берди: «Бу гөрнүшде гөрлен затлар хачана ченли довам эдеркә? Хачана ченли гүнделик якма гурбанлыгының ерини вейранчылык гетирйән гозгалаң тутҗакка ве мукаддес өй билен гошун аяк астына ташланып депеленҗеккә?»

¹⁴ Ол: «Бу вака ики мүң үч йүз гиҗе-гүндиз довам эдер. Соңра мукаддес өй адалатсызлыкдан тәмизленер» дийип җогап берди.

Җебрайыл гөрнүши дүшүндирйәр

¹⁵ Мен Даныел гөрен гөрнүшимден маны чыкармага сынанышяркам, бирденкә ынсан сыпатындакы бири мениң өңүмде пейда болды.

¹⁶ Мен Улай каналының ортасындан бир ынсаның сесини эшитдим, ол гыгырып: «Җебрайыл, бу адама гөрнүшден маны чыкармага көмек эт» дийди.

¹⁷ Шейдип, Җебрайыл мениң дуран ериме гелди. Ол геленде, мен довла дүшүп, өзүми ере ташладым. Эмма ол маңа: «Эй, ынсан оглы, муны билгин, бу гөрнүш ахырзамана дегишлидир» дийди.

¹⁸ Ол маңа бу сөзлери айдярка, хушумдан гидип, ере йүзин йыкылдым, йөне ол мени тутуп, аяк үстүне галдырды.

¹⁹ Җебрайыл маңа шейле дийди: «Диңле, ахыркы гахар-газап гүнлери нәмелериң болҗагыны мен саңа айдайын. Чүнки бу гөрнүш ахырзаманың белленен вагтына дегишлидир.

²⁰ Сениң гөрен ики шахлы гочуң Мадай ве Парс патышаларыдыр.

²¹ Эркеч болса Грецияның патышасыдыр. Онуң ики гөзүниң ортасындакы улы шахы болса онуң илкинҗи патышасыдыр.

²² Ол шахың дөвлүп, ерине дөрт шахың чыкмагы ол миллетден дөрт патышалыгың чыкҗакдыгыны, йөне оларың илкинҗи патышалык ялы гүйчли болмаҗакдыгыны аңладяр.

²³ Бу дөрт патышалыгың соңы якынлашанда, гүнәлери етҗек дереҗесине етенде, текепбир, дийсең мекир патыша дөрәр.

²⁴ Ол гүйчленип кувватланар, йөне бу онуң өз гүйҗи билен болмаз. Ол элхенч вейранчылыклар гетирер, эдйән иши ровачланар. Ол гүйчлүлери ве мукаддес адамлары хеләк эдер.

²⁵ Өз даналыгы билен хилегәрликде үстүнлик газанар ве йүрегинде өзүни бейгелдер. Дуйдурмаздан көп халкы ёк эдер, хатда хөкүмдарларың Хөкүмдарына гаршы чыкар. Эмма онуң өзи ынсан эли дегмезден сынар.

²⁶ Агшам ве эртир барадакы саңа гөркезилен бу гөрнүш хакыкатдыр. Эмма бу гөрнүши гизлин сакла, чүнки ол узак бир гелеҗеге дегишлидир».

²⁷ Мен Даныел такатдан дүшдүм, бирнәче гүнләп ярамадым. Соңра аяк үстүне галып, ене-де патышаның ишлери билен мешгул болдум. Мен бу гөрнүше аңка-таңка болдум, оңа дүшүнмедим.