Даныел 7 - Мукаддес Китап

7‑нҗи бап Даныелиң дөрт җандар хакындакы гөрнүши

¹ Бабыл патышасы Белшасарың шалыгының биринҗи йылында Даныел ятырка дүйшүнде гөрнүшлер гөрди. Соңра ол дүйшүниң өзенини язып беян этди.

² Ол шейле гүррүң берди: «Мен гиҗе бир гөрнүш гөрдүм, ине, гөгүң дөрт шемалының бейик деңзе тарап толкун атяндыгыны гөрдүм.

³ Деңизден бири-бирине меңземейән дөрт саны улы җандар чыкды.

⁴ Биринҗиси ёлбарса меңзейәрди ве онда бүргүдиң ганатлары барды. Мен середип дуркам, онуң ганатлары гопарылып, ерден галды-да, ынсан ялы ики аягының үстүнде дурды. Оңа ынсан йүреги берилди.

⁵ Икинҗи бир җандар пейда болды. Ол ая меңзейәрди. Ол бир гапдалына дикелди. Онуң агзындакы дишлериниң арасында үч саны гапырга сүңки барды. Оңа: „Ханы, тур, көп эт ий!“ дийдилер.

⁶ Мундан соң гаплаңа меңзеш башга бир җандар гөрдүм, онуң дөрт келлеси, аркасында болса дөрт ганаты барды. Оңа хөкүмдарлык берленди.

⁷ Онсоң мен гиҗе шол гөрнүшимде горкунч, айылганч ве гаты гүйчли дөрдүнҗи бир җандары гөрдүм. Онуң әпет улы демир дишлери барды. Ол парчалап иййәрди, галан-гачанларыны болса аяклары билен мынҗырадярды. Бу өзүнден өңки җандарларың хеммесинден тапавутланярды. Онуң он саны шахы барды.

⁸ Шахлара үнс берип дуркам, оларың арасындан ене-де башга бир кичиҗик шах пейда болды. Өңки пейда болан шахлардан үчүси онуң өңүнден көки-дамары билен согрулды. Бу шахың ынсаның гөзлерине меңзеш гөзлери ве текепбирлик билен геплейән агзы барды.

Худайың хөкүми

⁹ Мен середип дуркам тагтлар гурулды. Овалдан Бар Болан тагтында отурды. Онуң гейимлери гар ялы ап-акды, башындакы сачлары хем памык ялы ап-акды. Онуң тагты одуң ялны киминди, тигирлери янып дуран отды.

¹⁰ Өңүнден бир отлы чешме чогуп акярды. Мүңлерче мүңлер Оңа хызмат эдйәрди. Он мүңлерче он мүңлер хузурында дик дурярды. Казыет меҗлиси хөкүме башлады, китаплар ачылды.

¹¹ Шахың агзындан чыкян текепбир сөзлер мениң үнсүми өзүне чекди. Бу җандар гөзүмиң алнында өлдүрилди ве маслыгы ёк эдилип, янып дуран ода ташланды.

¹² Бейлеки галан җандарларың хем эллеринден хөкүмдарлык алынды, эмма оларың өмүрлериниң мөхлети вагтлайынча узалдылды.

¹³ Гиҗе шол гөрнүшимде ынсан оглуна меңзеш бириниң гөгүң булутлары билен гелйәндигини гөрдүм. Ол овалдан Бар Боланың янына якынлашып, Онуң хузурына гетирилди.

¹⁴ Әхли халклар, миллетлер ве уруглар оңа гуллук этсинлер дийип, оңа хөкүмдарлык, шөхрат ве патышалык берилди. Онуң хөкүмдарлыгы совулмаз бакы хөкүмдарлыкдыр. Патышалыгы хич вагт йыкылмаҗак патышалыкдыр».

Гөрнүшлериң дүшүндирилиши

¹⁵ Гөрен гөрнүшлерим мен Даныели бөврүме пычак санҗылан ялы ховсала салды.

¹⁶ Мен ол ерде дуранларың бирине якынлашып, ондан булара дегишли әхли хакыкаты сорадым. Шейдип, ол маңа бу затларың ёргудыны айдып берди:

¹⁷ «Бу дөрт улы җандар ер йүзүнде дөрт патышаның аяга галҗагыдыр.

¹⁸ Эмма патышалыгы Бейик Худайың мукаддес адамлары аларлар, олар патышалыга хемишелик, өмүрбакы ве эбедилик эелик эдерлер».

¹⁹ Соңра мен бейлеки җандарларың әхлисинден тапавутлы, өрән горкунч, дишлери демирден, дырнаклары бүрүнчден, чейнәп парчалаян, галан-гачанларыны болса аяклары билен мынҗырадян дөрдүнҗи хайван хакында хакыкаты билмек иследим.

²⁰ Онуң башындакы он шахдан соңра чыкан бир шахың хем нәмедигини билесим гелди. Бу шахың өңүнде өңки үч шах йыкылды. Бу шахың гөзлери ве текепбирлик билен геплейән агзы барды, гөрнүши бейлекилерден хас улуды.

²¹ Мен середип дуркам, бу шах Худайың мукаддес адамлары билен уруш этди ве олардан үстүн чыкды.

²² Онсоң овалдан Бар Болан гелип, Өзүниң мукаддес адамларының хайрына хөкүм чыкарды. Бейик Худайың мукаддес адамлары үчин патышалыгы эелемегиң вагты гелди.

²³ Мениң сөхбетдешим шейле дийди: «Дөрдүнҗи җандар ер йүзүнде дөреҗек дөрдүнҗи патышалыкдыр. Ол әхли патышалыклардан тапавутлы болуп, тутуш ер йүзүни чейнәр, оны депеләп, бөлек-бөлек эдер.

²⁴ Он шах болса бу патышалыкдан чыкҗак он патышадыр. Булардан соңра өңкүлерден тапавутлы башга бир патыша дөрәп, өңки үч патышаны йыкып ташлар.

²⁵ Ол Бейик Худая гаршы күпүр гепләр, Бейик Худайың мукаддес адамларыны эзер. Байрамчылык сенелерини ве кануныны үйтгетмәге дырҗашар. Онсоң булар бир вагта, ики вагта, ярым вагта ченли бу патышаның элине берлер.

²⁶ Эмма казыет меҗлиси хөкүм чыкарар. Онуң хөкүмдарлыгы элинден алнар, вес-вейран болуп, бүтинлей ёк эдилер.

²⁷ Патышалык, хөкүмдарлык, тутуш гөгүң астындакы патышалыкларың бейиклиги Бейик Худайың мукаддес адамларына берлер. Бу халкың патышалыгы эбеди патышалык болар. Әхли хөкүмдарлар бу халка гуллук эдип, боюн эгерлер».

²⁸ Ине, шу ерде гүррүң гутаряр. Пикирлерим мен Даныели ховсала салды, йүзүмде реңк-пет галмады, эмма мен бу сөзлери йүрегимде сакладым.