Даныел 11 - Мукаддес Китап

11‑нҗи бап

¹ Мадайлы Дарюшың патышалыгының биринҗи йылында мен Микайылы голдап, оны гүйчлендирмек үчин янында дурдум.

Гүнорта патышалары демиргазык патышалары билен сөвешйәр

² Инди мен саңа хакыкаты айдып берейин. Парс юрдундан ене-де үч патыша чыкар. Дөрдүнҗи патыша оларың хеммесинден бай болар. Ол байлыгының үсти билен гүйчлененде, хеммәни Греция патышалыгына гаршы аяга галдырар.

³ Соңра гүйчли бир патыша чыкар. Ол бейик патышалыгы билен хөкүм сүрүп, өз исләнини эдер.

⁴ Йөне яңы гүйчленип, аяга галан махалы, онуң патышалыгы даргадылып, гөгүң чар тарапына бөлүнер. Патышалык онуң неслине гечмез, онуң ерине патыша боланларың хич бири онуң ялы хөкүм сүрмез. Онуң патышалыгы көки билен согрулып, өз неслинден болмадык башга бирилерине берлер.

⁵ Гүнорта патышасы гүйчленер, эмма онуң өз серкерделеринден бири ондан хас гүйчленип, серкердәниң хөкүмдарлыгы хас бейгелер.

⁶ Бирнәче йыл геченден соң, гүнорта патышасы демиргазык патышасы билен бирлешер. Ол гызыны демиргазык патышасына берип, онуң билен ярашык баглашар. Эмма ол гыз бу ярашыгың гүйҗүни узак саклап билмез. Патыша хем, онуң тохум-тиҗи хем узак дөвран сүрмез. Шейдип, бу гыз-да, онуң яранлары-да, какасы-да, өзүни голданлар билен биле эле дүшерлер.

⁷ Йөне ол гызың какасының, ягны гүнорта патышасының ерине гызың көкүнден бир балдак чыкар, ол демиргазык патышасының гаршысына хүҗүм эдип, онуң галасына гирер. Олар билен сөвешип, еңиш газанар.

⁸ Оларың худайларыны, бутларыны, күмүшден ве алтындан ясалан гымматбаха гап-гачларыны олҗа хөкмүнде Мүсүре гетирер. Онсоң ол бирнәче йыллап демиргазык патышасының үстүне чозмаз.

⁹ Соңра демиргазык патышасы гүнорта патышасының үстүне чозар, эмма онуң хүҗүми ызына серпикдирилер.

¹⁰ Демиргазык патышасының огуллары сөвеше тайярланып, җуда гүйчли гошун топларлар. Гошун сил кимин сүйшүп гелип, басып алар ве өврүлип ене-де гүнорта патышасының галасына хүҗүм эдер.

¹¹ Гүнорта патышасы газап атына атланып, демиргазык патышасына гаршы сөвешер. Демиргазык патышасы хем улы бир гошуны аяга галдырар, эмма онуң гошуны душманындан еңлер.

¹² Бу гошун эле дүшенсоң, гүнорта патышасының йүреги галкынар. Йөне ол он мүңлерче адамы өлдүрсе-де, онуң еңши узага чекмез.

¹³ Чүнки демиргазык патышасы ене-де өңкүсинден хем хас бейик бир гошун топлар. Бирнәче йылдан соң ол долы ярагланан агыр гошун билен гелер.

¹⁴ Шол дөвүрде биртопар адам гүнорта патышасының гаршысына чыкар. Гөрнүшиң берҗай болмагы үчин сениң халкыңың арасындан гүйҗи зорлар аяга галарлар, эмма олар бүдрәрлер.

¹⁵ Соңра демиргазык патышасы берк диварлы шәхере гелип, онуң диварларына чыкмак үчин япгыт гурар ве бу шәхери басып алар. Гүнорта гошуны хатда өзүниң сайлама гошуны билен-де онуң гаршысында дуруп билмез, оларың гүйчлери етмез.

¹⁶ Демиргазык патышасы өзүне гаршы чыкана ислән задыны эдер, хич ким онуң өңүнде дуруп билмез. Ол овадан юртда өзүни беркарар эдер ве вейран эдиш ыгтыярына эе болар.

¹⁷ Патышалыгының әхли гүйҗүни топлап, душманының үстүне гелмеги йүрегине дүвер. Патышалыгыны хеләк этмек үчин, гүнорта патышасы билен ярашык баглашар, оңа аял берер. Эмма демиргазык патышасының бу гуран хилеси баша бармаз, бу оңа хич хили пейда гетирмез.

¹⁸ Шундан соңра ол үнсүни кенар якасындакы шәхерлере тарап өврер ве оларың көпүсини басып алар. Йөне бир серкерде онуң кемситмелериниң соңуна чыкар, гопбамсылыгы үчин җезасыны берер.

¹⁹ Соңра ол өз юрдуның галаларына тарап өврүлер, йөне бүдрәп йыкылар-да, йитирим болар.

²⁰ Демиргазык патышасының ерине патышалыгың шөхраты үчин салгыт йыгнамага иберйәнчи бири болар. Ол хем бирнәче гүнден ёк эдилер, йөне бу не гахар үсти билен, не-де сөвеш үсти билен ёк эдилер.

²¹ Онуң ерине патышалык хорматына мынасып болмадык бир намарт адам пейда болар. Ол дуйдансыз гелип, патышалыгы мекирлик билен элине алар.

²² Сил кимин гелип басан гошунлар онуң өңүнден сүпүрилип айрылар, хатда әхт хөкүмдары-да еңлише сезевар болар.

²³ Намарт адам ылалашык баглашмак билен хиле гурар ве кичи гошун билен гүйчленер.

²⁴ Ол велаята болчулык дөврүнде дуйдансыз барып, ата-бабаларының хич хачан эдип билмедик ишлерини эдер. Талаң, чапавулчылык эдип, олҗаны өз гошунының арасында пайлар. Галаларың гаршысына дилдүвшүк гурар, эмма бу узак гитмез.

²⁵ Соңра гүйҗүни ве кувватыны җемләп, ол бейик гошун билен гүнорта патышасының гаршысына чыкар. Гүнорта патышасы-да хас улы ве гүйчли гошун билен урша гиришер. Эмма гүнорта патышасы өзүне гаршы гурлан дилдүвшүклер себәпли еңиш газанып билмез.

²⁶ Онуң сачагындан чөрек иенлер оны вейран эдерлер. Гошуны даргадылып, бир топары урлуп өлдүрилер.

²⁷ Бу патышаларың икисиниң-де йүрегинде эрбет ниет болар. Олар бир сачагың башында биле отурып, ялан сөзләрлер, йөне бу ёл алмаз, чүнки мунуң соңы белленен вагтда гелер.

²⁸ Демиргазык патышасы улы байлык билен өз юрдуна доланар, эмма йүреги мукаддес әхте гаршы болар. Ол ниетини амала ашырып, юрдуна доланар.

²⁹ Белленен вагтда ол ене-де гүнорта өврүлип гелер, эмма бу гезек өңки ялы болмаз.

³⁰ Китим гәмилери оңа гаршы чыкар. Онсоң ол рухдан дүшүп, ызына өврүлер. Ол газап атына атланып, мукаддес әхте гаршы херекет эдер ве мукаддес әхте хыянат эденлере хормат гояр.

³¹ Онуң иберен гошунлары мукаддес ери ве галаны эеләп, олары харама чыкарарлар. Олар гүнделик якма гурбанлыгыны ятырып, вейранчылык гетирйән йигренҗи зады дикерлер.

³² Ол әхте хыянат эденлери хилегәрлик билен ёлундан аздырар, эмма өз Худайына вепалы халк болса берк дуруп, оңа гаршы херекет эдер.

³³ Халкың арасындакы акыллы адамлар көп кишилере акыл-пайхас берерлер, эмма бирнәче гүнүң довамында олары гылычдан гечирерлер, отда якарлар ве сүргүн эдип таларлар.

³⁴ Еңлише сезевар боланларында, олара бираз көмек эдилер. Көп адам яранҗаңлык билен олара гошулар.

³⁵ Галанларың ахырзамана ченли гүнәлеринден сапланмагы, пәкленмеги ве акланмагы үчин акыллы адамлардан бирнәчеси хеләк болар. Чүнки энтек белленен мөхлете вагт бардыр.

Пис патыша

³⁶ Бу патыша өз исләнини эдер. Ол өзүни бейгелдип, хер бир худайдан өзүни ёкары тутар. Хатда худайларың Худайына гаршы күпүр гепләр. Худайың газаплы дөври тамамланянча, патышаның иши ровачланар, чүнки кабул эдилен карар ерине етмелидир.

³⁷ Ол ата-бабаларының худайларына, хатда аялларың иң сөйгүли худайына хем хормат гоймаз. Ол хич бир худайы сыламаз, ол өзүни хемме затдан ёкарда саяр.

³⁸ Булара дерек ол галаларың худайына хормат гояр. Ата-бабаларының танамадык худайыны алтын-күмүш, гымматбаха дашлар ве хер дүрли сылаг-серпайлар билен хорматлар.

³⁹ Ол кесеки худайың көмеги билен галалары беркарар эдер. Патыша өзүни хөкүмдар хөкмүнде кабул эденлери хас артык сылаглар, олары көп адамларың үстүнден хәким гояр. Юрды олара байрак хөкмүнде пайлар.

⁴⁰ Ахырзаман вагтында гүнорта патышасы онуң билен чакнышар. Эмма демиргазык патышасы сөвеш арабаларыдыр атлылары ве биртопар гәмилери билен харасат ялы онуң үстүне дөкүлер. Ол юртлара гаршы сөвеш эдип, олары сил дей басар.

⁴¹ Ол овадан юрда гирер ве он мүңлерче адам хеләк болар, эмма Эдомың, Мовабың ве Аммоның ёлбашчылары онуң элинден гачып гутуларлар.

⁴² Ол юртлара зарба урар, ондан Мүсүр юрды-да гачып гутулмаз.

⁴³ Ол алтын-күмүш хазыналарыны ве Мүсүриң әхли байлыгыны өз ыгтыярына гечирер. Ливиялылар ве эфиопиялылар оңа боюн эгерлер.

⁴⁴ Эмма гүндогардан ве демиргазыкдан говшан хабарлар оны ховсала салар. Онсоң ол газап атына атланып, көп адамлары өлдүрмек ве бүтинлей ёк этмек үчин ёла дүшер.

⁴⁵ Ол өз шалык чадырларыны деңиз билен овадан мукаддес дагың арасында дикер. Эмма онуң өмрүниң соңы гелер, оңа көмек эден тапылмаз».