Çölde 9 - Мукаддес Китап

9-нҗы бап Песах байрамы

¹ Ысрайылларың Мүсүрден чыканларындан соңкы икинҗи йылың биринҗи айында Реб Синай чөлүнде Муса билен геплешип, шейле дийди:

² «Ысрайыллар кесгитленен вагтда Песах байрамыны беллесинлер.

³ Шу айың он дөрдүне, белленен вагтда, агшамара оны әхли дүзгүнлере ве када-кануна лайыклыкда гечирсинлер».

⁴ Шейлеликде, Муса ысрайыллара Песах байрамыны беллемелидиклерини айтды.

⁵ Шоңа гөрә, ысрайыллар Синай чөлүнде биринҗи айың он дөрдүне, агшамара Песах байрамыны белледилер. Ысрайыллар Реббиң Муса табшыран затларының әхлисини берҗай этдилер.

⁶ Эмма өлә галташанлыгы зерарлы харам боланлар-да барды. Олар шол гүн Песах байрамының гечирилишине гатнашып билмедилер. Шонуң үчин олар Муса билен Харуның янына гелип:

⁷ «Өлә галташып харам болсак-да, биз нәме үчин бейлеки ысрайыллар билен биле Реббе белленен вагтда гурбанлык бермели дәлмишик?» дийдилер.

⁸ Муса олара: «Гарашың, сиз хакда Реббиң нәме табшырык берйәнини билейин» дийди.

⁹ Реб Муса шейле дийди:

¹⁰ «Ысрайыллара айт, сизиң бириңизиң я-да несиллериңизден бириниң өлә галташып, харам боландыгына я-да узак сапарда боландыгына гарамаздан, Реббиң Песах байрамыны белләп билерсиңиз.

¹¹ Олар икинҗи айың он дөрдүне, агшам Песах гурбаныны союп, оны петир ве аҗы отлар билен ийсинлер.

¹² Эртире ченли гурбанлыкдан хич зат галмасын ве онуң екеҗе сүңки-де дөвүлмесин. Песах байрамы өзүниң әхли када-канунларына лайыклыкда белленсин.

¹³ Эмма кимде-ким тәмиздигине ве узак ёла гитмәндигине гарамаздан, Песах байрамыны беллемесе, онда ол Реббе берилмели садаканы белленен вагтында бермәнлиги үчин, халкың арасындан ковлуп чыкарылсын. Бейле адам эден гүнәси үчин җезасыны чекмелидир.

¹⁴ Эгер араңызда яшаян гелмишеклерден бири Реббиң Песах байрамыны беллесе, онда ол оны әхли када-канунлара лайыклыкда гечирсин. Аслы ысрайыллы болан үчин хем, гелмишек үчин хем бир дүзгүн болсун».

Мукаддес чадыры бүрән булут

¹⁵ Мукаддес чадырың, ягны әхт чадырының гурлан гүни, оны булут гаплап алды. Агшамдан тә эртире ченли булут ода меңзәп, мукаддес чадырың депесинде дурды.

¹⁶ Бу хемише шейле болды, гүндизлерине мукаддес чадыры бүрейән булут гиҗелерине ода меңзейәрди.

¹⁷ Булут чадырың үстүнден гөтериленсоң, ысрайыллар ёла дүшердилер. Булут нирә гелип дурса, ысрайыллар хем шол ерде дүшелге гурардылар.

¹⁸ Ысрайыллар Реббиң буйругы билен ёла дүшүп, Реббиң буйругы билен хем дүшләрдилер. Булут мукаддес чадырың депесинде нәче вагтлап сакланса, олар хем өз дүшелгелеринде шонча вагт сакланардылар.

¹⁹ Хатда булудың мукаддес чадырың депесинде сакланмагы узага чексе-де, ысрайыллар Реббиң буйругыны берҗай эдип гөчмездилер.

²⁰ Кәвагтлар булут мукаддес чадырың депесинде диңе санлыҗа гүн гөрнерди, олар хем Реббиң буйругына гөрә дүшелгелеринде болуп, соңра Реббиң буйругы билен хем ёла дүшердилер.

²¹ Кәвагтлар болса булут диңе агшамдан эртире ченли сакланарды, булут ирден гөтериленсоң, олар ёла дүшердилер. Гүндиз болсун, гиҗе болсун – пархы ёк, булут ёкары гөтериленде ысрайыллар хем ёла дүшердилер.

²² Булут мукаддес чадырың депесинде ики гүн сакланса-да, бир ай сакланса-да, хатда ондан хем узак вагтлап сакланмагыны довам этсе-де, ысрайыллар дүшлән ерлеринден гөчмездилер. Эмма булут гөтерилен бадына, олар ене ёла дүшердилер.

²³ Ысрайыллар Реббиң буйругы билен дүшләп, Реббиң буйругы билен хем ёла дүшердилер. Олар Реббиң Муса аркалы берйән буйрукларыны берҗай этдилер.