Çölde 8 - Мукаддес Китап

8‑нҗи бап Харун чыралары ерлешдирйәр

¹ Реб Муса шейле дийди:

² «Харуна айт: ол чыралары чырадана отурданда, оларың ягтысы чыраданың өңүне дүшер ялы эдип отуртсын».

³ Харун шейле хем этди. Реббиң Муса буйрушы ялы, ол чыралары чыраданың өңүне ягты сачар ялы эдип ерлешдирди.

⁴ Чыраданың гурлушы шейледи: аягындан тә чыра отурдылян гүллерине ченли дөвме сап алтындан ясаланды. Харун чыраданы Реббиң Муса гөркезен нусгасы боюнча ясады.

Левилер Реббе багыш эдилйәр

⁵ Реб Муса шейле дийди:

⁶ «Ысрайылларың арасындан левилери бөлүп айыр-да, олары тәмизле.

⁷ Олары тәмизлемек үчин шейле эт: оларың үстүне тәмизлик сувуны сепеле, онсоң олар бедениндәки әхли түйлери сырсынлар, эшиклерини ювсунлар, шейдип, өзлерини тәмизлесинлер.

⁸ Соңра олар бир өкүзче билен галла садакасы үчин зейтун ягына гарылан сайлама бугдай унуны алсынлар. Сен хем гүнә гурбанлыгы үчин бир өкүзче ал.

⁹ Онсоң левилери Реббе йүз тутулян чадырың өңүне гетирип, бүтин ысрайыл җемагатыны йыгна.

¹⁰ Левилери Реббиң хузурына гетирен махалың ысрайыллар эллерини левилериң келлесине гойсунлар.

¹¹ Харун левилери ысрайылларың берйән гөтерме садакасы хөкмүнде Реббе багыш этсин. Шонда олар Реббиң хызматыны эдип билерлер.

¹² Онсоң левилер эллерини өкүзчелериң келлесине гойсунлар. Оларың бирини гүнә гурбанлыгы үчин, бейлекисини-де левилери гүнәсинден сапламак үчин, якма гурбанлыгы хөкмүнде Реббе багыш этсинлер.

¹³ Соңра левилери Харуның огулларының өңүнде дурзуп, олары Реббе багыш эт.

¹⁴ Шейдип, сен левилери ысрайылларың арасындан сайлап аларсың, инди олар Реббиңки боларлар.

¹⁵ Сен левилери тәмизләп, олары Реббе багыш эдениңден соң, олар Реббе йүз тутулян чадырда хызмат этмек үчин ичери гирип билерлер.

¹⁶ Чүнки ысрайылларың арасында олар инди бүтинлей Реббе дегишлидирлер. Реб левилери әхли ысрайыл аялларының илкинҗи догран огулларының өвезине Өзүне алды.

¹⁷ Чүнки ысрайылларың арасында хайван болсун, ынсан болсун пархы ёк, илкинҗи догланлар Реббиңкидир. Мүсүр юрдунда новбахар огуллары гыран гүни, Реб олары Өзүне багыш этди.

¹⁸ Ол левилери болса ысрайылың новбахар огулларының өвезине тутушлыгына Өзүне алды.

¹⁹ Онуң үстесине-де, Ол ысрайыллардан левилери Харуна ве онуң огулларына пешгеш хөкмүнде берди. Чүнки левилер ысрайыллара дерек Реббе йүз тутулян өйде ишлейәндиклери үчин, ысрайыллары гүнәлеринден сапларлар. Левилер ысрайыллары мукаддес затлара хас голай гелмекден горарлар, ёгсам ысрайыллар хеләк боларлар».

²⁰ Муса билен Харун ве бүтин ысрайыл халкы левилер үчин айдылан затлары этдилер. Ысрайыллар Реббиң левилер хакда Муса буйранларының барыны берҗай этдилер.

²¹ Левилер өзлерини тәмизләп, эшиклерини ювдулар. Онсоң Харун олары гөтерме садакасы хөкмүнде Реббиң хузурында хөдүр этди ве тәмизлемек үчин, олары гүнәлеринден саплады.

²² Шондан соңра левилер Харуның ве онуң огулларының ыгтыярлыгында Реббе йүз тутулян чадыра хызмат этмәге гирдилер. Олар левилер хакда эдил Реббиң Муса буйрушы ялы хем этдилер.

²³ Реб Муса шейле дийди:

²⁴ «Левилере дегишли дүзгүн шейледир: яшы йигрими бәш ве ондан ёкары боланлар Реббе йүз тутулян чадырың хызматыны этмелидирлер.

²⁵ Элли яшдан соң олар хызматдан бошадылмалыдырлар ве мундан бейләк гуллук этмели дәлдирлер.

²⁶ Олар Реббе йүз тутулян чадыры горамак кешигини чекйән өз леви доганларына көмек эдип билерлер. Ине, сен шейдип, левилериң ерине етирйән борчларыны шунуң ялы кадалашдыргын».