Çölde 6 - Мукаддес Китап

6-нҗы бап Назырлык дүзгүни

¹ Реб Муса шейле дийди:

² «Ысрайыллара айт: эгер эркек я аял назыр болмага касам ичип, өзүни Реббе багыш этсе,

³ онда ол шерапдан ве чакырдан датмасын. Шерап сиркесини-де, башга сирке-де уланмасын, үзүм шербедини-де ичмесин, тер үзүм-де, кишмиш-де иймесин.

⁴ Назырлык дөврүниң бүтин довамында үзүмден өндүрилен хич бир зады, хатда үзүмиң габыгыны я дәнесини-де агзына алмасын.

⁵ Назыр болмага касам ичен дөврүниң бүтин довамында онуң келлесине хич бир пәки дегмесин, өзүни Реббе багыш эден гүнлери гутарянча, назыр болан адам мукаддесдир, ол сачыны өсдүрсин.

^6-7 Онуң сачы Реббе багыш эдилендигиниң нышаныдыр. Өзүни Реббе багыш эден гүнлеринде ол җеседе голайлашмасын. Хатда онуң атасы я энеси, доганы я уясы өләенде-де, ол өзүни харам этмесин.

⁸ Назырлык дөврүниң бүтин довамында бу адам Реббе багыш эдилен адамдыр.

⁹ Эгер гапдалындакыларың бири дуйдансызлыкда өлүп, назырың мукаддес сачыны харам этсе, онда ол тәмизленилйән гүн болан единҗи гүни сачыны сырсын.

¹⁰ Секизинҗи гүн ол ики гумрыны я-да ики кепдери чагасыны гетирип, Реббе йүз тутулян чадырың гирелгесинде рухана берсин.

¹¹ Руханы оларың бирини гүнә гурбанлыгы, бейлекисини болса якма гурбанлыгы хөкмүнде хөдүр эдип, назыры гүнәсинден сапласын, чүнки ол җеседе голайлашандыгы зерарлы языклы болупды. Назыр шол гүнүң өзүнде сачыны тәзеден багыш этсин.

¹² Ол назырлыга тәзеден башламак үчин, өзүни Реббе багыш этсин ве язык гурбанлыгы хөкмүнде биряшар эркек токлы гетирсин. Чүнки мукаддес эдилен сачың харам боландыгы үчин, өңки гүнлер хасап эдилмейәр.

¹³ Назырлык мөхлети гутаранда, назырлар үчин шу дүзгүни берҗай этсинлер: оны Реббе йүз тутулян чадырың гирелгесине гетирсинлер.

¹⁴ Ол Реббе өз пешгешини хөдүр этсин, биряшар шикессиз эркек токлыны якма гурбанлыгы хөкмүнде, биряшар шикессиз уркачы токлыны гүнә гурбанлыгы хөкмүнде, шикессиз бир гочы болса саламатлык гурбанлыгы хөкмүнде хөдүр этсин.

¹⁵ Бир себет петири, сайлама бугдай унундан зейтун ягына югрулан күлчелери, йүзүне зейтун ягы чалнан челпеклери, олар билен биле галла ве ичги садакасыны берсин.

¹⁶ Руханы булары Реббиң хузурында хөдүр этсин, оларың гүнә хем-де якма гурбанлыгыны-да хөдүр этсин.

¹⁷ Бир себет петир билен гочы саламатлык гурбанлыгы хөкмүнде хөдүр этсин. Шейле хем руханы галла хем ичги садакасыны-да хөдүр этсин.

¹⁸ Соңра назыр Реббе йүз тутулян чадырың гирелгесинде, Реббе багыш эдилен сачыны сырып, саламатлык гурбанлыгының ашагында янып дуран ода ташласын.

¹⁹ Назыр Реббе багыш эдилен сачыны сырып болансоң, руханы гочуң гайнан бир будуны, себетден бир петири ве йүзүне зейтун ягы чалнан бир челпеги алып, олары назырың элине берсин.

²⁰ Онсоң руханы гөтерме садакасы хөкмүнде олары Реббиң хузурында ёкары галдырсын. Гөтерме садака хөкмүнде дөш хем, үвреме садака хөкмүнде бут хем руханы үчин мукаддес пайдыр. Шондан соңра назыр болан адам шерап ичип билер.

²¹ Ине, касам ичип, назыр боландыгы ве онуң Реббе багыш эдилендиги үчин берилйән назырлык гурбанлыклары хакындакы дүзгүн шулардан ыбаратдыр. Эгер ол назырлык касамының талап эдйән затларындан башга-да садака бермеги вада берен болса, онда берен вадасыны долы берҗай этсин».

Руханы патасы

²² Реб Муса шейле дийди:

²³ «Харуна ве онуң огулларына айт, ысрайыллара пата берсинлер. Сиз олара шейле дийиң:

²⁴ „Гой, Реб сизи ялкап, Өз пенасында сакласын!

²⁵ Реб гүлер йүзи билен баксын, сизе мерхемет этсин!

²⁶ Реб сизе назарыны салып, саламатлык берсин!

²⁷ Шейдип, Харун ве онуң огуллары ысрайыллара Мениң адым билен пата берсинлер, Мен хем олары ялкарын“».