Çölde 5 - Мукаддес Китап

5‑нҗи бап Дүшелгәни тәмиз сакламак

¹ Реб Муса шейле дийди:

² «Ысрайыллара буйрук бер: ёканчлы дери ве акма кеселлини я-да өлә галташып харам боланы,

³ эркек кишими я аял пархы ёк, Ысрайыл дүшелгесини харама чыкармаз ялы, дүшелгеден хөкман чыкарың, чүнки оларың арасында Мен яшаярын».

⁴ Ысрайыллар шейле хем этдилер, олары дүшелгеден чыкардылар. Реббиң Муса диенлериниң әхлисини ысрайыллар берҗай этдилер.

Гүнәниң өвезини долмак

⁵ Реб Муса шейле дийди:

⁶ «Ысрайыллара айт: эгер эркек я-да аял бир адамың гаршысына гүнә этсе ве Реббе дөнүклик эдип, гүнә газанса,

⁷ ол эден гүнәсини боюн алсын ве гүнәси үчин өвезлик төлегини төлесин. Ене онуң үстүне өвезлик төлегиң бәшден бир бөлегини гошуп, җебир чекен кишә берсин.

⁸ Эгер җебир чекен өлсе ве хун алмага хоссары болмаса, онда эдилен гүнә үчин төленен хун Реббе багыш эдилип, рухана берилсин. Бу гүнәкәриң гүнәсини сапламак үчин үстесине гоч хем берилсин.

⁹ Ысрайылларың әхли мукаддес садакаларының арасындан гетирилен хер бир садака руханыңкыдыр.

¹⁰ Хеммәниң берйән мукаддес садакалары руханыңкыдыр, ким нәме берсе руханыңкыдыр».

Бивепа аял хакында

¹¹ Реб Муса шейле дийди:

¹² «Ысрайыллара айт: эгер бириниң аялы терс ёла дүшүп, бивепалык этсе,

¹³ башга бир адам билен ятып, муны әри билмесе, шейдибем, аял гүнәли болса-да, айыбы әшгәр болмаса, гаршысына шаят тапылмаса ве ол бу иш үстүнде тутулмаса,

¹⁴ әри болса вас-вас кеселине учрап, гүнәли аялына мүңкүр болса я-да аялы гүнәли болмаса-да оңа мүңкүрлик этсе,

¹⁵ онда әри аялыны руханының янына алып гелсин. Аялы үчин берилмели садаканы, ягны бир батманың ондан бири арпа унуны гетирсин. Мунуң мүңкүрлик галла садакасыдыгы, ягны этмиши әшгәр эдйән садакадыгы үчин, унуң үстүне зейтун ягы гуюлмасын, онуң үстүне якымлы ыслы түтетги-де гоюлмасын.

¹⁶ Онсоң руханы ол аялы гетирип, Реббиң хузурында дурузсын.

¹⁷ Руханы мукаддес сувдан тоюн габа гуюп алсын ве мукаддес чадырың ичинден топрак алып, сува гуйсун.

¹⁸ Руханы ол аялы Реббиң хузурында дурзуп, онуң сачыны яйсын ве онуң гошавуҗына мүңкүрлик садакасыны, ягны этмиши ятладып дурян айыплама садакасыны гуйсун. Руханы өз элинде нәлет гетирҗек аҗылык сувуны сакласын.

¹⁹ Руханы аяла касам ичирип шейле дийсин: „Эгер сен башга бир адам билен ятмадык болсаң, өз әриңиң ыгтыярындакаң гүнә этмедик болсаң, онда нәлет гетирйән бу аҗылык сувы саңа зепер етирмесин“.

^20-21 Руханы аяла нәлет антыны ичирип шейле дийсин: „Эмма сен өз әриңиң ыгтыярындакаң терс ёла дүшүп, гүнәли болсаң ве башга адам билен ятан болсаң, Реб сени Өз халкыңың арасында йигренҗе ве гаргыша сезевар этсин. Гой, Реб сениң уят ериңи гуратсын, гарның чишип гитсин.

²² Бу нәлет гетирйән сув сениң ичиңе орнап, гарныңы чиширсин, уят ериңи гуратсын!“ Аял хем „Омын. Омын“ дийсин.

²³ Онсоң руханы бу нәлет сөзлерини язып, оны аҗылык сувунда ювсун.

²⁴ Нәлет гетирйән аҗылык сувуны аяла ичирмели. Нәлет гетирйән аҗылык сувы аялың ичине орнап, гүйчли агыры дөредер.

²⁵ Руханы мүңкүрлик садакасыны аялың элинден алып, оны Реббиң хузурында ёкары галдырсын ве гурбанлык сыпасына алып гелсин.

²⁶ Онсоң руханы Реббиң ёлуна берилйән пай хөкмүнде галла садакасындан бир гошавуҗыны алып, оны гурбанлык сыпасында яксын. Соңра аяла сувы ичирсин.

²⁷ Аяла сувы ичиренден соң, эгер аял гүнәли болуп, әрине бивепалык эден болса, нәлет гетирйән сув онуң ичине орнап, гүйчли агыры дөредер. Ол аялың уят ери гурар, гарны чишер.

²⁸ Эмма аял гүнәли болман тәмиз болса, оңа хич хили зепер этмез ве ене-де чага догруп билер.

²⁹ Аял өз әриниң ыгтыярындака терс ёла дүшүп, өзүниң гүнәлидигине мүңкүр болан ягдайында канун шудур.

³⁰ Я-да әри вас-вас кеселине учрап, аялына мүңкүрлик эдип башласа, онда ол аялыны Реббиң хузурына гетирсин ве руханы ол аял бабатда бу кануны улансын.

³¹ Әри языклы болмаз, эмма аялы велин эден гүнәси үчин җезасыны чексин».