Çölde 4 - Мукаддес Китап

4‑нҗи бап Леви уругларының борчлары

¹ Реб Муса билен Харуна шейле дийди:

² «Бейлеки левилерден айратынлыкда, уругларына ве ковумларына гөрә кохатларың

³ Реббе йүз тутулян чадырда ишлемәге яравлы, отуз яшдан элли яша ченли боланларының хеммесини хасаба ал.

⁴ Кохатларың Реббе йүз тутулян чадырда ерине етирмели хызматы иң мукаддес затлар билен багланышыклыдыр.

⁵ Дүшелге гөчмели боланда, Харун ве онуң огуллары чадыра гирип, иң мукаддес отагы бөлүп дуран тутыны айырсынлар ве онуң билен Әхт сандыгыны басырсынлар.

⁶ Онуң үстүни сайлама дериден эдилен япынҗа билен япып, үстүне гөк кетени чексинлер ве сандыгың сырыкларыны ерине гойсунлар.

⁷ Хөдүр чөреклери гоюлян хантагтаның үстүне гөк кетени язып, онуң үстүнде табаклары ве җамлары, ичги садакасы үчин күйзелери ве шакәселери гойсунлар. Хемишелик чөрек хем онуң үстүнде болсун.

⁸ Соңра оларың үстүнден гырмызы мата япып, оны хем сайлама дериден эдилен япынҗа билен басырсынлар ве онуң сырыкларыны ерине отуртсынлар.

⁹ Чыраданы, онуң чыраларыны, мүченеклерини, новаларыны ве зейтун ягы салынян әхли гапларыны гөк кетени билен басырсынлар.

¹⁰ Онсоң әхли энҗамлары билен билеликде оны сайлама дериден эдилен япынҗа билен басырып, земмериң үстүнде гойсунлар.

¹¹ Алтындан эдилен сыпаның үстүне гөк кетени япып, оны сайлама дериден эдилен япынҗа билен басырсынлар ве онуң сырыкларыны ерине отуртсынлар.

¹² Мукаддес өйде ыбадат эдиленде уланылян әхли энҗамлары алып, олары гөк кетенә доласынлар ве сайлама дериден эдилен япынҗа билен басырсынлар. Онсоң олары земмериң үстүнде гойсунлар.

¹³ Гурбанлык сыпасының үстүнден күли айрып, үстүне гырмызы матаны япсынлар.

¹⁴ Онуң үстүне гурбанлык сыпасының әхли энҗамларыны, ягны ыбадат эдиленде уланылян маңңаллары, чаршаклары, күл атарлары, легенлери гоюп, үстүне сайлама дериден эдилен япынҗаны япсынлар ве сырыкларыны ерине отуртсынлар.

¹⁵ Дүшелге гөчмели боланда, Харун ве онуң огуллары мукаддес өйи ве онуң әхли эсбапларыны басырып болансоңлар, кохатлар булары гөтермәге гелерлер. Йөне олар мукаддес затлара галташмасынлар, ёгсам өлерлер. Ине, кохатларың чадырдакы гөтерҗек затлары шулардыр.

¹⁶ Руханы Харуның оглы Элгазара чыра ягына, якымлы ыслы түтетгә, адаты галла садакасына ве месх ягына гөзегчилик этмек табшырылсын. Шейле хем оңа тутуш мукаддес чадыр ве онуң ичиндәки әхли энҗамлары, мукаддес отаг ве онуң энҗамлары табшырылсын».

¹⁷ Онсоң Реб Муса билен Харуна шейле дийди:

¹⁸ «Левилериң арасында кохат уругының ёк болуп гитмегине ёл бермәң.

¹⁹ Олар иң мукаддес затлара галташанларында өлмән аман галарлары ялы, сиз шейле эдиң: Харун ве онуң огуллары ичери гирип, кохатларың херсиниң ерине етирмели хызматыны я-да гөтермели йүкүни гөркезсин.

²⁰ Эмма кохатлар мукаддес затлара сәхел салымлык хем серетмели дәлдирлер, ёгсам олар өлерлер».

²¹ Соңра Реб Муса шейле дийди:

^22-23 «Уругларына ве ковумларына гөрә гершонларың Реббе йүз тутулян чадырда ишлемәге яравлы, отуз яшдан элли яша ченли боланларының хеммесини язып хасаба ал.

²⁴ Гершон уругларының этмели ишлери ве дашамалы йүклери шулардан ыбарат:

²⁵ олар мукаддес чадырың тутуларыны, Реббе йүз тутулян чадыры ве онуң япынҗасыны, онуң сайлама дериден эдилен дашкы япынҗасыны ве гирелгесиндәки пердәни,

²⁶ хаядың перделерини, мукаддес чадырың ве гурбанлык сыпасының дашындакы хаядың дервезесиниң япынҗасыны ве онуң зынҗырларыны, олара дегишли әхли эсбаплары гөтерсинлер. Бу затлар билен багланышыклы ишлериң хеммесини этсинлер.

²⁷ Йүк дашамагы ве башга ишлери – әхли хызматлары гершонлар Харуның ве онуң огулларының буйругы эсасында битирсинлер. Гөтерйән затларыны горамаклыга олары борчлы эдиң.

²⁸ Руханы Харуның оглы Ытамарың гөзегчилиги астында гершонларың Реббе йүз тутулян чадыр билен багланышыклы этмели ишлери ве гораг везипелери, ине, шулардыр.

^29-30 Инди болса уругларына ве ковумларына гөрә мерарылары Реббе йүз тутулян чадырда ишлемәге яравлы отуз яшдан элли яша ченли боланларының хеммесини язга гечир.

³¹ Реббе йүз тутулян чадырда хызмат этмек билен оларың гөтермели ве горамалы затлары шулардыр: мукаддес чадырың чарчувалары, таяклары, сүтүнлери ве олары саклаян дабанлары,

³² хаядың сүтүнлери ве дабанлары, газыклары, зынҗырлары, олара дегишли әхли энҗамлар. Оларың гөтермели затларыны атма-ат санап табшырың.

³³ Руханы Харуның оглы Ытамарың гөзегчилиги астында мерарыларың Реббе йүз тутулян чадыр билен багланышыклы этмели ишлери, ине, шулардыр».

³⁴ Онсоң Муса билен Харун ве халкың ёлбашчылары уругларына ве ковумларына гөрә кохатлары язга гечирдилер.

³⁵ Реббе йүз тутулян чадырда ишлемәге яравлы отуз яшдан элли яша ченли боланларының

³⁶ уругларына гөрә хасаба алнаны ики мүң еди йүз элли адам болды.

³⁷ Бу Реббе йүз тутулян чадырда хызмат эден әхли кохатларың уругларының баш саныдыр. Реббиң Мусаның үсти билен буйрушы ялы, олары Муса билен Харун хасаба алды.

³⁸ Уругларына ве ковумларына гөрә хасаба алнан гершонларың саны шудур:

³⁹ Реббе йүз тутулян чадырда ишлемәге яравлы отуз яшдан элли яша ченли боланлары

⁴⁰ уругларына ве ковумларына гөрә ики мүң алты йүз отуз адам болды.

⁴¹ Бу Реббе йүз тутулян чадырда хызмат эден әхли гершонларың уругларының баш саныдыр. Реббиң буйрушы ялы, олары Муса билен Харун хасаба алды.

⁴² Уругларына ве ковумларына гөрә, мерарыларың саны шудур:

⁴³ Реббе йүз тутулян чадырда ишлемәге яравлы отуз яшдан элли яша ченли боланлары

⁴⁴ уругларына гөрә җеми үч мүң ики йүз адам болды.

⁴⁵ Бу Реббе йүз тутулян чадырда хызмат эден әхли мерарыларың уругларының баш саныдыр. Реббиң Мусаның үсти билен буйрушы ялы, олары Муса билен Харун хасаба алды.

⁴⁶ Муса билен Харуның ве ысрайыл ёлбашчыларының уругларына ве ковумларына гөрә хасаба алан,

⁴⁷ Реббе йүз тутулян чадырда ишлемәге ве йүк гөтермәге яравлы, отуз яшдан элли яша ченли болан

⁴⁸ левилери секиз мүң бәш йүз сегсен адам болды.

⁴⁹ Реббиң Мусаның үсти билен берен буйругына гөрә, хер бир адамың ерине етирмели иши ве гөтермели йүки белли эдилди. Реббиң буйрушы ялы, олар Муса тарапындан хасаба алындылар.