Çölde 35 - Мукаддес Китап

35‑нҗи бап Левилере берилмели галалар

¹ Иордан дерясының боюнда, Ерихоның гаршысында ерлешйән Мовап дүзлүгинде Реб Муса шейле дийди:

² «Ысрайыллара шейле буйрук бер, гой, олар өзлерине мирас дүшен мүлклеринден левилере яшар ялы галалар берсинлер. Шол галаларың төверегиндәки өри мейданларыны-да левилере берсинлер.

³ Бу галалар левилериң яшамагы үчиндир. Галаларың төверегиндәки өри мейданлары болса левилериң сүрүлери ве әхли мал-гаралары үчиндир.

^4-5 Галаның диварындан чар тарапа мүң тирсек аралык гоюп, онуң гүндогар ве гүнорта тарапларыны ики мүң тирсек, гүнбатар ве демиргазык тарапларыны-да ики мүң тирсек эдип, левилере берилҗек галаларың өри мейданларыны дөртбурч шекилинде өлчәң».

Гачыбаталга галалары

⁶ «Левилере берйән галаларыңызың алтысы гачыбаталга галалары болсун. Булардан башга ене кырк ики галаны левилере бериң.

⁷ Левилере өри мейданлары билен бирликде җеми кырк секиз гала бериң.

⁸ Олара берҗек галаларыңыз тире пайы гөрнүшинде болсун. Галалары көп болан улы ысрайыл тиресинден көп гала, галалары аз болан кичирәк тиреден болса аз гала алнып, хер тире өз мүлк пайына гөрә левилере берсин».

⁹ Соңра Реб Муса шейле дийди:

¹⁰ «Ысрайыллара айт, Иордан дерясындан гечип, Кенган топрагына гирениңизде,

¹¹ өзүңиз үчин гачыбаталга галаларыны сайлаң. Төтәнликде адам өлдүрен ганхор, гой, шол ере гачсын.

¹² Бу галалар ганхора җемагатың өңүнде хөкүм чыкарылянча, өлдүрилениң хоссарындан гачыбаталга болуп хызмат этсин.

¹³ Өзүңиз үчин җеми алты саны гачыбаталга галасыны белләң:

¹⁴ оларың үчүси Иордан дерясының гүндогар тарапында, үчүси хем Кенган топрагында болсун.

¹⁵ Бу алты гала ысрайыллара ве араңызда яшаян гелмишеклере, гөчүп геленлере гачыбаталга болуп хызмат этсин. Төтәнликде адам өлдүрип, ганхор болан адам ол ере гачып билер.

Ганхорлык ве ар алмак хакда

¹⁶ Эгер-де бири демирден ясалан зат билен башга бирини уруп өлдүрсе, ол адам ганхордыр. Ганхорың җезасы өлүм болсун.

¹⁷ Эгер бири адама дегенде өлдүрип билҗек даш билен адам уруп өлдүрсе, ол ганхордыр. Ганхорың җезасы өлүм болсун.

¹⁸ Я-да бири адама дегенде өлдүрип билҗек агач бөлеги билен адам уруп өлдүрсе, ол ганхордыр. Ганхорың җезасы өлүм болсун.

¹⁹ Дөкүлен ган үчин өлдүрилениң хоссары ганхоры өлдүрер. Ол өз гандарыны душан еринде өлдүрсин.

²⁰ Шунуң ялы-да, эгер бири башга бир адамы йигренйәндиги үчин итекләп я-да башга бири букуда ятып, оңа тарап бир зат зыңып өлдүрсе,

²¹ я-да душманчылыкдан оны эли билен уруп өлдүрсе, онда оны өлдүрен адам өлүме хөкүм эдилсин. Ол адам ганхордыр, өлдүрилениң хоссары ганхоры душан еринде өлдүрсин.

²² Эмма бири душманчылык этмезден, бир адамы төтәнликде итип гойберсе я-да букуда ятып пейлемезден, оңа тарап бир зат зыңып гойберсе,

²³ я-да адама дегенде өлдүрип билҗек дашы серетмән зыңып, төтәнликде бир адамың ганына галса, өлдүрен билен өлениң арасында душманчылык болмандыгына ве өлдүрениң оңа шикес етирмек ислемәндигине гарамаздан,

²⁴ ганхор билен өлдүрилениң хоссарының арасындакы даваны шу када-канунлар боюнча җемагат чөзсүн.

²⁵ Җемагат өлдүрилениң хоссарының элинден ганхоры халас этсин ве оны башдакы гачып баран гачыбаталга галасына угратсын. Депесине мукаддес яг гуйлуп белленен баш руханы өлйәнчә, ганхор шол ерде болмалыдыр.

²⁶ Эмма ганхор илки гачып баран гачыбаталга галасының чәгинден даша чыкса

²⁷ ве өлдүрилениң хоссары оны тапып өлдүрсе, өлдүрилениң хоссары ганхор сайылмалы дәлдир.

²⁸ Чүнки ганхор баш руханы өлйәнчә, гачыбаталга галасының дашына чыкмалы дәлдир. Ол диңе баш руханы өленден соң, өз өйүне гайдып билер.

²⁹ Булар сиз ниреде яшасаңыз-да, несиллер бойы сизе парз ве хөкүм болсун.

³⁰ Эгер бир адам башга бир адамы өлдүрсе, шаятларың гөркезмеси эсасында ол өлүме хөкүм эдилсин, эмма диңе бир шаядың гөркезмеси эсасында ол өлүме хөкүм эдилмели дәлдир.

³¹ Өлүм җезасына хөкүм эдилен ганхорың җанының өвезине хун алынмасын, ганхор өлдүрилмелидир.

³² Гачыбаталга галасына гачып баран бириниң баш руханы өлмезден өң өз топрагына гайдып бармагы үчин ондан төлег алмаң.

³³ Ган топрагы харама чыкаряндыр, өз яшаян топрагыңызы харамламаң. Дөкүлен ганы топракдан диңе ганхорың ганы билен ювуп болар.

³⁴ Мениң мекан тутан топрагымы, ягны өз яшаян ериңизи харамламаң. Чүнки ысрайыл халкының арасында яшаян Реб Мендирин».