Çölde 34 - Мукаддес Китап

34‑нҗи бап Юрдуң серхетлери

¹ Реб Муса шейле дийди:

² «Ысрайыллара шейле буйрук бер: „Сиз Кенган юрдуна гирениңизде, сизе мүлк хөкмүнде берилйән бу топрагың серхетлери чәклендирилендир.

³ Сизиң гүнорта серхедиңиз Син чөлүнден Эдом серхединиң боюна узалып гидер. Ол гүндогарда Өли деңзиң гүнорта кенарындан башланяндыр.

⁴ Соңра серхет Ичян гечидиниң гүнортасындан өврүлип, Син чөлүне гечер. Ондан Кадешбарнеяның гүнортасына ченли, Хасарадара тарап узалып, Асмона тарап гечер.

⁵ Серхет Асмондан өврүлип, Мүсүр дерясына тарап узалып гидер ве онуң чети Ортаер деңзине барып етер.

⁶ Ортаер деңзи ве онуң кенары сизиң гүнбатар серхедиңиз болуп хызмат эдер. Бу сизиң гүнбатар арачәгиңиз болар.

⁷ Сизиң демиргазык арачәгиңиз шейле болар: Ортаер деңзинден Хор дагына ченли аралыкда өз серхедиңизи белләрсиңиз.

⁸ Хор дагындан Лебохамада ченли өз серхедиңизи белләрсиңиз ве серхет ондан соң Седат галасының ичинден гечер.

⁹ Арачәк Седатдан гүндогара Зипрона тарап узалып, онуң бир уҗы Хасарейнана етер. Бу сизиң демиргазык серхедиңиз болар.

¹⁰ Гүндогар серхедиңиз демиргазыкда Хасарейнандан башланып, гүнорта Шепама тарап узалып гидер.

¹¹ Серхет Шепамдан Айының гүндогар гапдалындакы Рибла тарап өврүлип, Киннерет деңзиниң гүндогар япгыдына ченли барып етер.

¹² Соңра серхет Иорданың бойы билен ашаклыгына гидип, онуң чети Өли деңзе барып етер. Даш-төверегинде шейле серхетлери болан бу юрт сизиң юрдуңыз болар“».

¹³ Муса ысрайыллара буйрук берип, шейле дийди: «Реббиң сизе биҗе атып, докуз тирәниң ве гүнбатардакы манаша тиресиниң арасында пайламагы эмр эден мүлки, ине, шу топракдыр.

¹⁴ Рубен, гат тирелери ве гүндогардакы манаша тиреси уругларына гөрә өзлериниң мүлкүни эййәм алдылар.

¹⁵ Бу ики тире ве манаша тиресиниң ярысы өзлерине мүлки Иорданың аңырсындан, Ерихоның гүндогарындан алдылар».

Тире ёлбашчылары

¹⁶ Реб Муса шейле дийди:

¹⁷ «Ери сизе мүлк эдип пайлап берҗек адамлар, ине шулардыр: руханы Элгазар ве Нунуң оглы Ешува.

¹⁸ Мүлки пайламак үчин хер тиреден бир адамы ёлбашчы хем сайлаң.

¹⁹ Ёлбашчы сайланмалы адамлар шулардыр: яхуда тиресинден Епуннәниң оглы Калеп.

²⁰ Шимгон тиресинден Эмихудың оглы Шамувел.

²¹ Бенямин тиресинден Кислоның оглы Элидат.

²² Дан тиресинден Ёглының оглы Букы сердар.

²³ Юсубың несиллери: манаша тиресинден Эфодың оглы Ханныел сердар.

²⁴ Эфрайым тиресинден Шиптаның оглы Кемувал сердар.

²⁵ Зебулун тиресинден Парнагың оглы Элисапан сердар.

²⁶ Ысакар тиресинден Азаның оглы Палтыел сердар.

²⁷ Ашер тиресинден Шеломының оглы Ахыхут сердар.

²⁸ Нафталы тиресинден Эмихудың оглы Педахел сердар».

²⁹ Реббиң Кенган юрдунда ысрайыллара мүлк пайлап бермеги эмр эден адамлары шулардан ыбаратды.